काठमाडौं । ललितपुर, पुल्चोकस्थित इम्बार्क कलेजले पढाइसँगै रोजगारी र उद्यमशीलतालाई एकैसाथ अघि बढाउने उद्देश्यसहित दुई कार्यक्रम सुरु भएको छ । कलेजले सुरु गरेको व्यावहारिक सीप तालिम (अप्रेन्टिससिप) कार्यक्रम र स्टार्टअप क्षमता विकास कार्यक्रम ले नेपालमा व्यावसायिक शिक्षा र उद्योगबीचको खाडललाई हटाउँदै करियर–रेडी शिक्षाको नयाँ ढाँचा प्रस्तुत गर्ने अपेक्षा गरिएको छ ।
इम्बार्क कलेजका कार्यकारी निर्देशक तथा सिइओ आशिष ठाकुरका अनुसार, यी कार्यक्रमहरूले स्नातकहरूले शैक्षिक जीवनपछि व्यावसायिक क्षेत्रमा प्रवेश गर्दा हुने अनिश्चिततालाई अन्त्य गर्नेछन् । उनले भने, “हामीले व्यावसायिक शिक्षालाई प्रत्यक्ष उद्योगसँग जोडेर नेपालमा करियर–रेडी शिक्षाको नयाँ मापदण्ड स्थापित गरेका छौं ।”
अप्रेन्टिससिप कार्यक्रमले प्रमुख उद्योग र उद्यमसँगको साझेदारीमार्फत दक्ष स्नातकहरूलाई प्रत्यक्ष रोजगारीको अवसर दिनेछ । यसमा संरचित तालिम, सीप मूल्याङ्कन, व्यावसायिक परामर्श, नियमित मूल्याङ्कन तथा उद्योगसँग दीर्घकालीन साझेदारी सम्झौता जस्ता विशेषताहरू समावेश छन् । यसले उद्योगलाई दक्ष जनशक्ति उपलब्ध गराउने मात्र नभई विद्यार्थीलाई सुनिश्चित रोजगारीको ग्यारेन्टी गर्ने उद्देश्य राखेको छ ।
त्यस्तै, स्टार्टअप क्षमता विकास कार्यक्रमले कानुनी रूपमा दर्ता भई १० वर्षभन्दा कम समय सञ्चालन भएका र वार्षिक कारोबार १५ करोडभन्दा कम भएका नवप्रवर्तनशील व्यवसायलाई सहयोग पुर्याउनेछ। नवप्रवर्तन, मापनयोग्यता र बजार प्रभाव भएका स्टार्टअपहरूलाई प्राथमिकता दिइने यस कार्यक्रमले नेपाल सरकारको राष्ट्रिय स्टार्टअप नीति २०८० र औद्योगिक उद्यम ऐन २०७६ सँग मेल खाने गरी स्वदेशी उद्यमशीलतालाई प्रोत्साहन गर्नेछ ।
सीईओ ठाकुरले नेपालमा उद्यमशीलताको अपार सम्भावना भए पनि स्रोत र अवसरमा अभाव रहेको भन्दै, “हाम्रो कार्यक्रमले नवप्रवर्तनलाई दीगो व्यवसायमा रूपान्तरण गर्न समग्र क्षमता विकासमा जोड दिनेछ,” भने ।
यी दुई कार्यक्रममार्फत विद्यार्थीलाई सुनिश्चित करियर मार्गदर्शन, उद्योगलाई दक्ष जनशक्ति र देशलाई उद्यमशील पारिस्थितिक तन्त्र विकासमा सहयोग पुग्ने विश्वास लिइएको छ । इम्बार्क कलेजले सञ्चालन गर्दै आएको BSc. Business Management, MBA र ACCA जस्ता अन्तर्राष्ट्रिय व्यवसाय कार्यक्रमहरूमार्फत पनि नेपालमा दक्ष व्यवसायिक नेतृत्व उत्पादन गर्ने काम गरिरहेको छ ।
Comments are closed.