चिनु गुरुङ
उपमहासचिव पदका उम्मेदवार
पोखरा उद्योग वाणिज्य संघ, ३२औं महाधिवेशन
स्याङ्जाको दरौमा जन्मिएकी चिनुकुमारी गुरुङ बिगत २७ वर्षदेखि पोखरा १७ मुस्ताङचोकमा बस्दै आएकी छन् । २०४९ सालदेखि उनले निरन्तर व्युटीपार्लर व्यवसाय संचालन गर्दै आइरहेकी छन् । सफल महिला उद्यमी गुरुङका श्रीमान इन्डियन आर्मीका सु–मेजर हुन् । श्रीमानसँगै परिवारमा १ छोरा, १ छोरी र १ नातिनी छन् ।
गुरुङ ब्युटीपार्लर एण्ड एकेडेमी प्रा.लि. उनको व्यावसायिक संस्था हो । न्युरोडमा मुख्य कार्यालय रहेको एकेडेमीको पोखराको पृथ्वीचोक, भाटभटेनी, बगर, चिप्लेढुङ्गा तथा तनहुँको दुलेगौंडामा शाखा छन् । उनले आफ्नो व्यवसायमार्फत ४९ जनालाई प्रत्यक्ष रोजगारी दिन सफल छन् । धेरै महिलालाई उद्यमशील तथा आत्मनिर्भर बन्न प्रोत्साहन पनि उनले गर्दै आइरहेकी छन् । पोखरामा हाल सञ्चालनमा रहेका धेरै महिला तथा पुरुष व्युटिपार्लर उनकै उत्पादन हुन् ।
अति न्युन लगानीमा व्यवसाय सुरु गर्ने क्रममा हप्ता दिनसम्म पनि बोहोनी नहुँदाको पीडा आज पनि ताजै छ उनको मनमा । तर, उनी बिचलित भइनन्, धैर्यताका साथ अगाडि बढिरहिन्, संघर्ष गरिरहिन् । त्यो समयको धैर्यता र संघर्षले नै उनलाई अहिलेको स्थानमा ल्याएको हो, सफलताको शिखरमा पु¥याएको हो । उनले ३ हजार भन्दा धेरै महिलालाई सिप सिकाएकी छन् । बेरोजगारीलाई न्युनीकरण गर्न यसले महत्वपूर्ण भुमिका खेलेको छ ।
राष्ट्रिय तथा अन्तर्राष्ट्रिय विभिन्न तालिम तथा गोष्ठीमा सहभागी भएर प्राप्त गरेको ज्ञान आफ्ना विद्यार्थीलाई बाँडिरहन्छिन् गुरुङ । नेपाल सरकार एवं घरेलु तथा साना उद्योग कार्यालय मार्फत उद्यमशील विकास तालिम लिएकी छन् । भारतको मद्रासबाट ब्युटिसियन तालिममा डिप्लोमा कोर्ष तथा एडभान्स स्किन केयर कोर्ष भारतको पुनाबाट गरेकी छन् । थाइल्याण्डबाट हेयर एण्ड ब्रो कोर्ष गरेकी उनले सिटीइभिटीबाट लेभल टु स्किल टेस्ट लाइसेन्स प्राप्त गरेकी छन् । भारत, चीन, थाइल्याण्ड, मलेसिया, बंगलादेश, सिंगापुर, हङकङ, इन्डोनेसिया लगायतका देश उनले भ्रमण गरिसकेकी छन् ।
सौन्दर्य जगतमा ३० वर्षको लामो अनुभव उनीसँग छ । २ वर्ष पोखरा उद्योग वाणिज्य संघको महिला उद्यम विकास समितिको सदस्य भएर काम गरेकी छन् भने २ वर्ष संघको कार्य समिति सदस्य भएर काम गरेको अनुभव छ उनीसँग ।
व्युटीपार्लर व्यवसायी संघको सचिव भएर पनि उनले काम गरिसकेकी छन् । रेडियोमा ब्युटी पर्सनालिटी कार्यक्रम सञ्चालनको अनुभव पनि छ चिनुसँग । फरक क्षमता भएका विद्यार्थीको लागि सहारा ब्युटीपार्लर २०६८ सालमा स्थापना भएको छ । गरिब तथा जेहेनदार विद्यार्थीको लागि निःशुल्क तालिमको व्यवस्था उनले गरेकी छन् ।
हाल उनी महिला उद्यमी संघ नेपाल, कास्की शाखाको सदस्य हुन् । व्युटीपार्लर व्यवसाय संघ कास्कीको बरिष्ठ सल्लाहकारको भूमिका पनि छ । गण्डकी तालिम प्रदायक संघ (सिटिइभिटी) तथा ग्रामीण तालिम परिषद् केन्द्र (सिटिइभिटी) भिमादको सल्लाहकार पनि हुन् ।
लायन्स क्लब अफ पोखरा ब्युटी सिटीको संस्थापक अध्यक्ष हुन् भने हाल लायन्स क्लब इन्टरनेशनल डिष्ट्रिक्ट ३२५ बि १ नेपालको जोन चियरपर्सनको जिम्मेवारीमा छन् । लायन्ससँगै रोटरी, जेसिस लगायतका संस्थामा काम गरेको लामो अनुभव उनीसँग छ । उत्कृष्ट काम तथा सामाजिक योगदानकै कदर स्वरुप उनले विभिन्न पुरस्कार तथा सम्मान प्राप्त गरेकी छन् ।
व्यवसायसँगै सामाजिक क्षेत्रमा दैनिक सक्रिय छन् उनी । सञ्चारिका समूह पश्चिमाञ्चलमा अक्षयकोष स्थापना गरेकी छन् । अक्षयकोषको रकमबाट आउने ब्याजबाट क्रियाशील पत्रकार महिलालाई सम्मान तथा पुरस्कृत गर्ने व्यवस्था छ । घरेलु तथा साना उद्योग कार्यालयसँगको साझेदारीमा उद्यमशीलता सम्बन्धी १० दिने तालिम पनि प्रदान गरेकी छन् । लेखनाथ उद्योग वाणिज्य संघमार्फत लेखनाथमा निःशुल्क १ दिने सेमिनार गरेकी छन् ।
उनै चिनु गुरुङ निजी क्षेत्रको छाता संस्था पोखरा उद्योग वाणिज्य संघको आसन्न ३२औं महाधिवेशनमा उपमहासचिव पदमा उम्मेदवार बनेर प्रस्तुत भएकी छन् । समग्र उद्योगी व्यवसायीको हक तथा हितमा काम गर्ने उनको प्रतिवद्धता छ । महिला उद्यमीद्वारा उत्पादन गरिएका सामानको प्रवद्र्धन तथा बिक्रीको वातावरण बनाउन पहल गर्ने उनको उद्देश्य छ । व्यवसायीलाई कर तथा व्यवसाय सम्वन्धी अभिमुखीकरण कार्यक्रम गर्ने प्रतिबद्धता गरेकी गुरुङले आफू विजयी हुनेमा विश्वस्त रहेको बताउँछिन् । ‘महिला व्यवसायीको संख्या बढाउन पनि महत्वपूर्ण भुमिका खेल्नेछु,’ भन्छिन्, ‘उद्योगी तथा व्यवसायीसँग नजिक रहेर समस्या पहिचान गरी समाधान गर्नतर्फ लाग्ने मेरो प्रतिबद्धता छ ।’
Comments are closed.