सफल एक्स्पो पोखराको तयारी पूरा, २० वटा उद्योगका उत्पादन समावेश

पोखरा, ११ मंसिर । पोखरा प्रदर्शनी केन्द्र नयाँबजारमा आयोजना हुने ‘सफल एक्स्पो पोखरा साथमा तेस्रो मोवाइल मेला २०७५, पोखरा’को तयारी पूरा भएको छ । आयोजक संस्था पोखरा उद्योग वाणिज्य संघका अनुसार मंसिर १३ देखि २४ गतेसम्म आयोजना हुने एक्स्पोको गण्डकी प्रदेशका मुख्यमन्त्री पृथ्वीसुब्बा गुरुङले उद्घाटन गर्ने कार्यक्रम छ ।

एक्स्पोको उद्घाटनको दिन नजिकिँदै गर्दा तयारीका सबै काम सकिएको मंगलबार आयोजित पत्रकार सम्मेलनमा अध्यक्ष दामु अधिकारीले जानकारी दिए । ‘हामीले एक्स्पोका सबैजसो तयारीहरु सकेका छौँ, प्रदर्शनी केन्द्रमा रहने करिब ३ सयवटा स्टलहरुको बुकिङ भइसकेको छ, उद्घाटनसँगै यहाँ बस्तु तथा सेवाहरु प्रदर्शनीमा राखिनेछन्,’ उनले भने, ‘हामीले एक्स्पोलाई भव्य बनाउन कुनै कसर बाँकी राखेका छैनौँ ।’

मेला र महोत्सवमार्फत अर्थतन्त्र चलायमान बनाउन एवं उत्पादक र उपभोक्तालाई एउटै थलोमा भेट गराई उद्यमशीलता सृजना गर्नु एक्स्पो आयोजना गरिएको हो । यसैगरी, पोखरा लगायत सम्पूर्ण राष्ट्रको औद्योगिक, कृषिजन्य, हस्तकलाका उत्पादन, सूचना प्रविधि, शिक्षा, स्वास्थ्य, पर्यटन लगायत कृषिजन्य उत्पादनहरुलाई प्रवद्र्धन तथा बजारीकरणमा सघाउ पु¥याउनु तथा गण्डकी प्रदेश र खासगरी पोखराको ब्यवसाय बिस्तारको संभावनाको खोजीमा पनि एक्स्पो समर्पित रहेको आयोजक संस्थाको भनाई रहेको छ ।

MANASLU

यो पटक एक्स्पोमा पोखरा औद्योगिक क्षेत्रका २० वटा उद्योगहरुले आफ्ना उत्पादनबारे जानकारी दिन स्टल राख्दैछन् भने नेपाल पर्यटन वोर्ड एवं पोखरा पर्यटन परीषद र सहश्राब्दी पर्यटन विकास समितिको समन्वयमा यस क्षेत्रको पर्यटन प्रवद्र्धनको लागि विशेष स्टलहरु रहनेछन् । ‘पोखरालाई पर्यटनको मूख्य हब र पोखरा वरपरको क्षेत्रलाई सब हब बनाउँदै समग्र पर्यटन क्षेत्रको प्रवद्र्धन गर्न पनि हामीले यी स्टलहरु राखेका हौँ,’ संघका महासचिव अर्जुन पोखरेलले भने, ‘एक्स्पोलाई आफ्नो उद्देश्य अनुरुपको बनाउने काममा आयोजकबाट कुनै कमी हुन दिने छैनौँ ।’ एक्स्पोमा रहने मेड इन नेपाल पेभेलियन, विभिन्न राष्ट्रिय तथा अन्तर्राष्ट्रिय उत्पादन, दैनिक उपभोग्य खाद्यबस्तु र लत्ताकपडा, पुष्प प्रदर्शनी, हस्तकलाका सामग्री, अटो प्रदर्शनी, महिलाहरुका उत्पादनहरु, रेष्टुरेण्टहरुले पनि सहभागीहरुलाई थप सुविधा दिने उनले जनाए ।

एक्स्पोमा जोडिएका विभिन्न ब्राण्ड तथा औद्योगिक घरानाहरुको प्रदर्शनीले उद्यमशीलता वृद्धिको लागि थप टेवा दिने संघका बरिष्ठ उपाध्यक्ष नारायण कोइरालाले बताए । एक्स्पोमा रहने मोबाइल मेलामा हुने एक्सचेञ्ज अफर, नयाँ ब्राण्डका मोवाइलको उपलब्धताले पनि एक्सपोमा रौनकता थप्ने उनले जनाए ।

मोवाइल बिक्रेता संघ पोखराका अध्यक्ष शिवराज पहारीले आफ्नो मोवाइल साँट्न चाहनेहरुलाई चल्ने गरेको मोवाइलसहित आधिकारिक कागजपत्र लिएर आउन आग्रह गरे । लोकदोहोरी प्रतियोगिता, नेपालका ख्यातिप्राप्त व्याण्डहरुको सांगीतिक कार्यक्रम, लोकनृत्य, रत्यौली, विद्यालयस्तरीय एकल र सामूहिक नृत्य प्रतियोगिता, लोपोन्मुख साँस्कृतिक झाँकी र नाचहरुसहित हास्यव्यङ्ग्य कार्यक्रम एवं प्रवेश टिकटमा दैनिक पुरस्कारको व्यवस्था पनि एक्सपोको आकर्षण हुने आयोजकको अपेक्षा रहेको छ ।

पोखराको औद्योगिक घराना लक्ष्मी समूहको सफल ब्राण्ड टाइटल स्पोन्सर रहेको एक्सपोको पोखरा महानगरपालिका, पोखरा उपत्यका नगर विकास समितिको सहयोग, लक्ष्मी समूहको मूख्य प्रायोजन, नेपाल पर्यटन वोर्ड सहित आइएमई ग्रुपको प्रवद्र्धनमा एक्स्पो आयोजना हुन लागेको हो ।

एक्स्पोलाई हिमायलयन डिष्टिलरी प्रालि, गरिमा विकास बैंक, सगरमाथा इन्स्योरेन्स कम्पनी प्रालि, होटल लेक सोर, टुडे मिनिरल वाटर, हन्सराज हुलासचन्द्र सन्स, हरपल चामल, हिमालयन जनरल इन्स्योरेन्स प्रालि, गण्डकी टे«ड हाउसको पिजो मोटर्स, सगरमाथा इन्स्योरेन्स प्रालि, नेपाल टेलिकम, राष्ट्रिय वाणिज्य बैंक, पोखरा इन्टरनेट, फर्निचर ल्याण्ड, बबिन टेलरिङ एण्ड लेडिज कलेक्सन, बोटलर्स नेपाल तराई प्रालिको कोकाकोला, गृहलक्ष्मी ग्याँस कम्पनी प्रालिबाट विभिन्न विधा तथा नेपाल जनरल मार्केटिङ प्रालिको तर्फबाट हिरो ड्युट बम्बर उपहारको रुपमा प्रायोजन गरेका छन् ।

You might also like

Comments are closed.