अटोमोबाइल व्यवसायीहरुको छाता संस्था नाडा अटोमोबाइल एसोसिएसन अफ नेपाल (नाडा)को ४७औं साधारणसभा पुस २० गते शुक्रबार हुँदैछ । साधारणसभाले नयाँ कार्यसमिति सर्वसम्मत घोषणा गर्नेछ । साधारणसभासँगै नाडाका बर्तमान अध्यक्ष ध्रुव थापाले आफ्नो कार्यकाल पुरा गर्नेछन् । यसैक्रममा नाडा अध्यक्ष थापासँग आर्थिक आवाजले गरेको कुराकानीः
आगामी कार्यकालका लागि नाडामा सर्वसम्मत नयाँ कार्यसमिति चयन गर्न सफल हुनुभएको छ । सहमति कसरी सम्भव भयो ?
आगामी कार्यकालका लागि नाडाको नेतृत्व सर्वसम्मत बनाउन सफल भएका छौं । यसका लागि हामीले गृहकार्य पनि धेरै गरेका थियौं । करिब ३÷४ महिना अगाडिबाट नै पहलकदमी गरिरहेका थियौं । धेरै मिटिङ बस्यौं । अध्यक्षका लागि आकांक्षी साथीहरुसँग कुरा ग¥यौं । अहिलेको अवस्थामा व्यवसायीका बीचमा चुनाव गर्नु हुँदैन मिलेर जानुपर्छ भनेर अगाडि बढ्यौं । यसले साथीहरुलाई पनि दवाव सृजना भयो । चुनाव गराउन पनि धेरै च्यालेन्जिङ नै थियो । व्यवसायीहरु कठिन परिस्थितिमा भएको समयमा ३ जना आकांक्षी नै अगाडि बढ्दा अप्ठ्यारो हुन्थ्यो । देशभरबाट सबै व्यवसायी आउन पनि गाह्रो नै हुन्छ । आउनुभएकाहरुको व्यवस्थापनका लागि पनि महंगो खर्च नै लाग्छ । उम्मेदवारहरुलाई पनि धेरै खर्च लाग्थ्यो । उहाँहरुले पनि सोच विचार गर्नुभयो सबै कुरा । सबै साथीहरुको दवाव पनि रह्यो । धेरै प्रयास पछि हामी सर्वसम्मत रुपमा नेतृत्व तथा कार्यसमिति चयन गर्न सफल भयौं । यसले व्यवसायी बीचमा एकताको सन्देश पनि दिएको छ । मिलेर जादा व्यवसायीमा पनि उत्साह छाएको छ ।
आंकाक्षीहरुबीच कसरी सहमति जुट्यो ?
म अध्यक्ष हुने समयमा चुनाव नै भएको हो । धेरै संघ संस्थाको नेतृत्व गरिसकेको हुनाले चुनावको समयमा जे भएपनि पछि सबै व्यवसायीलाई सम्हालेर अगाडि बढ्न सफल भएँ । अहिले सबै व्यवसायी मिलेर सरकारसँग लविङ गर्नुपर्ने समयमा व्यवसायी हामी गुटमा छुट्टिएर पक्ष विपक्ष बनेर चुनावमा गएको भए राम्रो सन्देश पनि जाने थिएन । काम गर्ने वातावरण पनि असहज हुन्थ्यो । व्यावसायिक एकता बनाउनका लागि नाडमा सहमतिको लागि दबाब बढेको हो । अध्यक्षका आकांक्षीहरुको कुरा पनि हामीले धेरै पटक सुन्यौं । पछि चुनाव लड्नुपर्छ भने अहिले नै लड्ने भन्ने खालका कुरा पनि नआएको होइन । यसको उपाय के छ भन्ने सोच्यौं । अहिले छोड्नेले अर्को कार्यकाल नेतृत्व गर्ने भन्ने निर्णयका साथ सहमति ग¥यौं । अब नाडाको अध्यक्ष करण चौधरी बन्ने र त्यसपछि विधान संशोधन गरेर वरिष्ठ उपाध्यक्ष आकाश गोल्छा बनाउने र अर्को कार्यकाल आकाश गोल्छा स्वतह अध्यक्ष हुने व्यवस्था हुनेछ ।
अटोमोबाइल व्यवसाय अहिले कस्तो अवस्थामा छ ?
