पोखरा, २३ चैत
पोखरा सभागृहचोकमा प्रधान कार्यालय रहेको युनाइटेड रेफरेन्स ल्याबोरेटरी प्रा.लि(युआरएल) दमौली शाखामा शनिबार निशुल्क स्वास्थ्य परिक्षण सम्पन्न भएको छ । सो अवसरमा साढे ७ सय जनाको निशुल्क थाइराइड तथा रगतमा हुने बोसो टिजी जाँच गरिएको हो ।
नयाँ वर्ष २०७६ को अवसरमा आयोजित शिविरमा मधुमेह, थाइराइड तथा हर्मोन रोग विशेषज्ञ डा. तारा कोइरालाले गुणस्तरहीन ल्याबका कारण स्वास्थ्य क्षेत्रमा अनेक चुनौती रहेको बताए । अनुहार हेरेर औषधी दिएर रोग निराकराण नहुने भएकाले अत्याधुनिक ल्याबहरु आवश्यक भएको उनले बताए । डा कोइरालाले भने, ‘समय समयमा स्वास्थ्य जाँच गरी समस्या नभए ढुक्क हुन र भए उचित उपचार गरी लामो जीवन बाच्न सकिन्छ ।उनले थाइराइड, मधुमेह जस्ता रोगले अनेक समस्या निम्त्याउने भएकाले बेलैमा उपचार गरी असह्य पीडा भोग्नबाट बाच्न र जीवन रक्षा गर्न आग्रह गरे । उनले भने, ‘कोलेस्ट्रोल, ब्लडप्रेसर, धूमपान, मधुमेह चिताका ४ खुट्टा हुन्, खुट्टाहरु हामीले शरीरमा बनायौं भने चाडै घाट नै पुगिन्छ ।’
सांसद कृष्णबहादुर श्रेष्ठ किसानले सरकार सबै क्षेत्रमा सुधार र समृद्धिमा लागेको जनाउँदै आफ्नो स्वास्थ्यबारे आफैं चनाखो हुन आग्रह गरे । उनले दमौली अस्पताललाई ५० बेडको बनाउने पहल भइरहेको जानकारी दिए ।
युआरएलका प्रबन्ध निर्देशक ठाकुरप्रसाद पन्तले प्रत्येक महिना यस्ता शिविर गरी ३५ हजारभन्दा बढीलाई सेवा दिइसकेको बताए । उनले सर्वसाधारणले गुणस्तरीय स्वास्थ्य सेवा पाऊन् भनी स्थापना कालदेखि नै शिविर, सचेतना जस्ता कार्यक्रमलाई जोड दिइएको उल्लेख गरे । कार्यक्रममा नेपाली कांग्रेस तनहुँका पूर्व सभापति रघुनाथ पौडेल, तनहुँ उद्योग वाणिज्य संघका प्रथम उपाध्यक्ष वैकुण्ठनाथ मिश्र, प्राइभेट अस्पताल एसोसियसन तनहुँ अध्यक्ष चूडामणि दाहाल, दमौली अस्पताल विकास समिति अध्यक्ष प्रदीप अधिकारी, व्यास २ का वडाध्यक्ष काशीराम श्रेष्ठ, वसन्तविनोद लगायतले बोलेका थिए ।
Comments are closed.