पोखरा । पोखरा उद्योग वाणिज्य संघले सञ्चालन गर्दै आएको पिसिसिआई आर्थिक पत्रकारिता पुरस्कारबाट पत्रकार मोहनकुमार विष्ट (आरजु विष्ट सल्यानी) सम्मानित भएका छन्।
शनिबार संघको ७१औं वार्षिक अधिवेशन तथा साधारण सभाको अवसरमा प्रमुख अतिथि नेपाल उद्योग वाणिज्य महासंघका कार्यबाहक अध्यक्ष अञ्जन श्रेष्ठ, पोखरा उद्योग वाणिज्य संघका अध्यक्ष गोकर्ण कार्की लगायतले पत्रकार विष्टलाई नगद रु. २५ हजार, सम्मानपत्र र दोसल्लाले सम्मान गरेका हुन्।
पोखरामा लगातार २५ वर्षदेखि पत्रकारितामा सक्रिय रहेका विष्टले २०५४/५५ सालमा काठमाडौंबाट प्रकाशित हुने सन्ध्याकालिन दैनिकबाट पत्रकारिता सुरु गरेका थिए। २०५८ सालदेखि रेडियो अन्नपूर्णमा निरन्तर कार्यरत उनी हाल सफलन्यूज डटकममा आबद्ध छन्।
पत्रकारिताको माध्यमबाट गाउँलाई शहर र शहरलाई गाउँसँग जोड्ने आर्थिक, पर्यटनका गतिविधि तथा आर्थिक कार्यक्रम सञ्चालन गर्दै आएका विष्ट गीत, कविता, गजल लेखनमा पनि सक्रिय रहेका छन्। उनका करिब ३ सय गीत रेकर्ड भएका छन् भने दुइवटा एल्वम प्रकाशित छन् ।
२०७२ सालदेखि कला, आवाज र दृष्यको माध्यमबाट सुरु गरिएको यो पुरस्कार हरेक दुई वर्षमा प्रदान हुँदै आएको छ। हालसम्म पाँच जना पत्रकारलाई सम्मानित गरिसकिएको यो पुरस्कार यसपटक छैटौँ संस्करणको पुरस्करा विष्टलाई अर्पण गरिएको हो ।
समारोहमा लक्ष्मी विद्यापदकबाट तीनजना विद्यार्थी प्रमिसा सापकोटा लाग्राण्डि कलेज र पिएनसीका विजय सुवेदी र दीपा तिवारीलाई सम्मान गरिएको थियो । साथमा व्यवसायमा उत्कृष्ता हािसल गरेका विभन्न व्यवसायीलाई सम्मान गरिएको थियो ।
सो अवसरमा प्रमुख अतिथि नेपाल उद्योग वाणिज्य महासंघका कार्यबाहक अध्यक्ष अञ्जन श्रेष्ठले महासंघ उद्योगी व्यवसायिकै हितका लागि लागिरहेको बताए । अब सात आठ महिनापछि आफु महासंघको नेतृत्वमा पुग्ने र केहि सुधारका कार्यक्रम लिएर आउने बताए ।
मुलुकको अर्थतन्त्रमा केहि सुधारका संकेतहरु देखिएको भएपनि पहिलेको जस्तो अवस्ठामा नभइसकेकोले अर्थनिति, मौद्रिक निति तथा पूँजीगत खर्चलाई बढाउन आवश्यक भएको बताए । उनले तीनै तहका सरकारले लिने दोहोरो तेहरो कर प्रणालीमा एक रुपता चाहेकोले महासंघले पहल गर्ने बताए ।
कार्यक्रममा महासंघका पूर्व अध्यक्ष आनन्दराज मुल्मी तथा विभिन्न जिल्ला र प्रदेश उद्योग वाणिज्य संघका अध्यक्षहरुले शुभकामना व्यक्त गर्दै आर्थिक चलायमान बनाउन कृषि, पर्यटन, हाइड्रो र सम्भावित कार्यहरुको प्रवर्धनमा लाग्नुपर्ने बताए ।
महासचिव शोभा गौतमले सञ्चालन गरेको कार्यक्रमको अध्यक्षता अध्यक्ष गोकर्ण कार्कीले गरेका थिए ।
Comments are closed.