‘छोटो समयमै लायन्सको अन्तर्राष्ट्रिय अभियानमा सकारात्मक छाप छाडेका छौं’

लयन ध्रुव श्रेष्ठ, डिष्ट्रिक्ट गभर्नर, लायन्स क्लब्स इन्टरनेशनल ३२५ जे, नेपाल

लायन्स क्लब्स इन्टरनेशनल ३२५ जे, नेपालले डिष्ट्रिक्ट वाइफर्मेसनपछि स्थापनाको एक वर्ष पूरा गरेर पहिलो डिष्ट्रिक्ट कन्भेन्सन गर्दैछ । डिष्ट्रिक्टको संस्थापक डिस्ट्रिक्ट गभर्नरको रूपमा जिम्मेवारी पाएका ध्रुव श्रेष्ठ ३२५ जेले नयाँ डिष्ट्रिक्ट भएरै पनि विश्वस्तरमा उत्कृष्ट काम गरेको बताउँछन् । लायन्समा ४५ वर्ष लामो अनुभव बटुलेका श्रेष्ठले लायन्स अभियान र ३२५ जे ले गरेका गतिविधिका बारेमा आर्थिक आवाजसँग गरेको कुराकानी :

लायन्स क्लब्स इन्टरनेशनल ३२५ जे को संस्थापन गर्भनर भएर काम गर्दाको अनुभुति कस्तो रह्यो ?

म विगत ४५ वर्षदेखि लायन्समा आबद्ध छु । लायन्स क्लब इन्टरनेशनल डिस्ट्रिक्ट ३२५ जेको गर्भनरको रूपमा कामगर्दा मेरो लागि सुखद तथा सफल समय रहेको मैलै अनुभुती गरेको छु । मेरो अनुभवलाई हाम्रो टिमसँग जोडिएर अगाडि बढाउने अवसरको रूपमा मैले यो अवसरलाई लिएँ । सकेसम्म हामी सक्रिय भएर काम गर्ने सोंचलाई व्यवहारमा बदल्ने मौका यो कार्यकालले दियो ।

नेपालमै १५ ओटा डिष्ट्रिक्ट छन्, ३२५ जेको अवस्था कस्तो छ ?

वाइफर्मेसनको समयमा सबैभन्दा कम क्लब लिने डिष्ट्रिक्टमा हाम्रो डिष्ट्रिक्ट पनि पर्छ । अहिले २० ओटा नयाँ क्लब खोलेर क्लब थप गर्नेमा संसार कै दोस्रो पोजिसनमा छौं । सर्भिसका काममा पनि हामी संसारभरमा दोस्रोमा छौं । रिपोर्टिङको कुरामा हामी पहिलो पोजिसनमा छौं । धेरै एचिभमेन्ट गर्न सफल भएकोले सानो डिष्ट्रिक्ट भएपनि लक्ष्य प्राप्त गर्न सफल भएका छौं ।

मलाई त मेरो डिष्ट्रिक्ट अन्य १४ डिष्ट्रिक्टभन्दा अब्बल छ भन्ने लाग्छ । हामीले विभिन्न क्लब खोल्ने अभियान चलाउँथ्यो तर अहिले हामी त्यो बाटोमा छैनौं । मेरो अभियान लायन्स बुझेर भएकै सदस्यलाई नियमित बनाउनु छ । नेपालमा लायन्स अभियान शुरू भएको ५० वर्षमा धेरै परिवर्तन गर्न सकिन्थ्यो तर हामी सिस्टममा रहन नसकेका रहेछौं भन्ने अनुभूती भएको छ । यसकै कारण हामीले चाहे जति उपलब्धी हासिल गर्न सकेका रैनछौं । हामीले अहिले एउटा डिस्ट्रिक्ट गभर्नरले ल्याएका कार्यक्रमलाई कम्तीमा ५ वर्ष नियमित गराउने निर्णय गरेका छौं । यसले हरेक डिष्ट्रिक्ट गभर्नरका योजनाले पूर्णता पाउनको लागि सहयोग पुग्छ भन्ने मलाई लाग्छ ।

यसबीचमा तपाईको डिष्ट्रिक्टमा के के काम भए ?

हामीले लक्ष्य निर्धारण गरेअनुसारका काम गर्यौं । डिस्ट्रिक वाइफर्मेसनपछि हामीले केही लक्ष्य निर्धारण गरेका थियौं । नयाँ भएको कारणले ती लक्ष्य त्यति धेरै पनि थिएनन् । हामीले परिकल्पना गरेका ६–७ ओटा काम पुरा भएका छन् । हाम्रो डिष्ट्रिक्टको मल्टिपल दर्तासहितको अस्तित्व छ नै त्यसमा पनि डिष्ट्रिकलाई छुट्टै दर्ता प्रकिृयामा लैजानको लागि विधान र नियमावली बनाउने काम गरेका छौं । अर्को , डिष्ट्रिक्टलाई डिजिटलाइज्ड गर्नको लागि हाम्रो वेवसाइट बनाउनेदेखि मोबाइल एप लगायतका कुरालाई प्राथमिकता दिइ हाम्रा सूचना तथा जानकारी सबै डिजिटल माध्यमबाट राख्ने व्यवस्था मिलाएका छौं । लायन्स स्थापना भएको १०५ वर्ष भइसकेको छ । लायन्सले हरेक वर्ष आफ्ना सदस्यको संख्या बढाउने अभियानमा लागेको हुन्छ, अभियान अनुसार लाखको संख्यामा सदस्यको संख्या बढ्ने र फेरि त्यति नै संख्यामा घट्ने हुँदै आएको अवस्था छ । नयाँ सदस्य थपिँदा पुराना बाहिरिने प्रवृत्ति छ । नेपालको परिपेक्षमा हेर्दा संसारमै धेरै सदस्य थप गर्नेमा पर्छ । यहाँ भएका १५ डिष्ट्रिक्टमध्ये यो पटक ५ डिष्ट्रिक्ट संसारमा उत्कृष्ट मध्येमा परे । हाम्रो डिष्ट्रिक्टपनि त्यसमध्येमा पर्छ । हाम्रो मान्यता नयाँ थप गर्ने मात्र भन्दा पनि भएकै सदस्यलाई सदस्यता नविकरण गरेर निरन्तरता दिनुपर्छ भन्ने हो, त्यो अभियानमा यो पटक सफल पनि भयौं ।

