काठमाडौं । बहुप्रतिक्षित हुन्डाई क्रेटा ईभी नेपालमा सार्वजनिक भएको छ । काठमाडौंमा सोमबार आयोजित एक कार्यक्रमबीच क्रेटा इभी सार्वजनिक भएको छ ।
क्रेटा ईभी नेपाली बजारमा चारवटा भेरियन्टमा उपलब्ध भएको छ । जसअनुसार एक्ज्युकेटिभ भेरियन्टको मूल्य ५१ लाख ९६ हजार, स्मार्टको ५४ लाख ९६ हजार, स्मार्ट(ओ) को ५६ लाख ९६ हजार र प्रिमियम प्लसको ५९ लाख ९६ हजार कायम गरिएको छ ।
मिडसाइज एसयूभी सेग्मेन्टमा सबैभन्दा लोकप्रिय एसयूभी हुन्डाई क्रेटाको दमदार फिचर र एड्भान्स टेक्नोलोजीले इलेक्ट्रिक एसयूभी बजारमा नयाँ स्ट्यान्डर्ड स्थापित गर्ने कम्पनीले दावी छ । नेपाली बजारमा पहिलेदेखि नै आईसीई संस्करणको हुन्डाई क्रेटा लोकप्रिय रहेको र हुन्डाईका अन्य ईभी समेत चर्चित बनिरहेको समयमा क्रेटा ईभीले समेत नेपाली ग्राहकको विश्वास जित्ने अपेक्षा गरिएको छ ।
हुन्डाई क्रेटा ईभी ४२ किलोवाट ब्याट्री विकल्पमा उपलब्ध छ । ४२ किलोवाट ब्याट्रीले ३९० किलोमिटर रेन्ज प्रदान गर्न सक्षम हुनेछ । ब्याट्री डीसी फास्ट चार्जिङमार्फत १० प्रतिशतदेखि ८० प्रतिशतसम्म चार्ज हुन ५८ मिनेट मात्र लाग्ने बताइएको छ । यसलाई ११ किलोवाट एसी चार्जरले १० प्रतिशतदेखि १०० प्रतिशतसम्म चार्ज गर्न ४ घन्टा लाग्छ ।
क्रेटा ईभीको डिजाइन धेरै हदसम्म यसको आईसीई मोडेलसँग मिल्दोजुल्दो छ । यसको अगाडि एल–आकारको कनेक्टेड एलईडी डीआरएल र भर्टिकली स्ट्याक्ड ट्विन एलईडी हेडलाइट समावेश गरिएको छ । यसमा कम्पनीको लोगोको पछाडि चार्जिङ पोर्ट राखिएको छ । क्रेटा ईभीका लागि १७ इन्चको एरोडायनामिक अलोय ह्विल विशेष रूपमा डिजाइन गरिएको छ ।
हुन्डाई क्रेटा ईभीको इन्टेरियर डिजाइन यसको आईसीई संस्करण जस्तै देखिए तापनि यसमा केही आधुनिक फिचर थपिएको छ । यसमा १०.२५ इन्चको ड्युअल स्क्रिन र हुन्डाई आयोनिक ५ बाट प्रेरित नयाँ थ्री–स्पोक स्टेयरिङ ह्विल समावेश गरिएको छ । साथै भेइकल टु लोड टेक्नोलोजी, प्यानोरामिक सनरुफ र मल्टिपल ड्राइभिङ मोड जस्ता फिचरले यसलाई अझ विशेष बनाएको छ ।
सेफ्टीका लागि यसमा ६ वटा एयरब्याग, लेभल–२ एड्भान्स ड्राइभर असिस्टेन्ट सिस्टम, टायर प्रेशर मनिटरिङ कन्ट्रोल र इलेक्ट्रोनिक स्टेबिलिटि कन्ट्रोल जस्ता फिचरले सुसज्जित छन् ।
त्यसैगरी मेड इन नेपाल हुन्डाई क्रेटा पनि सार्वजनिक भएको छ । नेपालमा हुन्डाई भेन्यु पछि क्रेटा एसेम्बल भएर बजारमा आएको छ । नेपालमा बनेको क्रेटाको मूल्य साबिकको क्रेटामा भन्दा सस्तो भएको कम्पनीले जनाएको छ । इभी र आइस दुवै इन्जिनमा क्रेटा उपलब्ध भएसँगै ग्राहकले आफ्नो चाहना अनुसार छनोट गर्न सक्ने भएका छन् ।
Comments are closed.