पोखरा । नेपाल इन्स्योरेन्स प्रोफेसनल सोसाइटी (निप्स) पोखरा च्याप्टरले आफ्नो स्थापना दिवस मनाएको छ । विभिन्न कार्यक्रम गरी स्थापना दिवस मनाउने सन्दर्भमा निप्सले फुटसल प्रतियोगिता आयोजना गरेको छ । शुक्रबार प्रतियोगिताको उद्घाटन गरिएको छ ।
स्थापना दिवसको अवसरमा आयोजित फुटसल प्रतियोगिताको उद्घाटन कार्यक्रममा बोल्दै बक्ताहरुले बीमा क्षेत्रको विकास तथा प्रवर्द्धन अभियानमा निप्सको योगदान महत्वपूर्ण रहेको बताए । कार्यक्रममा बोल्दै प्रमुख अतिथि नेपाल बीमा प्राधिकरण गण्डकी प्रदेशका कार्यालय प्रमुख केशवप्रसाद दाहालले बीमाको प्रचारप्रसारमा निप्ससँग सहकार्य गरी प्राधिकरण अगाडि बढिरहेको बताए । ‘आगामी दिनमा पनि निप्ससँग निरन्तर सहकार्य हुनेछ,’ उनले भने ।
निप्स पोखरा च्याप्टरका अध्यक्ष बद्रिनाथ पौडेलको अध्यक्षतामा आयोजित कार्यक्रममा निप्स पोखरा च्याप्टरका पूर्व अध्यक्षहरु सुनयना पालिखे, कविराज पौडेल, सर्भेयर एसोसिएसन गण्डकीका संयोजक सुरेन्द्र गोदार लगायतले बीमाका सन्दर्भमा केन्द्रित रहेर धारणा राखेका थिए । कार्यक्रमको सञ्चालन सचिव छविलाल पौडेलले गरेका थिए ।
फुटसल प्रतियोगिताको उद्घाटन खेल शुक्रबार सुरु भएको छ भने बाँकी खेल शनिबार हुने निप्स पोखरा च्याप्टर कार्यसमिति सदस्य तथा कार्यक्रम संयोजक गणेश धमलाले जानकारी दिए ।
Comments are closed.