लेखनाथ ।
हेल्लो वडाध्यक्षज्यू नमस्कार,
नमस्कार,
कता हुनुहुन्छ ?
म अहिले हस्पिटल छु ।
हस्पिटलमा किन हो र ?
मृगौला फेल भएर डायलसिस गराइरहेको एक जना बिरामी हुनुहुन्थ्यो लकडाउनमा गाडी पाउनु भएनछ, त्यसैले हस्पिटल ल्याएको ।
कोभिड—१९ का कारण उत्पन्न परिस्थिति पछि पोखरा महानगरपालिका वडा नं. २७ का अध्यक्ष पूर्णकुमार गुरुङको दिनचर्या आजकल बिरामीलाई अस्पताल लैजाने, विपन्न परिवारलाई खाद्यान्न जुराउने, लकडाउन कडाई गर्न सुरक्षा निकायसँग समन्वय गर्ने काममा बित्ने गर्दछ ।
उनलाई यतिखेल वडामा सञ्चालन हुने विकास निर्माणका योजनाको सम्झौता पछि कार्यान्वयनको अवस्थामा, समस्या आएमा समाधान, जनताका दैनिक सिफारिस, विभिन्न विवाद मिलाउने काममा व्यस्त हुनुपथ्र्यो तर कोरोनाको समस्याले त्यसका विरुद्ध महानगरले गरेका क्रियाकलापमा साथ दिने र वडामा त्यसको संक्रमण नहोस् भन्नेमा बढी ध्यान जाने गरेको छ ।
वडाध्यक्ष गुरुङले आफ्नो निजी कारलाई एम्वुलेन्स जसरी नै प्रयोग गर्दै, अहिलेसम्म १७ जना भन्दा बढी विरामीको उद्धार गरिसकेका छन् । वडामा कसैलाइै केही विमारले च्याप्दा र एम्बुलेन्स समेत नपाइने अवस्था आएपछि वडाध्यक्ष आफै कार लिएर बिरामीलाई पोखराका विभिन्न अस्पतालमा पुर्याउने र घर छाड्दिने काम गर्छन् । सुत्केरी हुन नसकेकादेखि मृगौलाको डायलसिस् जस्ता जटिल बिरामीलाई अस्पताल ल्याउने लैजाने गरेका गुरुङले जनताको पीडा बुझ्न पनि यस्ता बिरामीलाई सहयोग गरेपछि सजिलो भएको बताए ।
जनतालाई यस्तो विषम परिस्थितिमा पनि सहयोग नगर्नेहो भने के को जनप्रतिनिधि हुँ भनेर हिड्ने त ? वडाध्यक्ष गुरुङ भन्छन्, ‘आखिर तिनै जनताले भोट हालेर जिताएका हुन क्यारे ।’ उसो त वडाध्यक्ष गुरुङ महानगरबाट फिफ्टी÷फिफ्टीका योजना सवैभन्दा धेरै कार्यान्वयन गर्ने वडाध्यक्ष पनि हुन् ।
वडाध्यक्ष गुरुङको कामको सामाजिक संजालमा समेत प्रसस्त प्रशंसा भएको छ । नागरिक समाजका अगुवा देखी वडावासीले गुरुङको कामले अप्ठ्यारो अवस्थामा जनप्रतिनिधि जनता प्रति कति उत्तरदायी हुन्छन् भन्ने प्रमाणित समेत भएको बताएका छन् ।
वडाध्यक्ष गुरुङलाई राहत बितरणमा महानगरको प्याकेज बाहेक स्थानीय बेदराज न्यौपाने, राइजिङ स्टार युवा क्लबका अध्यक्ष विष्णु प्रसाद गुरुङ र राधा माधव समिति लेखनाथले पनि सहयोग गरेका छन् ।
वडाले ५ सय ७६ जनालाई राहत बाड्ेको थियो भने राइजिङ स्टारले २५ जना, स्थानीय बेदराज न्यौपानेले ३५, राधा माधव लेखनाथ समितिले १५ जनालाई राहत सहयोग गरेका थिए ।
वडाध्यक्ष गुरुङले अब यो थपिएको लकडाउनको समयमा बास्तविक विपन्नहरुलाई समस्या पर्ने भन्दै, राहतका लागि बेलैमा सोच्नु पर्नेमा जोड दिए । ज्यानै जान्छ भन्ने थाह हुँदा हुँदै पनि लकडाउन उल्घंन गर्ने, मुख्य सडक बाहेकका प्राय सवै सडकमा मान्छेको भिडभाड हुनेगरी हिडडुल गर्ने प्रवृत्तिले समस्या आउन सक्ने भन्दै, आफ्नो टोलमा आफैले कडा गर्न उनले स्थानीयवासीलाई आग्रह गरेका छन् ।
Comments are closed.