पोखरा । पोखरा बचत तथा ऋण सहकारी संस्थाको प्रमुख कार्यकारी अधिकृत (सिइओ) मा बुद्धिप्रसाद तिवारी नियुक्त भएका छन् । सहकारीको हालै बसेको सञ्चालक समितिको निर्णयबाट उनी नियुक्त भएका हुन् ।
कात्तिक १ गतेदेखि लागु हुनेगरी ४ वर्षे कार्यकालको लागि तिवारीलाई नियुक्त गरिएको संस्थाका अध्यक्ष ई. सुरेन्द्र बहादुर गोदारले आर्थिक आवाजलाई जानकारी दिए । तिवारीसँग २० वर्ष एभरेष्ट बैंकको विभिन्न पदमा रहि काम गरिसकेको अनुभव छ । उनले बिगत २ वर्षदेखि साँग्रिला डेभलपमेन्ट बैंकमा गण्डकी प्रदेश प्रमुख भएर काम गर्दै आएका थिए ।
संस्थाको कारोबारमा वृद्धि, केन्द्रीय कार्यालय सहित दुई वटा सेवा केन्द्र बिस्तार, शेयर सदस्यमा बृद्धि भइरहेको अवस्थामा बैकिङ क्षेत्रमा लामो अनुभव सँगालेका तिवारीलाई प्रमुख कार्यकारी अधिकृत नियुक्त गरिएको अध्यक्ष गोदारले बताए ।
वि.सं. २०५९ वैशाख १२ गते स्थापित सहकारीमा हाल ४ हजार ७२ शेयर सदस्य छन् । कुल ९ करोड ४२ लाख ६२ हजार शेयरपुँजी, ८० करोड निक्षेप र ८७ करोड लगानी रहेको सहकारीले आ.व. २०७७÷०७८ मा दुई करोड २९ लाख ६३ हजार खुद मुनाफा आर्जन गर्न सफल भएको संस्थाका कोषाध्यक्ष हिरामणि दाहालले जानकारी दिए ।
पोखरा–९, नयाँबजारस्थित आफ्नै भवनमा प्रधान कार्यालय रहेको सहकारीले पोखरा–८, सिर्जनाचोकमा रहेको सेवाकेन्द्रबाट आफ्ना शेयरसदस्यहरुलाई विभिन्न वित्तीय सेवाहरु प्रदान गर्दै आइरहेको छ । निकट भविष्यमै पोखरा–१०, अमरसिंहचोकमा अर्को सदस्य सेवाकेन्द्र विस्तार गर्नै तयारी भइरहेको अध्यक्ष गोदारले जानकारी दिए । कास्की जिल्ला भर कार्यक्षेत्र रहेको सहकारीमा १६ जना कर्मचारी कार्यरत छन् ।
Comments are closed.