नाडाको आगामी कार्यकालका लागि अध्यक्षमा सिजी होल्डिङसका कार्यकारी निर्देशक करण चौधरी सर्वसम्मत निर्वाचित भएका छन् । अध्यक्षका उनको मात्रै मनोनयन परेसँगै सर्बसम्मत नेतृत्व चयन सफल भएको हो । शुक्रबार सम्पन्न ४७औं साधारण सभाले उनको नेतृत्वमा सर्बसम्मत नयाँ कार्यसमिति घोषणा गरेको हो । यसैक्रममा चौधरीसँग उनको आगामी योजना लगायत समसामयिक विषयमा गरिएको कुराकानीः
नाडाको अध्यक्षमा सर्बसम्मत निर्वाचित हुनुभएको छ । सबैले तपाईंलाई अध्यक्ष स्वीकार्ने अवस्था कसरी बन्यो ?
मेरो कारणले भन्दा पनि नाडामा चुनाव नचाहने साथीहरुको मत बढी भएकाले सहमति गर्न सफल भएका हौं । समय, परिस्थिति र सबै साथीहरुको चाहनाले नै सहमति सम्भव भएको हो । मलाई अध्यक्षमा सर्बसम्मत बनाउने सम्पूर्ण साथीहरुप्रति आभारी छु ।
यो सहमतिलाई कसरी लिनुभएको छ ?
सहमति भनेकै चुनौती हो । पदका लागि सहमति जुट्यो तर आगामी दिनमा सहमति र एजेण्डामा कसरी गेम रच्ने भन्ने कुरा आगामी २ वर्षको कार्यकालले निर्धारण गर्नेछ । सबैलाई समेटेर कार्यकाल सफल बनाउन सक्दा त्यो सहमतिले पनि सार्थकता पाउनेछ । अब म पनि सहमतिको भावना अनुसार अगाडि बढ्नेछु । सबै साथीहरुलाई समेट्नेछु । टिमको सहमति भनेकै हाम्रो एजेन्डामा हो । त्यही एजेन्डालाई आत्मसात गरी व्यावसायिक हितमा काम गर्नेछौं । पलायन हुने अवस्थामा पुगेका व्यवसायीलाई कसरी जोगाउने भन्नेमा हामी केन्द्रित रहनेछौं ।
सहमतिमा अध्यक्ष निर्वाचित भएसँगै चुनौती बढेको महसुस गर्नुभएको छैन ?
मलाई पहिलो चुनौती मनोनयनको दिनमा थियो जहाँ अध्यक्षसहित १७ जना छान्नुपर्ने थियो । सबै टिमबाट हामीले सहमति जुटाउनुपर्ने थियो । सहमति जुटाउन सफल पनि भयौं । यसलाई सबै व्यवसायीको जितका रुपमा हेर्न सकिन्छ । अध्यक्ष पद आफैमा चुनौतीपूर्ण नै मान्नुपर्छ । समय र परिस्थिति पनि चुनौतीपूर्ण नै छ । चुनौतीको सामना गर्दै सकारात्मक सोचका साथ हामी संस्थालाई सवल र सक्षम बनाउनेछौं ।
तपाईंको प्रमुख प्राथमिकता कुन काममा रहनेछ ?
बिजनेशका हिसाबले भेन्टिलेटरमा नै पुगिसकेका व्यवसायीलाई बचाउनु मेरो पहिलो दायित्व हो । दोस्रो कुरा भेन्टिलेटरमा पुग्ने अवस्थामा रहनुभएका व्यवसायीलाई बचाउने हो । जो डिक्लेयर डेडको अवस्थामा हुनुहुन्छ उहाँहरुलाई रिभाइभ कसरी गर्न सकिन्छ त्यो मेरो तेस्रो दायित्व हो । यो हिसाबमा फोकस गरेर म अगाडि बढ्ने विचारमा छु । काम कसरी गर्न सकिन्छ, कसरी गर्न सकिदैन भन्ने कुराको निश्चित गरेर हामी कार्ययोजना नै बनाउनेछौं ।
व्यावसायिक समस्या समाधान गर्न र नीतिगत सुधार ल्याउन सरकारलाई कसरी दबाब दिनुहुन्छ ?
अहिले चलिरहेको छ कि इभीमा कर बढ्ने भन्ने कुरा । इभीमा कर बढाइयो भने अटो सेक्टरलाई धरातलभन्दा पनि तल पु¥याउँछ । अहिले चलायमान भनेको इभी बिजनेश हो । इभी बिजनेश पनि तल गयो भने धेरैको व्यालेन्ससिट बिग्रनेवाला छ । आयातकर्तामात्र होइन पार्टस् व्यवसायीलाई पनि संरक्षण गर्नुपर्ने छ । गाडीहरु नचलेर रिपेयरमा जान सकेका छैनन् । यी सबै मुद्धालाई समग्र रुपमा समेट्न सरकारसँग बसेर सुमधुर वातावरणमा कुराकानी गर्नेछौं । वार्ताबाट निकास नआएमा घुर्कि लगाएर हुन्छ कि झगडा गरेर हुन्छ म काम गरेरै छोड्ने छु ।
अबको अटो बजार कस्तो रहने अनुमान गर्न सकिन्छ ?
