नेपाल हेभी इक्विपमेन्ट व्यवसायी महासंघको तेस्रो महाधिवेशन वैशाख १८ गते शुक्रबार काठमाठौंमा हुँदैछ । महाधिवेशनको पूर्व सन्ध्यामा महासंघका वरिष्ठ उपाध्यक्ष उमाकान्त शर्मासँग गरिएको संक्षिप्त कुराकानीः
नेपाल हेभी इक्विपमेन्ट व्यवसायी महासंघको तेस्रो महाधिवेशनकोे तयारी कस्तो छ ?
नेपाल हेभी इक्विपमेन्ट व्यवसायी महासंघको तेस्रो महाधिवेशन यही वैशाख १८ गते हुँदैछ । हामी तयारीमा जुटेका छौँ र देशभरि जानकारी पु¥याएका छौँ । कानून, न्याय तथा संसदीय मामिला मन्त्री अजय कुमार चौरसियाको प्रमुख आतिथ्यतामा महाधिवेशनको उद्घाटन कार्यक्रम हुनेछ । महासंघसँग आबद्ध ३५ संस्था छन् र ७७ वटै जिल्ला समेट्ने योजनामा हामी छौं । तयारी अन्तिम चरणमा पुगेको छ ।
महाधिवेशनमा के विशेष योजना छ ?
बिगतका कामका समिक्षासहित नयाँ योजना बनाउन महाधिवेशनले विशेष भूमिका खेल्नेछ । यस पटक पुराना व्यवसायीसहित नयाँ व्यवसायीहरूलाई पनि संगठित गर्ने र नयाँ नेतृत्व चयन गर्ने योजनामा हामी छौं । हामी सर्वसम्मत रुपमा सबैलाई मिलाएर नेतृत्व चयन गर्ने प्रयासमा छौं ।
आर्थिक मन्दीको समस्याले हेभी इक्विपमेन्ट व्यवसायमा कस्तो प्रभाव पारेको छ ?
व्यापार व्यवसायमा ठूलो मन्दी आएको छ । निर्माण क्षेत्र कमजोर भएपछि हाम्रो क्षेत्र पनि नराम्रोसँग प्रभावित भएको छ । नयाँ मेसिन निर्यात गर्न सकिएको छैन र पूराना मेसिनबाटै काम चलाउनुपर्ने अवस्था छ ।
निर्माणका काम बढ्दो क्रममा छ । व्यवसायमा सुधार हुन सकेको छैन ?
जिल्ला जिल्लामा व्यवसायी हतोत्साहित हुनु भएको छ । आर्थिक मन्दीका कारण उधारो खपत बढेको छ र व्यापारमा नकारात्मक प्रभाव परेको छ । धेरै व्यवसायी पलायन भइसकेको अवस्था छ । व्यवसायमा टिकिरहेकाहरुलाई पनि समस्या धेरै छन् । बिस्तारै निर्माण गतिविधि बढ्न थालेको सत्य हो । निर्माणको कामले गति लिएमा आगामी दिन सहज हुनेछ भन्ने अपेक्षा गरेका छौं ।
यो क्षेत्रमा सर्भिस, स्पेयर्स पाट्र्स र दक्ष जनशक्तिको अवस्था कस्तो छ ?
पहिला पहिला मेसिनहरु बिक्रीलाई प्राथमिकता दिइन्थ्यो । पछिल्लो समय बिक्री पछिको सेवालाई पनि प्राथमिकतामा राख्ने गरेको पाइन्छ । कम्पनीहरुले सर्भिस र मर्मतसम्भारका लागि आवश्यक पार्टसमा पनि चासो दिएका छन् । यस क्षेत्रलाई आवश्यक पार्टस्हरु बिक्रीका लागि धेरै व्यवसायी सक्रिय भएको देखिन्छ । पार्टस्का समस्या खासै देखिदैन । स्पेयर्स पाट्र्सको सुविधा पहिलेभन्दा राम्रो भएको छ । तर दक्ष जनशक्ति अझै अभाव कायमै छ । हामी आफैंले पनि निजी क्षे त्रबाट जनशक्ति उत्पादनको प्रयास गरेका छौँ, तर ५०% जनशक्ति विदेश गएका छन् ।
दोहोरो करको समस्याबारे महासंघले आवाज उठाउँदै आएको छ । खास समस्या के हो ?
सडकमा नचलेका मेसिनलाई समेत सडक कर तिर्नुपर्ने जस्ता नीतिगत समस्याले व्यवसायीलाई समस्या परेको छ । राज्यले यस्ता समस्यामा गम्भीर ध्यान दिनुपर्छ । हाम्रा मेसिनहरुले निर्माणको काम गर्छन्, सडकमा गुड्दैनन् । त्यसैले मेसिनहरुको सडक कर हटाउनुपर्छ भन्ने हाम्रो माग हो ।
बीमा कम्पनीहरूप्रति तपाईंको धारणा कस्तो छ ?
बीमा कम्पनीहरू व्यवसायीको हितमा काम गरेको देखिँदैन । प्रिमियम लिन्छन् तर बीमा दाबी रकम दिन चासो देखाउँदैनन् ।
अन्त्यमा, महासंघ र व्यवसायीहरूका लागि तपाईंको सन्देश के छ ?
हामी संस्थागत रुपमा व्यवसायीका हकहितमा काम गरिरहेका छौँ । अबका दिनमा व्यापार बिस्तार गर्न थप पहल गर्नेछौं । महासंघले व्यावसायिक हितमा निरन्तर काम गर्नेछ । नीतिगत सुधारका लागि सरकारलाई दबाब दिने काममा पनि हामी निरन्तर लाग्नेछौं । आशा गरौं आगामी दिनमा व्यवसायमा सकारात्मक सुधार हुनेछ र विकास निर्माणले पनि गति लिनेछ ।
Comments are closed.