काठमाडौं । जिल्ला प्रशासन कार्यालय काठमाडौंले शान्ति सुरक्षा जोखिमको मूल्यांकन गर्दै शनिबारका दिन हुने सबै र्याली, जुलुस, धर्ना र सभा–प्रदर्शनमा अनुमति नदिने निर्णय गरेको छ ।
एमाले निकट राष्ट्रिय युवा संघले शनिबार तीनकुनेबाट शक्ति प्रदर्शनसहित मोटरसाइकल र्याली गर्ने तयारी गर्दै आएको थियो। तर, प्रशासनले सुरक्षा चुनौती बढ्न सक्ने र फरक–फरक समूहले एकै दिन विभिन्न स्थानमा र्याली तथा सभा आयोजना गर्न खोजेको अवस्थालाई ध्यानमा राख्दै अनुमति नदिने निर्णय गरेको हो ।
प्रशासनले जारी गरेको विज्ञप्तिमा उल्लेख छ कि भदौ २३ गतेको जेनजी आन्दोलनपछिका तोडफोड, आगजनी र सार्वजनिक तथा निजी सम्पत्तिमा क्षति भएका घटना स्मरणीय छन् । यस कारणले शान्ति सुरक्षा कायम राख्न, सार्वजनिक सम्पत्ति संरक्षण गर्न र सेवा प्रवाह निरन्तरता दिन यो निर्णय आवश्यक भएको प्रशासनको भनाइ छ ।
जिल्ला प्रशासनले स्थानीय प्रशासन ऐन २०२८ को दफा ६ उपदफा ३ खण्ड (क) र प्रहरी ऐन २०१२ को दफा १९ अनुसार पूर्व स्वीकृति बिना कुनै र्याली, जुलुस वा प्रदर्शन नगर्न सबै सम्बन्धित पक्षलाई आग्रह गरेको छ ।
ईश्वरराज पौडेलले जारी गरेको विज्ञप्तिमा स्पष्ट गरिएको छ कि सुरक्षा र सार्वजनिक हितको दृष्टिले यो कदम आवश्यक रहेको प्रशासनको भनाइ छ ।
Comments are closed.