सरकारले ल्याएका विभिन्न नीति नियमले अटोमोबाइल व्यवसायमा चुनौती थपिएको छ । अहिले अटो मोबाइल व्यवसाय धरासायी अवस्थामा नै छ । केही सुधारोन्मुख भएपनि सरकारले नीति नियमलाई पुनर्मूल्याङकन नगर्दासम्म पहिलाको अवस्थामा जान सक्ने अवस्था छैन । राष्ट्र बैंकले ल्याएका नीति नियम, सरकारले ल्याएका नीति नियमका कारण अटोमोबाइल धेरै अप्ठ्यारो अवस्थामा छ । हामी विषम परिस्थितिकै बीचमा अगाडि बढेका छौं ।
अहिले भन्सार नाकाबाट खुलम खुल्ला रुपमा स्पेयर पार्टसहरु आयात भइरहेको छ । भारतीय गाडीहरु खुलम खुल्ला रुपमा नेपाल भित्रिएर यही चलाउन पाइरहेको अवस्था छ । यसले नेपालको मार्केटलाई अप्ठ्यारो बनाएको छ । चोरी पैठारीबाट स्पेयर पार्टस आयात हुँदा जेन्युन व्यवसायी मारमा पर्नुभएको छ । अटो व्यवसायीका लागि यो मुख्य चुनौती बनेको छ । यसलाई नियन्त्रण गर्नु आवश्यक छ । मैले पनि यस विषयमा धेरै लविङ गरेँ तर अहिलेको समयमा नीति नियमका लागि धेरै लड्नुप¥यो । अबको नेतृत्वले त्यसतर्फ पनि ध्यान दिनुपर्छ । मेरो पनि मार्गनिर्देशन र साथ रहन्छ ।
अटो व्यवसायका सन्दर्भमा सरकारको नीतिलाई सकारात्मक मान्न सकिदैन ?
जहिलेसम्म अटोमोबाइललाई आवश्यकताको वस्तुका रुपमा क्याटागोराइज गरिदैन तबसम्म हाम्रो दबाब अभियानलाई छोड्न हुँदैन । अहिलेको बजेटमा केही सार्थकता भने पाएको छ । साना सिसिका गाडीलाई एक खालको प्राथमिकता दिएर ठुला सिसिका गाडीलाई कर बढाइएको छ । यसमा चाही के लाग्छ भने सरकारले पनि बुझ्न थालेको छ कि आवश्यकताको वस्तु हो भनेर । सानो सिसिका गाडी तथा मोटरसाइकललाई भन्सार दर तथा अन्तशुल्क बढाउनु हुँदैन भन्ने मान्यतामा सरकार गएको छ । इभिमा पनि सहुलियत दिएको छ । यसलाई सकारात्मक नै मान्नुपर्छ । राज्यको अर्थतन्त्रमा महत्वपूर्ण योगदान गर्न सफल यो व्यवसायलाई राज्यले अझै पनि प्राथमिकतामा राख्न सकेको छैन जुन दुःखको कुरा हो । गाडी अति आवश्यक चिज हो भन्ने कुरा पोलिसीगत रुपमा नै ल्याउन सक्यौं भने अटोमोबाइल व्यवसायीलाई केही राहत हुन्छ । फोर ह्विलर भेइकलमा पनि सेल्स बढ्ने अवस्था आउँछ । भारतीय या चाइनिज मूल्यमा गाडी आउन थाल्यो भने फोर ह्विलर चढ्नेको संख्या धेरै बढ्छ । त्यो अवस्थामा नेपाल पुग्नुपर्छ । सरकारलाई पनि फाइदा नै हुन्छ । कम बिक्री गरेर धेरै राजस्व उठाउनु भन्दा धेरै बिक्री गरेर धेरै राजश्व उठाउँदा फाइदा हुन्छ ।
नाडाको अध्यक्ष निर्वाचित भएर कार्यकाल सम्पन्न गर्दै हुनुहुन्छ । तपाईंको नेतृत्वमा नाडाको २ वर्षे कार्यकाल कस्तो रह्यो ?
मेरो कार्यकालको समय जटिल नै रह्यो । जटिल परिस्थितिलाई सामना गरेर अगाडि बढ्यौं । नाडाको उचाई र गरिमा बढाउन मेरो कार्यकालको महत्वपूर्ण रह्यो । हरेक सरकारी निकाय, मन्त्रालय लगायतका स्थानमा नाडा नचिन्ने कोही छैन । नाडालाई सरकारले पनि प्राथमिकतामा राख्न सुरु गरिसकेको छ र हाम्रो कुरा सुन्छ । पहिलेका कमि कमजोरीलाई सुधार गरेर नाडा सचिवालयलाई व्यवस्थित बनाएका छौं । सदस्यतालाई डिजिटलाइज गरेका छौं । सबैको बीचमा साथित्व तथा भातृत्वको भावना विकास भएको छ ।
विषम परिस्थितिबीच नाडा अटो शो सम्पन्न गर्नुभयो । अटो शोको प्रभाव कस्तो देखिएको छ ?
