काठमाडौं । विदेशी पर्यटक नेपाल आएपछि पहिलो सम्पर्कमा पर्ने सवारी चालकले पर्यटकको आतिथ्यमा नेपालीपन देखाउन आवश्यक भएको औँल्याइएको छ । पर्यटक प्रहरी एकाइको आयोजना तथा नेपाल पर्यटन बोर्डको सहयोगमा भएको पर्यटक सवारी चालक, ट्याक्सी चालक तथा रिक्सा चालकसँगको अनुशिक्षण कार्यक्रममा सरोकारवालाले पर्यटकलाई सवारी चालकले गर्ने व्यवहारबाटै नेपालप्रतिको दृष्टिकोण बन्ने भएकाले आतिथ्यतमा नेपालीपन देखाउन आग्रह गरेका हुन् ।
अनुशिक्षण कार्यक्रमको उद्घाटन गर्दै बोर्डका प्रमुख कार्यकारी अधिकृत डा धनञ्जय रेग्मीले पर्यटन व्यवसायमा बोली व्यवहार र आतिथ्यको महत्वपूर्ण भूमिका रहने हुँदा सवारी चालकले सोही अनुरूपको व्यवहार आवश्यक भएको बताए । उनले चालकलाई ‘अतिथिदेवो भवः’ भन्ने नेपाली परम्परा र सभ्यताको अनुशरण गर्न सके त्यसको छाप विश्वभर फैलाउन सहयोग पुग्ने बताए ।
नेपाल प्रहरी अस्पतालका प्रहरी नायक उपरीक्षक डा विवेकराज भण्डारीले कोभिडका अवस्थामा पर्यटक र आफ्नो सुरक्षा तथा स्वास्थ्य मापदण्डका बारेमा सहभागीलाई जानकारी दिनुभएको थियो । बोर्डका प्रबन्धक सुमन घिमिरेले बोर्डले कोभिड–१९ को अवस्थामा गरेका कार्य र भावी योजनाबारे जानकारी दिए । त्यस्तै नेपाल प्रहरी ट्राफिक महाशाखाका प्रहरी निरीक्षक दीपक भट्टले ट्राफिक व्यवस्थापन र होटल एशोसिएशन अफ नेपालका प्रमुख कार्यकारी अधिकृत टेक महतले ‘पर्यटनमा आतिथ्य र सञ्चारको भूमिका’ तथा पर्यटक प्रहरी एकाइका प्रहरी निरीक्षक चन्द्र किशोर साहले पर्यटक प्रहरीले गरेका कामका बारेमा बताएका थिए ।
Comments are closed.