पोखरा । रेष्टुरेन्टको आआफ्नै विशेषताहरु हुन्छन् । विशेषगरी खानाका स्वादहरुले रेष्टुरेन्टको विशेषतालाई झल्काउँछ । विभिन्न स्वादहरुमध्ये चिनियाँ स्वाद तथा चिनियाँ खाना संसारभर प्रख्यात छ । नेपालमा पनि चिनियाँ स्वाद मन पराउनेहरु धेरै छन् । चिनियाँ पर्यटकका लागि चिनियाँ परिकार प्रमुख रोजाइमा पर्नु स्वभाविक नै हो ।
पोखराको लेकसाइडमा सञ्चालित चाइनिज गार्डेन रेष्टुरेन्टले पनि चिनियाँ पर्यटक र चिनियाँ स्वादका पारखीहरुलाई आकर्षित गर्न सफल छ । पोखरामा बिगत १५ वर्षदेखि सञ्चालित उक्त रेष्टुरेन्टले चिनियाँ स्वादलाई पस्कदै आइरहेको छ । व्यावसायिक चाइनिज सेफ चाङ ज्याङ सङद्वारा सञ्चालित उक्त रेष्टुरेन्टमा पोखराका पर्यटन व्यवसायी गोपी भट्टराईको समेत लगानी छ ।
रेष्टुरेन्ट चिनियाँ पर्यटक तथा चिनियाँ स्वादका पारखीहरुको प्रमुख रोजाई बन्न सफल भएको बताउँछन् सेफ चाङ । चिनियाँ पर्यटकसँगै चिनियाँ राजदूत, चीनबाट आउने उच्च अधिकारीको रोजाईमा समेत रेष्टुरेन्ट पर्ने गरेको छ ।
पछिल्लो समय नयाँ व्यवस्थापन तथा सेवा सुविधासमेत थप गरेर रेष्टुरेन्टले लगानी विस्तारसमेत गरेको छ । २ करोड ५० लाख रुपैयाँ लगानी थप गरी रेष्टुरेन्टको स्तरउन्नति गरिएको हो । २ सय ५० जना ग्राहकलाई एकैपटक सेवा प्रदान गर्न रेष्टुरेन्ट सक्षम छ ।
रेष्टुरेन्टको मुख्य उद्देश्य चिनियाँ खानाको स्वादलाई पस्कुन रहेको बताउँछन् सञ्चालक भट्टराई । ‘हाइजेनिक खाना पस्कन हामीले खुल्ला किचन तयार गरेका छौं,’ उनले भने । चिनियाँ व्यवसायी तथा सेफको व्यवस्थापनमा सञ्चालित रेष्टुरेन्टले पोखराको पर्यटनमा विविधता थप्न सफल भएको बताउँछन् भट्टराई । ‘पर्यटनमा भेराइटी आवश्यक छ,’ उनले भने, ‘चिनियाँ गार्डेन रेष्टुरेन्टले पोखराको पर्यटनमा नयाँ स्वाद र भेराइटी थप्ने काम गरेको छ ।’
ग्राहकको सेवाका लागि ७० जना क्षमताको हलको सुविधासमेत रहेको चाङले जानकारी दिए । सानो मिटिङका लागि भिआइपी हल पनि छ । रेष्टुरेन्ट सञ्चालक चाङ चीनको फुजेन सहरबाट आएका हुन् । पोखरामा १५ वर्षदेखि रेष्टुरेन्ट सञ्चालन गरिरहेका चाङसँग चिनियाँ राजदुताबासमा सेफको रुपमा काम गरेको अनुभवसमेत छ । उनले काठमाडौंको याक एण्ड यतिमा पनि सेफ भएर काम गरिसकेका छन् । उनले कोभिडको समयमा चीनबाट स्वास्थ्य सामग्री ल्याउन पनि भूमिका खेलेका थिए । व्यवसायको साथै सामाजिक सेवामा पनि संलग्न रहदै आँएका चाङ ओभरसिज चाइनिज एसोसिएसन पोखराका अध्यक्षसमेत हुन् ।
Comments are closed.