काठमाडौं । नेपाल ट्रक यातायात व्यवसायी महासंघले बागमती प्रदेशका नव नियुक्त मुख्यमन्त्री इन्द्रबहादुर बाँनिया, श्रम, रोजगार तथा यातायात मन्त्री जयराम थापा र सहकारी तथा गरिबी निवारण मन्त्री बिनु रायमाझी पौडेललाई बधाई ज्ञापन गरेको छ ।
महासंघका अध्यक्ष हिरालाल श्रेष्ठको नेतृत्वमा गएको टोलीले बागमती प्रदेश सरकारलाई सफल कार्यकालको शुभकामना दिँदै यातायात क्षेत्रसँग सम्बन्धित विभिन्न सुझावहरू राखेको हो ।
महासंघका महासचिव राजेन्द्र बिक्रम बानियाका अनुसार, संघीयता लागू भएको लामो समय बितिसक्दा पनि कतिपय ट्रक अझै अञ्चलगत नम्बर प्रणालीमै रहेकाले त्यसलाई प्रदेशगत प्रणालीमा रूपान्तरण गर्न आग्रह गरिएको छ । साथै, ट्रक प्रमिटका शुल्क फरक–फरक प्रदेशमा असमान रहेको विषयमा पनि महासंघले ध्यानाकर्षण गराएको छ ।
मधेश प्रदेशमा ट्रक प्रमिट लिन १० हजार रुपैयाँ लाग्ने तर बागमती प्रदेशमा १५ हजार रुपैयाँ लाग्ने भएकाले व्यवसायीहरू सस्तो हुने प्रदेशतर्फ आकर्षित भई बागमती प्रदेशको राजस्वमा कमी आएको महासंघको तर्क छ । यसबारे मुख्यमन्त्री बाँनियाले समस्या चाँडै समाधान गर्ने प्रतिबद्धता जनाएका छन् ।
त्यस्तै, महासंघले ट्रक तथा यातायात क्षेत्रसँग सम्बन्धित कतिपय कानुन संशोधनको आवश्यकता औंल्याएको छ । यसबारे मुख्यमन्त्री बाँनियाले विस्तृत छलफलपछि आवश्यक प्रक्रिया अघि बढाइने बताएका छन् ।
Comments are closed.