भदौमा वाणिज्य बैंकहरूको ब्याजदर झन् घट्यो, कुन बैंकको कति ?

काठमाडौं । भदौ महिनाका लागि वाणिज्य बैंकहरूले निक्षेपमा दिने ब्याजदर थप घटाएका छन् । २० वटा वाणिज्य बैंकले सार्वजनिक गरेको ब्याजदर सूचीअनुसार औसतमा साउन महिनाको तुलनामा भदौमा ब्याजदर ०.११ प्रतिशत विन्दुले घटेर ५.६८ प्रतिशतबाट ५.५७ प्रतिशतमा पुगेको छ ।

ब्याजदर घटाउने बैंकहरूमा कृषि विकास, एभरेस्ट, लक्ष्मी सनराइज, स्ट्यान्डर्ड चार्टर्ड, सिद्धार्थ, कुमारी, सानिमा र नेपाल एसबीआई रहेका छन् । त्यस्तै सिटिजन्स, एनएमबी, नेपाल इन्भेस्टमेन्ट मेगा, हिमालयन, प्राइम कमर्सियल, ग्लोबल आईएमई, राष्ट्रिय वाणिज्य, नबिल, एनआईसी एसिया, माछापुच्छ्रे र नेपाल बैंकले साउनमै कायम दरलाई निरन्तरता दिएका छन् । प्रभु बैंकले भने विपरीत भदौ महिनामा ब्याजदर बढाएको छ ।

छोटो अवधिका मुद्दती निक्षेपमा कम र लामो अवधिका लागि बढी ब्याजदर तोक्ने परम्परा वाणिज्य बैंकहरूको छ । व्यक्तिगत मुद्दती निक्षेपको अधिकतम ब्याजदर घट्दा बचतकर्ताको आम्दानी घट्ने भए पनि कर्जा लिने ग्राहकले भने केही राहत पाउने देखिन्छ । यसअघि नै नेपाल राष्ट्र बैंकले मौद्रिक नीतिमार्फत नीतिगत दर घटाउँदै बैंकहरूलाई ब्याजदर तल झार्न दबाब दिएको थियो । हाल नीतिगत दर ४.५ प्रतिशत, स्थायी तरलता सुविधा दर ६ प्रतिशत र स्थायी निक्षेप सुविधा संकलन दर २.७५ प्रतिशत कायम छ ।

असार महिनामा भएको उच्च पूँजीगत खर्चका कारण निक्षेप बढे पनि कर्जा प्रवाह सुस्त रहँदा बैंकहरूले भदौ महिनामा पनि ब्याजदर घटाएका हुन् । यसले निक्षेपकर्तालाई असुविधा भए पनि कर्जा बजारलाई सक्रिय बनाउन योगदान गर्ने अपेक्षा गरिएको छ ।

बैंकहरूको साउन–भदौ ब्याजदर तुलना (व्यक्तिगत मुद्दती निक्षेप अधिकतम)