‘उद्यम तथा व्यावसायिक कर्जालाई प्राथमिकतामा राखेका छौं’

शिवप्रसाद सापकोटा
अध्यक्ष
हाम्रो सहयोगी बचत तथा ऋण सहकारी संस्था लि, पोखरा

पोखराको पृथ्वीचोकमा रहेको हाम्रो सहयोगी बचत तथा ऋण सहकारी संस्थाले स्थापनाको १०औं वर्षमा प्रवेश गरेको छ । सहकारी क्षेत्रमा आफूलाई बलियो रुपमा स्थापित गर्न सफल सहकारीको वित्तीय अवस्था, लगानीका क्षेत्र लगायत विविध विषयमा केन्द्रित रहेर अध्यक्ष शिवप्रसाद सापकोटासँग आर्थिक आवाजले गरेको कुराकानीः

सहकारीको वित्तीय अवस्था कस्तो छ ?

सहकारीको शेयर पुँजी ६ करोड ३० लाख रुपैयाँ छ । साढे २२ करोड रुपैयाँको वासलत विवरण छ । करिव १८ करोड रुपैयाँ भन्दा धेरै कर्जा प्रवाह गर्न हामी सफल छौं । सहकारीको शेयर सदस्य ७ सय ७३ जना छौं ।

सहकारीले के–कस्ता क्षेत्रमा लगानी गरेको छ ?

युवा स्वरोजगार कर्जा, कृषि उद्यमशील कर्जा, व्यावसायिक कर्जा, शेयर धितो कर्जा, घरजग्गा कर्जा लगायतका कर्जा प्रवाह गरेका छौं । कृषि, पशुपालन, फलफुल खेती लगायतका उत्पादनमुलक क्षेत्रमा धेरै लगानी छ ।

शेयर सदस्यको हकहितमा के–कस्ता काम भएका छन् ?
शेयर सदस्यको हकहितमा लागि विभिन्न कार्यक्रम गरेका छौं । जन्मदेखि मृत्युसम्म भनेर अभियान संचालन गरेका छौं । सुत्केरी भेटघाट कार्यक्रम छ । सहकारीका सेयर सदस्य सुत्केरी भएमा २ हजार १ सय रुपैयाँ दिन्छौं । शिशुलाई उपहार सहित निःशु्ल्क खाता खोलिदिने व्यवस्था छ । कुनै सदस्यको मृत्यु हुँदा १० हजार १ सय १ रुपैयाँ भेटी स्वरुप सहयोग गर्छौं । यो नयाँ कार्यक्रम हो । आगामी दिनमा छुटट्ै स्रोतको व्यवस्था गरेर यसलाई बढाउँदै लैजाने छौं । सदस्यले वार्षिक वोनसबाट पाउने रकमबाट दिनको १ रुपैयाँको दरले ३ सय ६५ रुपैयाँ छुट्याएर सामाजिक अभियानमा प्रयोग गर्छौं । सदस्यलाई सहकारीप्रति अपनत्व महसुस हुने गरेर काम गरेका छौं । समय समयमा अध्ययन अवलोकन भ्रमण पनि आयोजना गरिरहेका छौं ।

सामाजिक क्षेत्रमा केकस्ता काम सहकारीले गरेको छ ?
सामाजिक उत्तरदायित्व वहन गर्दै विभिन्न कार्यक्रम गर्दै आइरहेका छौं । स्थापना दिवसको अवसरमा वेगनास स्वास्थ्य चौकीलाई ५० हजार रुपैयाँ वरावरको सामान हस्तान्तरण गरेका छौं । विभिन्न विद्यालयमा स्टेशनरी तथा खेलकुदका सामान पनि वितरण गरेका छौं । क्यान्सर पीडित बिरामीलाई मनिपाल अस्पतालमा पुगेर उपचारमा सहयोग होस भनेर आर्थिक सहयोग गरेका छौं । रक्तदान कार्यक्रम पनि समय समयमा गर्दै आइरहेका छौं ।

सहकारी अभियानमा सहकारीको भुमिका के छ ?
नेपाल सरकारले लिएको सुखी नेपाली, समृद्ध नेपाललाई सहयोग पुगोस भनेर शेयर सदस्यलाई सस्तो व्याजदरमा कर्जा उपलव्ध गराउछौं । सहकारी मन्त्रालय तथा विभागले आयोजना गरेका विभिन्न कार्यक्रममा सहभागी हुन्छौं । राज्यले ल्याएका कुरालाई सहकारीको माध्यमबाट पनि सफल बनाउन सकिन्छ । कास्कीको सहकारी अभियान अन्तर्गत हुने हरेक गतिविधिमा हाम्रो सक्रिय सहभागिता छ ।

अन्त्यमा, के भन्न चाहनुहुन्छ ?
सहकारीलाई अहिलेको अवस्थासम्म ल्याउन सहयोग गर्नुहुने सम्पूर्णलाई धन्यवाद दिन चाहन्छु । आगामी दिनमा पनि यसैगरी सवैको साथ र सहयोगको अपेक्षा गरेको छु ।

educational
टिप्पणिहरु
Loading...
Education Fair