पोखरा २७ वैशाख
तमू प्ये ल्हु संघ केन्द्रिय समितिको आयोजनामा आजदेखि पोखरामा तीन दिने गुरुङ भाषा तथा लिपि प्रबद्र्धन तालिम सुरु भएको छ । पोखरा महानगरपालिकाको उपमेयरसँग महिला कार्यक्रम अन्तर्गतको आर्थिक सहयोगमा सो तालिम शुरु भएको हो । तालिमको एक कार्यक्रमका बीच पोखरा महानगरपालिकाका कार्यपालिका सदस्य राधिका शाहीले उद्घाटन गरिन् ।
सो अवसरमा बोल्दै उनले उपमेयरसँग महिला कार्यक्रम अन्तरगत महिलाहरुलाई क्षमता, व्यक्तित्व, नेतृत्व र उद्योग व्यवसायमा अघि बढाउन प्रेरित गर्दै आएको भन्दै यो तालिमले महिलाहरुलाई अन्य क्षमतासँगै आफनो भाषा लिपिलाई कसरी प्रबद्र्धन गर्न सकिन्छ भन्ने बारे सहयोग पुग्ने बताइन् । नेपाल अनेक भाषाभाषी र जातजातिको देश भएको भन्दै सबैले आफनो भाषालाई जोगाउन जरुरी रहेको उनको भनाई छ ।
कार्यक्रममा तमू प्ये ल्हु संघका केन्द्रिय अध्यक्ष हितकाजी गुरुङ, पूर्व अध्यक्षहरु ले.इन्द्रबहादुर गुरुङ र क्या.रुपबहादुर गुरुङ लगायतले तालिमको सफताको शुभकामना व्यक्त गरेका थिए । तालिम संयोजक एवम तमू प्ये ल्हु संघका केन्द्रिय महासचिव शान्ती गुरुङको अध्यक्षतामा सम्पन्न भएको तालिमको उद्घाटन कार्यक्रमको सञ्चालन केन्द्रिय कोषाध्यक्ष कञ्चन गुरुङले गरेकी थिइन् ।
यसैबीच तालिमको पहिलो दिन आज लिपि तथा तमू भाषाको पृष्ठभूमि विषयमा खडग गुरुङले प्रशिक्षण दिएका छन् भने भोलि दोस्रो दिन तमू भाषामा गाउँ ठाउँ पहिचान विषयमा कञ्चन गुरुङ, तमू क्युई र चों क्युई बीचको इतिहास तथा अन्तरसम्बन्ध विषयमा तेजबहादुर गुरुङ तथा भाषा लेखन तथा आदनप्रदान विषयमा शान्ती गुरुङले प्रशिक्षण दिने कार्यक्रम रहेको छ ।
यस्तै तालिमको अन्तिम दिन पर्सि तमू भाषा लेखन शैली सम्बन्धी बुद्धिप्रसाद गुरुङले प्रशिक्षण दिने कार्यक्रम रहेको तालिम संयोजक शान्ती गुरुङले जानकारी दिइन् । तालिममा तमू प्ये ल्हु संघका विभिन्न शाखा समितिहरु एवम विभिन्न तमू संघ संस्थाहरुमा आबद्ध ९० जना प्रशिक्षार्थीहरुको सहभागिता रहेको छ ।
Comments are closed.