काठमाडौं । नेपाल उद्योग परिसंघ (CNI) का नवनिर्वाचित पदाधिकारी र शिक्षा, विज्ञान तथा प्रविधि मन्त्री रघुजी पन्तबीच सीप, शिक्षा र उद्योगबीचको सहकार्य विषयक महत्वपूर्ण छलफल सम्पन्न भएको छ ।
छलफलका क्रममा परिसंघका अध्यक्ष वीरेन्द्रराज पाण्डेले उद्योग क्षेत्रलाई आवश्यक पर्ने सीपयुक्त जनशक्ति उत्पादनमा ध्यान दिनुपर्ने आवश्यकता औँल्याए । उनले शिक्षा र सीपलाई उद्योगसँग जोड्न परिसंघले नीति निर्माण र कार्यान्वयनमा योगदान पुर्याउने उद्देश्यले ‘शिक्षा तथा सीप समिति’ गठन गरेको जानकारी दिए । अध्यक्ष पाण्डेले विभिन्न विश्वविद्यालयहरूसँग सहकार्य गर्दै परिसंघले शिक्षालाई उद्योगसँग जोड्ने दीर्घकालीन कार्ययोजना अघि बढाइरहेको बताए ।
सो अवसरमा शिक्षा मन्त्री रघुजी पन्तले शिक्षा प्रणालीलाई उत्पादनमुखी बनाउन आवश्यक रहेको धारणा राखे । उनले शिक्षा क्षेत्रमा निजी क्षेत्रको सक्रिय सहभागिता अपरिहार्य रहेको बताउँदै उत्पादनसँग मेल खाने गरी शैक्षिक कार्यक्रमहरू सञ्चालन गर्न सरकार प्रतिबद्ध रहेको स्पष्ट पारे । मन्त्री पन्तले शिक्षा क्षेत्र सुधारका लागि निजी क्षेत्रसँगको सहकार्यलाई उच्च प्राथमिकता दिइने आश्वासन दिए ।
छलफलमा परिसंघका पदाधिकारी सदस्य सन्दिप शारडा, महानिर्देशक डा. घनश्याम ओझालगायत पदाधिकारीको उपस्थिति रहेको थियो ।
Comments are closed.