अप्ठ्यारो परिस्थितिमा पनि हामी अटो शो गर्न सफल भयौं, जुन सकारात्मक कुरा हो । समग्र अटोमोबाइल क्षेत्रका लागि अटो शो कोशेढुङ्गा सावित भयो । यसले अटोमोबाइल क्षेत्रका साथै देशको आर्थिक गतिविधिलाई नै चलायमान बनायो । सरकारले अटोमोबाइल क्षेत्रको राजस्वमार्फत केही राहत महसुस गरेको छ । अटोमोबाइल क्षेत्रमा उत्साह थपिएको छ ।
नाडाले स्किल डेभलपमेन्टका कार्यक्रम पनि सुरु गरिसकेको छ । यो कार्यक्रमको उद्देश्य के हो ?
नेपालभरका अटो सेक्टरमा स्किल डेभलपमेन्टका कार्यक्रम गर्ने उद्देश्यका साथ नाडामा स्किल डेभलपमेन्ट युनिट नै खडा गरेका छौं । स्विजरल्याण्डको एक एनजिओसँगे सहकार्यमा हामीले काम गरेका हौं । अहिले बागमती र लुम्बिनी प्रदेशमा स्किल डेभलपमेन्टको काम शुरु गरिसकेका छौं । टेक्निसियन, सेल्स लगायत काम गर्ने स्किल्ड मेनपावर बाहिरिएसँगै अटोमोबाइल क्षेत्रमा पनि समस्या परेको छ । त्यसलाई परिपूर्ति गर्न यसले महत्वपूर्ण भुमिका खेल्नेछ । रोजगारीका क्षेत्रमा पनि यसले सहयोग पु¥याउने छ । यसले हाम्रा लागि मात्र नभई देशका लागि पनि स्किल्ड मेनपावर उत्पादन गर्छ ।
प्रदेश च्याप्टरहरुसँगको सहकार्य कस्तो रुह्यो ?
नाडाले बिगतदेखि नै प्रदेशहरुसँग समन्वय गर्दै आएको छ । अहिले पनि निरन्तर नै छ । प्रदेशमा कार्यक्रमहरु गर्न हामीले केन्द्रबाट पनि सहयोग गर्दै आएका छौं । स्थायी संरचना बनाउनु पर्दा पनि नाडाले सहयोग गरेको छ । हामीले मापदण्ड नै बनाएका छौं । प्रदेशलाई छुट्टै अधिकार प्रदान गर्नका लागि विधान संशोधन कमिटि पनि बनाएका थियौं । प्रदेशलाई अझै बलियो बनाउन यसमा विभिन्न बुँदा समेटेर यो अधिबेसनमा पेश गर्ने भन्ने थियो । तर अझै छलफल गरौं भन्ने कुरा आएको छ । अर्को कार्यकालमा पास गर्ने गरेर हामीले लगेका छौं । सबै प्रदेश र ३२ जिल्लामा अटोमोबाइल एसोसिएसन गठन भएका छन् । ती सबै नाडामा समेटिएका छैनन् । ती एसोसिएसनलाई नाडासँग जोड्नु जरुरी छ । जिल्ला र प्रदेशगत संरचनाको मोडालिटीमा लैजाने हिसाबमा विधान संशोधनको प्रारुप तयार भएको छ ।
व्यवसाय सुधार हुनेमा आशावादी हुन सकिन्छ ?
अहिले अटो व्यवसायी निरास तथा हतोत्साही हुनुहुन्छ । व्यवसायीहरु पलायन भएको अवस्था थियो । अहिले केही सुधार हुन लागेको देखिएर आशा भने पलाएको छ । व्यवसायमा उतार चढावहरु आइरहन्छन् धैर्य भएर सामना गर्नुपर्छ । केही समयपछि राम्रो हुन्छ ।
अन्त्यमा के भन्नुहुन्छ ?
२ वर्षे कार्यकालमा साथीहरुले मलाई धेरै सहयोग गर्नुभएको छ । म साथीहरुप्रति आभारी छु । नाडाको इतिहासमा पहिलो पटक मोफसलको क्षेत्रबाट मलाई अध्यक्षमा निर्वाचित गर्नुभएको हो । पक्ष, विपक्ष नभनी सबैलाई समेटेर हामीले कार्यकाल पुरा ग¥यौं । हामीभित्र कुनैपनि मतभेद रहेन । नयाँ आउने नेतृत्वले पनि सबैलाई समेटेर अगाडि बढ्न सुझाव दिन चाहन्छु ।
Comments are closed.