काठमाडौं । सरकारले आगामी आर्थिक वर्षको बजेट सार्वजनिक गरेदेखि नै घट्न थालेको सेयर बजार मार्केट निरन्तर ओरालो लाग्दै आएको छ । साताको पाँचौ दिनसम्म आइपुग्दा पनि सेयर बजारको ओरालो यात्रा रोकिएको छैन् ।
बजेटले नेप्सेमा सकारात्मक सूचक देखा पर्ने आशा गरिए पनि सरकारको बजेटले लगानीकर्ताहरुमा उत्साह ल्याएन । साताको पाँचौ अर्थात् कारोबार हुने अन्तिम दिन आज सेयर बजार परिसूचक नेप्से ३३ दशमलव ७६ अंकले घटेर दुई हजार ७८ दशमलव ७६ विन्दुमा झरेको छ ।
आज सबै समूहको सेयर ओरालो लागेकोमा बीमा समूहको सेयर उच्च अंकले घटेको छ । आज दुई सय २६ वटा कम्पनीको ३८ लाख ४८ हजार कित्ता सेयर किनबेच हुँदा कुल एक अर्ब ३० करोड ७३ लाख रुपैयाँमा कारोबार भएको छ । आज सबैभन्दा धेरै एनआईसी एसिया बैंकको ६ करोड २३ लाख रुपैयाँको सेयर किनबेच भएको छ ।
आज वाणिज्य बैंक समूहको सूचक २४ दशमलव सात अंकले घटेर १४ सय ४७ दशमलव ५० अंकमा पुगेको छ । विकास बैंक समूहको सूचक ५६ दशमलव ६८ अंकले घटेर तीन हजार ६ सय ६ दशमलव ७७ अंकमा पुगेको छ ।
त्यस्तै, जलविद्युत् समूहको सूचक पनि ३१ दशमलव ९३ अंकले घटेर २४ सय २५ दशमलव ७६ अंकमा झरेको छ । निर्जीवन बीमा समूहको सूचक एक सय ६७ दशमलव १५ अंकले घटेर आठ हजार पाँच सय ३४ दशमलव ६७ अंकमा पुगेको छ । जीवन बीमा समूहको सूचक पनि दुई सय ३६ दशमलव ६५ अंकले घटेर नौं हजार आठ सय ६१ दशमलव ९२ अंकमा पुगेको छ ।
ट्रेडिङ, होटेल तथा पर्यटन, फाइनान्स, उत्पादनमूलक, अन्य, लघुवित्त, सामूहिक लगानी कोष र लगानी समूहहरूको सूचक पनि घटेका छन् । आज उपकार लघुवित्त वित्तीय संस्थाको प्रतिकित्ता सेयर मूल्य १० प्रतिशतले बढेर १७ सय ५७ रुपैयाँ १० पैसामा प्रतिकित्ता सेयर कारोबार भएको छ भने, नेपाल इन्भेस्टमेन्ट बैंकको संस्थापक सेयरतर्फ प्रतिकित्ता सेयर मूल्य नौ दशमलव ५६ प्रतिशतले घटेर दुई सय ८९ रुपैयाँ ४० पैसा अन्तिम मूल्यमा प्रतिकित्ता सेयर कारोबार भएको छ ।
Comments are closed.