काठमाडौं । शुक्रबारदेखि भृकुटीमण्डपमा नेपाल इलेक्ट्रिक पावर एण्ड लाइटस् तथा नेपाल कन्जुमर इलेक्ट्रोनिक्स एण्ड होम अप्लायन्सेस अन्तर्राष्ट्रिय प्रदर्शनीको चौथो संस्करण सुरु भएको छ ।
मिडिया स्पेस सोलुसन्स, फ्युचरेक्स ट्रेड फेयर एण्ड इभेन्ट्स, तथा एक्जिबिसन एण्ड ट्रेड सर्भिसेज इन्डिया प्रालिले संयुक्त रुपमा आयोजना गरेको प्रदर्शनीमा नेपाल विद्युत प्राधिकरण र नेपाल सौर्य विद्युत उत्पादक संघ सहयोगी संस्था रहेका छन् ।
प्रदर्शनीमा स्वदेशी तथा विदेशी कम्पनीका १०० भन्दा बढी स्टलहरू रहेका छन् । ती स्टलमार्फत उच्च गुणस्तरका नवीनतम प्रविधिका ट्रान्समिसन तथा डिस्ट्रीब्युसन सामग्री, ऊर्जा आपूर्ति तथा कन्ट्रोल डिभाइस, हाउस वायरिङ्ग सामग्री, तार, केबल र कन्डक्टर, अत्याधुनिक स्वीच, एलईडी लाइटिङ्ग, इलेक्ट्रोनिक्स उपकरण, घरायसी विद्युतीय सामग्री, चार्जिङ्ग स्टेशन, ब्याट्रीदेखि कार्यालय प्रयोजनका विद्युतीय प्रविधि प्रदर्शन गरिएको छ ।
उद्घाटन समारोहमा ऊर्जा मन्त्री भण्डारीले नेपालमा उत्पादित विद्युत तथा विद्युतीय सामग्री निर्यात गर्ने अपार सम्भावना रहेको उल्लेख गर्दै प्रदर्शनीमा सहभागी राष्ट्रिय तथा अन्तर्राष्ट्रिय ब्रान्डहरूले नेपालमा ऊर्जा क्षेत्रमा राम्रो सम्भावना देखाएको बताए ।
प्रदर्शनी आयोजना गर्ने उद्देश्य विद्युतीय उपकरणलाई प्रवर्द्धन गर्ने, गुणस्तरीय सामग्रीको व्यवसाय विस्तार गर्ने, ऊर्जा तथा विद्युतीय क्षेत्रसँग सम्बन्धित आन्तरिक र अन्तर्राष्ट्रिय व्यापारलाई सहज बनाउने रहेको आयोजकहरूले जनाएका छन्। दशैं पर्व नजिकिएको बेला आयोजना भएकाले उपभोक्ताहरूले विभिन्न राष्ट्रिय तथा अन्तर्राष्ट्रिय ब्रान्डका सामानहरू सहज र सुलभ मूल्यमा खरिद गर्न सक्नेछन्।
राष्ट्रिय तथा अन्तर्राष्ट्रिय इलेक्ट्रिक, इलेक्ट्रोनिक्स, सञ्चार, सूचना प्रविधि र वैकल्पिक ऊर्जा उद्यमीहरूलाई एउटै मञ्चमा ल्याएर व्यवसायिक साझेदारी, नवीनतम प्रविधि आदान–प्रदान, तथा ऊर्जा खपतको व्यवस्थितिकरणबारे जनचेतना फैलाउने उद्देश्य यस संस्करणको रहेको छ।
प्रदर्शनी भाद्र १५ गतेसम्म भृकुटीमण्डपमा सञ्चालन हुनेछ।
Comments are closed.