नेपालमा विद्युतीय सवारीको बर्चस्व: चिनियाँ ब्रान्ड अग्रस्थानमा, पिकअप र लग्जरी सेग्मेन्टमा ईभी !

काठमाडौं । नेपालमा विद्युतीय सवारीसाधन ईभीको बजार पछिल्ला वर्षहरूमा तीव्र रूपमा विस्तार भएको छ। सस्तो कर प्रणाली, सरकारले ल्याएको प्रोत्साहन नीति, वित्तीय पहुँच तथा चिनियाँ ब्रान्डहरूको आक्रामक विस्तारले गर्दा अहिले नेपालमा नयाँ गाडी खरिदकर्ताहरूको रोजाइमा ईभी पहिलो विकल्प बन्दै गएको छ ।

आर्थिक वर्ष २०८०/८१ को पहिलो ११ महिनाको तथ्याङ्क अनुसार नेपालमा आयात भएका सवारीसाधनमध्ये ५७ प्रतिशत चार पांग्रे गाडी ईभी थिए । मुलुकभर १२ हजार ९७४ वटा गाडी आयात हुँदा त्यसमा ७ हजार ३४९ वटा ईभी थिए । मूल्यको हिसाबले हेर्दा ईभीले ६५ प्रतिशतभन्दा बढी हिस्सा ओगटेको छ ।

नेपालको ईभी बजारमा चिनियाँ कम्पनीहरूले झण्डै ७० प्रतिशत हिस्सा ओगटेका छन् । प्रमुख चिनियाँ ब्रान्डहरूमा BYD, Dongfeng Nammi, Deepal, Skywell, Omoda, र Zeekr रहेका छन् । यी ब्रान्डहरूले आफ्ना सस्तो, दिगो र प्रविधियुक्त मोडेलहरू नेपालमा भित्र्याउँदै व्यापक उपभोक्तामाझ पहुँच बनाएका छन् ।

भारतीय ब्रान्डको असर र लोकप्रिय मोडेल                                                                                                                                         भारतीय ब्रान्ड टाटा को Nexon EV नेपालमा सवारी मालिकहरूको लोकप्रिय छनोट बनेको छ । विशेषगरी मध्यम वर्गका उपभोक्तामा यसको मूल्य र सुविधाको अनुपातले स्थान बनाएको हो । साथै MG ZS EV, Hyundai Kona, BYD Dolphin, र Nammi 01 जस्ता मोडेलहरू पनि बजारमा राम्रो प्रतिक्रिया पाइरहेका छन् ।

पिकअप र कमर्शियल सवारीमा पारम्परिक आईसिई को दबदबा                                                                                                  हालैका वर्षमा ईभीको वर्चस्व बढे पनि ग्रामीण तथा निर्माण क्षेत्रमा प्रयोग हुने Tata Ace, Mahindra Bolero Pickup जस्ता डीजेल र पेट्रोलमा चल्ने पिकअप गाडीहरूको माग अझै उच्च छ । खासगरी पूर्वाधार निर्माण, ढुवानी तथा ट्याक्सी सेवामा यी गाडीहरूको भरपर्दो सेवा मानिएको छ ।

नेपालको लग्जरी EV सेग्मेन्टमा पनि विस्तार देखिएको छ । २०२४ को टेक्लेख EV अवार्डमा Deepal S07 ईभी लाई सर्वश्रेष्ठ SUV घोषणा गरिएको थियो। त्यस्तै Zeekr X EV लाई उत्कृष्ट प्रिमियम SUV र MG Cyberster लाई सर्वश्रेष्ठ स्पोर्ट्स ईभी मानिएको छ ।

साथै, Avatr 11 जस्तो ईभी , जसको मूल्य करसहित १ करोड ४५ लाख रूपैयाँ पुगेको छ, समेत नेपाल भित्रिएको छ । यसले देखाउँछ कि लग्जरी EV को माग पनि बढ्दो क्रममा छ ।

 बिक्री ट्रेण्ड (२०२०–२०२५)

 पछिल्लो ५ वर्षमा ईभी बिक्री दरमा २००–३०० प्रतिशतसम्मको बृद्धि भएको छ ।  सरकारले EV मा कर दर न्यून (१०–३०%) राखेर प्रोत्साहन गरेको छ। फाइनान्सिङ सहुलियत ९०% सम्म बैंक ऋण सुविधा उपलब्ध छ ।  साना ह्याचब्याकदेखि प्रिमियम SUV सम्मको ईभी छनोटले उपभोक्तालाई सजिलो बनाएको छ ।

नेपालमा ईभीको भविष्य उज्यालो देखिन्छ । खासगरी चिनियाँ ब्रान्डहरूको पहुँच, सरकारको सहयोग, र सार्वजनिक चासोले गर्दा ईभी अब लक्जरी होइन, मुख्यस्रावधार बन्न थालेको छ । पारम्परिक पिकअप र लग्जरी आईसिई  गाडीहरू अझै केही सेग्मेन्टमा चलिरहे पनि बजारको दिशा विद्युतीय युगतर्फ स्पष्ट रूपले अग्रसर छ ।