काठमाडौं । नेपालको इन्टरनेशनल रिलेसन एन्ड ग्लोबल डिप्लोमेसी डाइलग (आईआरजीडीडी) र स्पेनी चेम्बर अफ कमर्सबीच दुई देशबीच विभिन्न क्षेत्रमा पारस्परिक लाभ प्रवर्द्धन गर्ने विषयमा मंगलबार द्विपक्षीय छलफल भएको छ।
आईआरजीडीडीकी अध्यक्ष तथा स्पेन र ओमानका लागि पूर्वराजदूत डा. शर्मिला पराजुली ढकाल र स्पेनी चेम्बर अफ कमर्सकी महानिर्देशक इन्माकुलाडा रियारा इ रेनेबीच भएको उक्त छलफल आईआरजीडीडीको विशालनगरस्थित कार्यालयमा सम्पन्न भएको हो ।
छलफलमा व्यापार प्रवर्द्धन, लगानी सहजीकरण, डिजिटल अर्थतन्त्र, पर्यटन तथा सांस्कृतिक कूटनीति, शिक्षा र सीप विकास, ज्ञान आदानप्रदान लगायतका विषयमा आपसी सहयोगका सम्भावनाहरूबारे चर्चा गरिएको थियो ।
उक्त अवसरमा आईआरजीडीडीका उपाध्यक्ष कालीप्रसाद पोखरेल र द डिप्लोम्याट नेपाल का प्रकाशक विमल ढकाल पनि उपस्थित थिए।
आईआरजीडीडी नेपालस्थित एक स्वतन्त्र, गैर–पक्षीय र गैर–नाफामुखी थिंक ट्याङ्क हो, जसले विश्वव्यापी मामिलाको विश्लेषण, रणनीतिक सल्लाह र नवप्रवर्तन प्रवर्द्धनमा योगदान पुर्याउँदै आएको छ।
त्यस्तै, स्पेनी चेम्बर अफ कमर्स स्पेनमा व्यापार, उद्योग, सेवा तथा ढुवानी क्षेत्रको हितको प्रतिनिधित्व, प्रवर्द्धन र रक्षा गर्ने सार्वजनिक संस्था हो। यस संस्थाले स्पेन र अन्तर्राष्ट्रिय व्यवसायिक समुदायबीच सहकार्य तथा नेटवर्क विस्तारमा सक्रिय भूमिका खेलेको छ।
Comments are closed.