लेखनाथ । पोखराको लेखनाथमा रहेको डायमण्ड माध्यामिक विद्यालयले स्मार्ट प्रविधि मार्फत कक्षा संचालनको शुभारंभ गरेको छ । गुरुपूर्णिमाका दिन सोमबार देखी विद्यालयमा आइएनजी स्किल एकेडेमीसँगको सहकार्यमा कक्षा ११ र १२ का विद्यार्थीहरुलाई स्ट्डी स्मार्ट विथ माई सेकेण्ड टिचर कार्यक्रमको शुभारंभ गरेको हो ।
कप्यूटर, आईप्याड, आईफोन, ल्यापटपको प्रयोग गरेर विद्यार्थी, शिक्षक र अभिभावकका लागि तयार गरिएको स्मार्ट एप्लीकेसनमा आफ्नो युजर आईडी मार्फत पाठ्य सामाग्री, अध्ययन गर्न, हेर्न र प्रश्नको हल समेत गर्न सक्नेछन् ।
यो प्रविधि डायमण्ड मा.वि ले यस क्षेत्रमा पहिलो पटक प्रयोग गरेको हो । आइएनजी स्किल एकेडेमीको सहकार्यमा स्मार्ट प्रविधिसँग दोश्रो शिक्षक सिकाईका रुपमा अगाडी बढाईने विद्यालयले जनाएको छ ।
कार्यक्रमको शुभारंभ गर्दै, पोखरा विश्वविद्यालयका पूर्व डिन प्रा.डा. इन्द्रप्रसाद तिवारीले स्मार्ट प्रविधिको शिक्षण विधि प्रविधिको पनि विशिष्टीकृत रुप भएको बताए । उनले कम्प्यूटर र विज्ञानको युगमा लिखित पाठ्यक्रम भन्दा प्रविधिको माध्यमलाई जोड्नु सकरात्मक भएको उल्लेख गरे ।
शिक्षाविद् तिवारीले शिक्षणमा एप्सको प्रयोग गरी डिजिटल पाठ्यक्रमको बिकास गरी विद्यार्थीलाई अभ्यस्त गराउन सकिने बताए ।
कार्यक्रममा लक्ष्मी आदर्श मा.वि पूर्वप्रधानाध्यापक तुलसीराम लामिछानेले घोकन्ते अध्ययनलाई प्रविधिले विस्थापित गर्नु पर्नेमा जोड दिएका थिए ।
लक्ष्मी माध्यामिक विद्यालयका प्रधानाध्यापक जगन्नाथ अधिकारीले नीति, विधि र प्रविधिमा आधारित भएर अध्यापन गर्नु पर्नेमा जोड दिए । उनले प्रविधि मार्फत अभिभावकहरुले उत्तरदायित्व पुरा गर्ने गरी जोड्नुपर्ने बताए ।
विद्यालयका संस्थापक प्राचार्य एम बहादुर रोकाले पछिल्लो पुस्ता प्रविधि अभ्यस्त हुँदै गएकाले स्मार्ट शिक्षण सिकाईको माध्यमलाई विद्यालयले प्रयोगमा ल्याएको उल्लेख गरे ।
स्मार्ट प्रविधिलाई मेरो सेकेण्ड टिचरका रुपमा विकास गर्दै, श्रब्यदृश्य सम्बाद, अन्तरक्रिया, प्रश्नोत्तर एवं अभ्यासले विद्यार्थीहरुमा सिर्जनशिलताको प्रयोग हुनेमा विश्वस्त रहेको रोकाले उल्लेख गरे ।
विद्यालयका निर्देशक माधव शरण उपाध्यायले डायमण्डबाट दिक्षित भएका विद्यार्थीहरु संसारका विभिन्न राष्ट्रमा अध्ययन अनुसन्धान र पेशामा संलग्न रहेको उल्लेख गर्दै, आगामी पुस्ता अझ शसक्त भएर निस्कने बताए । उनले दोश्रो शिक्षक शिक्षण विधिमा स्मार्ट प्रविधिको प्रयोग गरिएको उल्लेख गर्दै, विद्यार्थी, शिक्षक र अभिभावकका लागि शसक्त माध्यम बन्ने बताए ।
स्किल एकेडेमीसँगको सहकार्यमा कक्षा ११ र १२ का विद्यार्थीहरुलाई मेरो सेकेण्ड टिचरका रुपमा बिकास गर्ने गरी कक्षाहरुमा स्मार्ट प्रविधि जडान गरिएको विद्यालयका शैक्षिक प्रशासन प्रमुख इञ्जिनियर संजिब थापाले बताए । उनले डिजिटल कक्षा कोठा, शिक्षकहरुका लागि पाठ्य सामाग्री निर्माण, सेमिनार, अन्तर संवाद लगायतका माध्यम समावेश गरिने उल्लेख गरे ।
विद्यार्थी र शिक्षकको बृत्तर बिकासका लागि काठमाण्डौं विश्वविद्यालय, आईएनजी स्किल एकेडेमी, लावण्य इन्टरनेशनल र बेलायतको एनसिसि डिजी स्कुल एवं सिद्धराजा इन्टरनेशनल स्कुलसँग सहकार्य गरिएको बताए । थापाले सिद्धराजा इन्टरनेशनलसँग विद्यार्थी तथा शिक्षकको अध्ययन र अध्यापन आदान प्रदान, एनसिसि डिजी स्कुलसँग कक्षा ४ देखी ७ सम्मका विद्यार्थीहरुलाई युके बेस आईटी कोर्स संचालन गरिएको बताए । उनले लावण्य इन्टरनेशनलसँग बालबिकास केन्द्रका विद्यार्थीका लागि शिक्षण र सिकाई विधि, काठमाण्डौं विश्वविद्यालयसँग प्रोफेसनल शिक्षा, पाठ्य सामाग्री तयारी र स्किल एकेडेमीसँग स्ट्डी स्मार्ट विथ माई सेकेण्ड टिचरका लागि स्मार्ट प्रविधिका लागि सहकार्य गरिएको बताए ।
सोही अवसरमा शिक्षाविद् प्रा.डा. इन्द्रप्रसाद तिवारी र तुलसीराम लामिछानेलाई दोसल्ला ओढाएर सम्मान समेत गरिएको थियो ।
विद्यालयका निर्देशक माधवशरण उपाध्यायको अध्यक्षतामा भएको कार्यक्रममा स्किल एकेडेमीका निखिल श्रेष्ठ, दिक्षा खनाल लगायतले कार्यक्रमको बारेमा बोलेका थिए । कार्यक्रमको संचालन विद्यालयका निर्देशक हरिप्रसाद लामिछानेले गरेका थिए ।
बि.सं. २०४५ सालमा स्थापना भएको यस क्षेत्रकै संस्थागत विद्यालयको रुपमा रहेको डायमण्ड माध्यामिक विद्यालयले २०५२ साल देखी प्रवेशिका परिक्षामा विद्यार्थीहरुलाई सामेल गराउँदै आएको छ भने २०६३ साल देखी दश दुई जोडको अध्यापन गराउँदै आएको छ ।
Comments are closed.