डिष्ट्रिक्ट र क्लबको क्षमता विकासका काम पनि भए?

संसारमै क्लबमा २० जनाभन्दा कम सदस्य संख्या नभएको डिस्ट्रिक्टमा हामी पर्दैछौं । हामीकहाँ भएका १०३ क्लब अन्तराष्ट्रिय स्टान्डर्डअनुसारका छन् । मेरो कार्यकालमा डिस्ट्रिक र माताहतमा क्लबलाई कसरी लायन्सको नियमअनुसार अगाडि बढाउन सकिन्छ भन्ने कुरामा अभ्यास गर्यौं । क्षमता विकासका धेरै कार्यक्रम गरेका छौं । लायन्स अन्तराष्ट्रियले केही वर्षदेखि ‘लायन्स् क्वेस्ट’ भन्ने ११ वर्ष मुनीका बालबालिका लक्षित परियोजना सञ्चालन गर्दै आएको छ, नेपालमा केही वर्षदेखि त्यो बन्द भएको थियो, हामीले त्यसलाई निरन्तरता दियौं । अर्को अन्तराष्ट्रिय रूपमै ‘पिस पोस्टर’ भन्ने चित्रकला प्रतियोगिता हुन्छ, नेपालमा १५ ओटा डिस्ट्रिक्टका ११ देखि १३ वर्ष उमेर समूहका बालबालिकामा गरिएको प्रतिस्पर्धामा हाम्रो डिस्ट्रिक्ट प्रथम भएको छ । अमेरिकामा प्रतियोगिताको लागि हामी गइरहेका छौं । हामीले योबीचमा यस्ता धेरै काम गरेका छौं । जुनबाट हामी सन्तुष्ट पनि छौं ।

चार दशकभन्दा लामो समयदेखि लायन्सलाई बुझ्दै आउनु भएको छ, लायन्स अभियानका कमजोरी के हुन्, के कुरामा सुधार गर्नुपर्ला ?

लायन्समा सबैभन्दा ठूलो कुरा त लायन्स के हो र यसले के गर्छ भन्ने कुरा बुझाउनु नै ठूलो कुरा हो । अहिले हाम्रा सदस्यमा सबैकुरा बुझाएर ल्याउने, नल्याउने दुवै प्रवृत्ति विद्यामान छ । लायन्समा जोडिएपछि मिटिङ गर्ने, रमाइलो गर्ने भन्ने मात्र भन्दा पनि लायन्सको अभियान र उद्देश्य बुझाउन जरुरी छ । हामी लायन्सका लिडरले यसको महत्वका बारेमा बुझाउन सकेका छौं कि छैनौं भन्ने कुरा जहिल्यै मेरो प्राथमिकतामा पर्छ । मलाई लाग्छ हाम्रो डिष्ट्रिक्टमा त्यो कुरा बुझाउने काम भएको छ । नेपालका ५० हजार सदस्य लायन्समा आबद्द भएका छन्, ती सदस्य कुन उद्देश्यले जोडिएका हुन् । ती साथीहरूलाई लायन्सको बारेमा बुझाउन सकियो भने यो अभियानमार्फत हाम्रो जस्तो विकासशील मुलुकले फाइदा उठाउन सक्छ । सरकारले मात्रै गर्न नसक्ने अवस्थामा लायन्स, रोटरी, जेसिस लगायतले भूमिका निभाउन सक्छन् तर यसको लागि यसका अन्तर्राष्ट्रिय मान्यतामा रहेर काम गरेको हुनुपर्छ । यसरी नगरेको अवस्थामा एनजीओ, आइएनजीओको अवस्था हुन्छ । राम्रोसँग काम गरेको अवस्थामा एउटा डिष्ट्रिक्टले ४ ओटासम्म परियोजना सञ्चालन गर्न पाइन्छ । एक करोडसम्मका परियोजनाको हिसाब गर्ने हो भने पनि १५ डिष्ट्रिक्टले ६० ओटा परियोजना सञ्चालनमा ल्याउन सक्छन् । हामीले यसवर्ष ३ ओटा परियोजना ल्याउनको लागि प्रकृया अगाडि बढाएका छौं ।

You might also like

Comments are closed.