पोखरा
प्रोग्रेसिभ इन्जिनियरिङ एशोसिएसन नेपाल (पिन) गण्डकी प्रदेशको आकस्मिक रक्तदान कार्यक्रममा ९३ युनिट रगत संकलन भएको छ । कार्यक्रमका प्रमुख अतिथि नेकपा कास्की अध्यक्ष एवं गण्डकी प्रदेशका सांसद कृष्ण थापाले पहिलो रक्तदाता ई.अस्मिता तिवारीलाई ब्लड ब्याग हस्तान्तरण गरी रक्तदान कार्यक्रमको उद्घाटन गरेका हुन् ।
शनिबार बिहान ७ बजेदेखि ११ बजेसम्म भएको रक्तदान कार्यक्रममा पिन केन्द्रिय सदस्य ई.टेकबहादुर कटुवाल, ने.ई.य. गण्डकी प्रदेश अध्यक्ष आ.ई. बाबुराम भण्डारी लगायत पिनका ईन्जिनियरहरुको बाक्लो उपस्थिति थियो ।
लकडाउनको समयमा पूर्वनिर्धारित रक्तदानका कार्यक्रमहरु नहुने भएपछि क्षेत्रीय रक्तसञ्चार केन्द्र रामघाट पोखराको विशेष अनुरोधमा आफुहरुले रक्तदान कार्यक्रमको आयोजना गरेको संयोजक ई.सुदिप कोइरालाले जानकारी दिए ।
‘क्षेत्रिय रक्तसञ्चार केन्द्रबाट रगतको अभाव भएको सुचना आएसँगै हामी रक्तदान कार्यक्रमका लागि तयार भएका हौ’, उनले भने । उसो त पिनले वार्षिकरुपमै रक्तदान कार्यक्रमलाई निरन्तरता दिइँदै आएको छ । सामाजिक दुरी कायम रहने गरी रक्तदान कार्यक्रम गरिएको ई।कोइरालाले बताए । पिनका अध्यक्ष ई।महेन्द्र गोदारको अध्यक्षतामा सम्पन्न भएको कार्यक्रमको सञ्चालन सचिव ई. सुरेश तिमिल्सिनाले गरेका थिए ।
Comments are closed.