कोभिड महामारी लगायत विविध कारणले केही वर्षदेखि स्थगित भएको इक्यान शैक्षिक मेलालाई हामीले यस वर्ष आठौं संस्करणका रुपमा निरन्तरता दिन हामी सफल भएका छौं । इक्यान कास्कीका कार्यसमितिका साथीहरु, सल्लाहकार ज्युहरु, इक्यानका कास्कीका सम्पूर्ण सदस्य संस्थाहरुको प्रत्यक्ष सक्रियता र साथ तथा हाम्रो छाता संस्था इक्यान केन्द्रको अभिभावकीय भूमिकाका कारण हामीले आजको इक्यान फेयर आयोजना गर्न सफल भएका छौं ।
यो शैक्षिक मेलालाई भव्य र सशक्त बनाउन साथ दिनुहुन सम्पूर्णप्रति म आभारी छु । विशेष गरी विभिन्न शीर्षकमा प्रायोजनमा रहेर साथ दिनुहुने प्रायोजक ज्युहरु एवं स्टल राखेर सहभागिता जनाउनुभएका सम्पूर्ण कम्पनीहरुप्रति पनि म आभारी छु ।
हामी एजुकेशन कन्सल्टेन्सीहरुले उच्च शिक्षा अध्ययनका लागि विदेश जान चाहने विद्यार्थीलाई परामर्श सेवा प्रदान गर्दै आइरहेका छौं । हाम्रो चाहना नेपालका विद्यार्थी स्वदेशमा उच्च शिक्षा अध्ययन गरोस् र आफ्नै भूमिका केही गरोस् भन्ने नै छ । तर, आजको दिनमा स्वदेशमै बसेर गुणस्तरीय शिक्षा प्राप्त गर्नुमा भन्दा पनि धेरै जसो विद्यार्थी विदेशमा जाने र आफ्नो भविष्यलाई सुरक्षित गर्ने सोच राखेको यथार्थता हामी माझ छर्लङग छ ।
संसारको जुनसुेकै कुनामा गएर भएपनि उच्च शिक्षा अध्ययन गर्नु र पढ्नुलाई हामीले नराम्रो मान्न सक्दैनौं । स्वदेशमा होस वा विदेशमा जुनसुकै स्थानमा गएर पनि पढ्नुपर्छ भन्ने हाम्रो मान्यता हो । यद्यपि, सकेसम्म नेपाली विद्यार्थीलाई स्वदेशमै राख्नका लािग यहाँको शिक्षामा आमुल परिवर्तन आवश्यक छ र उच्च शिक्षा पछि रोजगारीको ज्ञारेन्टीसहित सुरक्षित भविष्यको सुनिश्चित वातावरण आवश्यक छ । यसका लागि नेपाल सरकारले ध्यान दिन जरुरी छ ।
आजको दिनमा विदेश जान चाहने विद्यार्थीलाई सत्य तथ्य परामर्श र अभिभावकीय भूमिका आवश्यक छ । विदेशमा गइसकेपछि यहाँका विद्यार्थीले दुःख पाउनुहुँदैन र विदेश जानुपूर्व त्यहाँको कलेज, विश्वविद्यालय र सम्बन्धित देशका नीति नियम, भिसा प्रक्रिया लगायतका बारेमा विद्यार्थी र अभिभावकमा पूर्ण जानकारी हुनु आवश्यक छ । त्यही आवश्यकतालाई पुरा गर्ने काम हामी इक्यानियन साथीहरुले गर्दै आइरहेका छौं । हामीहरु नेपाल सरकारको शिक्षा मन्त्रालय, प्रदेशको शिक्षा मन्त्रालय लगायत सम्बन्धित ठाउँमा दर्ता भएर र नेपाल सरकारको स्वीकृतिमा सञ्चालित छौं । हामीले स्वच्छ र पारदर्शी व्यवसाय गरिरहेका छौं । हामीले विद्यार्थीलाई उचित र अति आवश्यक परामर्श सेवा प्रदान गरिरहेका छौं ।
यसैक्रममा इक्यान कास्कीले आठौं संस्करणको शैक्षिक मेला पोखराको न्युरोडस्थित सिटी स्क्वायर बैंक्युटमा आयोजना गरेको छ । आज (भदौ २०) सुरु भएको यो मेला भोलि (भदौ २१ शनिबार) सम्म चल्नेछ । जो विद्यार्थी विदेश अध्ययनका लागि जान चाहन्छन् उनीहरुको लागि यो मेला महत्वपूर्ण अवसर हो । एउटै छानामुनि धेरै कन्सल्टेन्सीको सहभागिता छ । विदेशस्थित विभिन्न देशका कलेज तथा विश्वविद्यालयका प्रतिनिधि लगायत हामीसँग सरोकार राख्ने अन्य कम्पनी तथा बैंक तथा वित्तीय संस्थाहरुको पनि उपस्थिति छ । यो कार्यक्रममा सहभागी भएर लाभ लिनुहुन म सम्पूर्ण विद्यार्थी र अभिभावक ज्युहरुमा म इक्यान कास्कीको अध्यक्षको तर्फबाट हार्दिक अपिल गर्दछु ।
(इक्यान कास्कीले पोखरामा आयोजना गरेको इक्यान शैक्षिक मेलाको उद्घाटनको अवसरमा अध्यक्ष गैरेद्वारा प्रस्तुत मन्तव्यको सम्पादित अंश)
Comments are closed.