अब आउँदो बजारको निर्धारण करले गर्नेछ । मौद्रिक नीतिको अर्धवार्षिक समिक्षामा पनि यो कुरा आउनेवाला छ । हामी आगामी बजेटमा आउने करका बारेमा सुझाव दिनेछौं । त्यो बेलाको करको इम्प्याक्ट भनेको मेरो स्कोर कार्ड नै हो । कत्तिको इम्प्याक्ट गर्न सक्छु वा सक्दिन भनेर चुनौती रहन्छ । अटो क्षेत्रको सकारात्मक सुधारका लागि बाध्य बनाउने गरी नीति ल्याउन हामी सरकारलाई बाध्य पार्नेछौं ।
प्रदेश च्याप्टरहरुसँग कसरी सहकार्य गर्नुहुन्छ ?
प्रदेश च्याप्टरका साथीहरुसँग म सधैं नजिक छु । प्रदेशलाई बलियो बनाउन जरुरी छ । देशको संरचना पनि प्रादेशिक छ । देश प्रदेशको संरचनामा गएपछि नाडा पनि जानुपर्छ भनेर हामी अगाडि बढेका छौं । केन्द्र भनेको पोलिसी लेवलको कुराका लागि हो । केन्द्रले पोलिसी ड्राइभ गर्ने हो जो सरकारको केन्द्रसँग बसेर समन्वय गरेर पोलिसी चेन्ज गराउन सकिन्छ । त्यो बाहेक अरु सबै काम प्रदेशले गर्ने हो । प्रदेश बलियो भयो भने केन्द्रलाई सजिलो हुन्छ । प्रदेश बलियो भएन भने त्यहाँका व्यवसायीहरु पनि केन्द्रसँगै बढी आशावादी बन्ने अवस्था आउँछ । प्रदेशबाटै सबै काम हुने अवस्था हामी सिर्जना गर्नेछौं । पहिला पहिला नाडालाई कसरी बलियो बनाउने भन्ने सोच हुन्थ्यो । मेरो उद्देश्य भनेको प्रदेशलाई कसरी बलियो बनाउने भन्ने रहन्छ । प्रदेशलाई बलियो बनाउन सकियो भने नाडा अटोमेटिक बलियो हुन्छ ।
नाडामा साना व्यवसायीदेखि ठूला घरानाहरुको आबद्धता छ । सबैको भावना कसरी समेट्नुहुन्छ ?
म सबैको विश्वास, आशा र भरोसाले अध्यक्ष बन्दै छु । यो विश्वास, आशा र भरोशालाई नटुटाइकन अगाडि बढ्नेछु । यही नै मेरो मुख्य उद्देश्य हुनेछ । नाडा पहिला आयातकर्ताको मात्र हुन्थ्यो अहिले पार्टसको मात्र भयो भन्ने आवाज पनि आउने गरेको छ । हामीले के रियलाइज गर्नुपर्छ भने पार्टस् भनेको पनि अटोमोबाइल नै हो । लुव्रिकेन्ट्स, टायर, ब्याट्री, गाडी सबै अटोमोबाइल सेक्टरका विभिन्न पार्ट हुन् । एउटा गाडीमा यी सबै चिज जोडिएको हुन्छ । एउटा गाडीमा औसतमा ३० हजारभन्दा बढी पार्ट प्रयोग हुन्छ । नाडामा त्यही रेसियोमा हे¥यौं भने २७ सय सदस्य पार्टसको हुनु ठुलो कुरा जस्तो लाग्दैन । एकाग्र रुपमा अगाडि बढ्नुभन्दा व्यालेन्समा राख्नका लागि कहि न कहि चुनौती पनि आवश्यक हुन्छ । दुवैतिरबाट ब्यालेन्समा आउनुपर्ने हुन्छ । म इम्पोटर पनि हो । पार्टस व्यवसायी पनि हो । म लुब्रिकेन्ट्सको पनि डिभिजन हेड हो । मैले निष्पक्ष भएर पार्टस, लुव्रिकेन्ट्स, गाडी सबैलाई हेर्नुपर्छ । सबै व्यवसायको अनुभव भएकाले पनि यसमा सहज हुनेछ भन्ने मलाई लाग्छ । सबैलाई समेट्न म सफल हुनेछु ।
Comments are closed.