आर्थिक आवाज
पोखरा, ३ माघ । पाल्पाली समाज पोखरा स्थापनाको २५ वर्ष पुगेको छ । समाजले रजतजयन्ती मनाउनेक्रममा माघ ५ गते शनिबार पोखरा सभागृहमा ‘सिटिजन फर्निचर पाल्पाली सांगीतिक साँझ तथा सम्मान कार्यक्रम–२०७५’ गर्ने भएको छ । कार्यक्रमको तयारी पूरा भएको बिहीबार आयोजित पत्रकार सम्मेलनमार्फत जानकारी दिइयो ।
कार्यक्रमका गठित विभिन्न उपसमितिले समेत तोकिएको जिम्मेवारी पुरा गरिसकेको समाजका अध्यक्ष कुलप्रसाद घिमिरेले जानकारी दिए । ‘कार्यक्रमलाई सभ्य र भव्यरुपमा सम्पन्न गर्नेछौं,’ उनले भने । पाल्पाको रहनसहन, मौलिक संस्कृति, कला, भेषभूषा लगायतको पहिचान गरी श्रव्य–दृश्य सामग्रीमार्फत् प्रदर्शन गरी हामी पाल्पालीहरु आफ्नो जन्मथलोलाई चिनाउन पनि कार्यक्रम सहयोगी हुने उनलेब बताए । ‘भोलिका दिनमा पोखरासँगै पाल्पाको थप पर्यटन प्रवद्र्धनमा कार्यक्रमले विकास गर्ने हामीले अपेक्षा गरेका छौं,’ उनले भने ।
कार्यक्रममा पाल्पाको ऐतिहासिक, सांस्कृतिक, धार्मिक तथा पर्यटकीयस्थलको श्रव्यदृश्य सामग्रीमार्फत झलक प्रदर्शन गरिनुका साथै पाल्पाको मौलिक संस्कृतिको रुपमा रहेका वालन, कौरा, सोरठी (मारुनी) नृत्य प्रदर्शन गरिने कार्यक्रम संयोजक अनन्त अधिकारीले जानकारी दिए । ‘पाल्पाली करुवा, ढाका तथा पाल्पाको पहिचान चुकाउनी, बटुक, हाँसको छोयला लगायत खानाका परिकारका स्टल समेत राखिनेछ,’ उनले भने ।
कार्यक्रममा पाल्पाली कला संस्कृतिको संरक्षण र प्रवद्र्धनमा योगदान पु¥याएकोमा नेपाल सरकार मन्त्रिपरिषद् पूर्व अध्यक्ष तथा सर्वोच्च अदालतका पूर्व प्रधानन्यायाधीश खिलराज रेग्मीलाई अभिनन्दन गरिनुका साथै पूर्व प्रहरी महानिरीक्षक कुवेरसिंह राना, महानायक राजेश हमाल, वरिष्ठ कलाकार नारायण रायमाझी, दुर्गा रायमाझी, बद्री पंगेनी, इन्द्र जिसीलाई सम्मान गरिने बताइएको छ । सम्मानित कलाकारहरुसहित पाल्पाली कलाकार नवीन पौडेल, जमुना राना, शान्ति डोटेल, दुर्गाराज पाण्डेको सांगीतिक प्रस्तुति रहनेछ ।
सांगीतिक साँझको अलावा सोही दिन साँझ पाल्पाको पर्यटन प्रर्वद्धनको लागि पाल्पाका २ नगरपालिका र ८ गाउँपालिकाका प्रमुख लगायतका जनप्रतिनिधिसँंग बृहत् छलफल कार्यक्रमसमेत छ । कार्यक्रमको शीर्ष प्रायोजनमा सिटिजन फर्निचर ट्रेड लिंक प्रालिले गरेकोछ । सहप्रायोजक एलजी डिजिटल साउण्ड एण्ड भिजन रहेको छ । बैंकिङ पार्टरनमा सिद्धार्थ बैंकले साथ दिएकोछ । पोखरा सभागृह हलमा शनिबार बिहान ११ बजेबाट कार्यक्रम सुरु हुनेछ ।
Comments are closed.