काठमाडौं । काठमाडौंको धुम्बाराहीमा बिगत ४ वर्षदेखि सञ्चालनमा रहेको अकामा होटलले अन्तर्राष्ट्रिय स्तरको लोकप्रिय तथा प्रतिष्ठित चेन होटल ‘विन्डम होटल्स एण्ड रिसोर्ट’सँग फ्रेन्चाइज साझेदारी गरेको छ । उक्त साझेदारीका लागि होटलमा बुधबार एक कार्यक्रमबीच सम्झौता भएको छ ।
साझेदारीसँगै अकामा होटल अब छिट्टै अमेरिकन चेन होटल ब्राण्ड ‘रमदा बाइ विन्डम’ को नामबाट सञ्चालन हुनेछ । होटल उद्योगमा ख्यातिप्राप्त अन्तर्राष्ट्रिय ब्राण्डसँगको साझेदारीसँगै होटलले अन्तर्राष्ट्रियस्तरमा आफ्नो उपस्थिति अझै बलियो बनाउने विश्वास लगानीकर्ताहरुको छ ।
सन् २०१९ को फेब्रअरीबाट ‘सफ्ट लञ्च’ भई सोही वर्षको करिब अन्त्यवाट पूर्ण रुपमा सञ्चालनमा आएको अकामा होटल स्तरउन्नतिसँगै ‘रमदा’सँग जोडिएको हो । यस अगाडि चारतारे होटल अकामा गत मंसिरबाट पाँचतारेमा स्तरउन्नति भएको हो । ‘१२० भन्दा बढी देशमा पुगेको ‘रमदा बाइ विन्डम’को ब्राण्ड सञ्चालित हुनु हामी सबैका लागि गौरवको क्षण हो,’ होटलका अध्यक्ष विनय कुमार श्रेष्ठले भने, ‘नेपालको पर्यटन, होटल तथा आतिथ्यताको क्षेत्रमा योगदान पुग्न गई पर्यटन प्रवर्द्धनमा महत्वपूर्ण टेवा पुग्ने र विश्व बजारमा नेपालको प्रचारप्रसारमा समेत मद्दत पुग्ने हाम्रो विश्वास छ ।’
९ रोपनी क्षेत्रफलमा फैलिएको अकामा होटलमा सुपेरीयर–९५, डिलक्स ६, डिलक्स स्विट–४, फेमिली स्विट– २, प्रेसिडेन्टल स्विट १ गरी जम्मा १०८ कोठाहरु छन् । २ सय बेड संख्याबाट पर्यटकलाई सेवा प्रदान गरिरहेको छ । न्युनतम २० देखि ६५० जनासम्म कभर गर्ने विभिन्न किसिमका ५ वटा हलहरु छन् । स्पेशल चाउवेला रेष्टुरेष्ट समेत गरी तीन वटा रेष्टुरेष्टहरु तथा आउटडोर स्विमिङ पुल, जिम, स्टिम, साउना, ज्याकुजी र स्पा छन् ।
होटलमा हाल १३० जनाले प्रत्यक्ष रोजगारी पाइरहेका छन् । बेसमेन्ट सहितको पर्याप्त पार्किङ सुविधा समेत छ । त्रिभुवन इन्टरनेशनल एयरपोर्ट, पशुपतीनाथ, बौद्ध स्तुपा, बुढानिलकण्ठ मन्दिर, दरबार स्क्वायर, स्वयम्भूनाथ स्तुपा तथा ठमेल लगायतका प्रमुख पर्यटकीय गन्तव्य स्थलहरु नजिक रहेकाले पनि होटल पर्यटकका लागि बस्न उपयुक्त रहेको अध्यक्ष श्रेष्ठ बताउँछन् ।
अकामा होटलले निकट भविष्यमा सर्वसाधारण जनतामा समेत शेयर जारी गर्ने तयारी गरेको छ ।
Comments are closed.