काठमाडौं । बन्दीपुर केवलकार एण्ड टुरिजम लिमिटेडले भदौ ११ गतेदेखि सर्वसाधारणका लागि निष्काशनमा ल्याएको आईपीओमा आवेदन दिने आज अन्तिम दिन रहेको छ ।
यसअघि कम्पनीले आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपालीहरूका लागि आईपीओ निष्काशन गरी बाँडफाँट गरिसकेको थियो । अब दोस्रो चरणमा कम्पनीले सर्वसाधारण लगानीकर्ताका लागि आईपीओ बिक्री खुला गरेको हो ।
कम्पनीले जारी पूँजी २ अर्ब ८३ करोड रुपैयाँमध्ये २०.७०६७ प्रतिशत अर्थात् ५८ करोड ६० लाख रुपैयाँ बराबरको ५८ लाख ६० हजार कित्ता शेयर निष्काशन गर्ने अनुमति पाएको छ । यसमध्ये ५ लाख ६६ हजार कित्ता स्थानीय बासिन्दा, ५ लाख २९ हजार ४०० कित्ता वैदेशिक रोजगारीमा रहेका नेपालीहरू, १ लाख ५८ हजार ८२० कित्ता कर्मचारी, र २ लाख ६४ हजार ७०० कित्ता सामूहिक लगानी कोषका लागि छुट्याइएर बाँडफाँट भइसकेको छ ।
सर्वसाधारण लगानीकर्ताका लागि भने प्रतिकित्ता १०० रुपैयाँ अंकित मूल्यका ४३ करोड ४१ लाख ८ हजार रुपैयाँबराबरको ४३ लाख ४१ हजार ८० कित्ता शेयर निष्काशन गरिएको हो । यसमा न्यूनतम १० कित्ता र अधिकतम २० हजार कित्तासम्म आवेदन दिन सकिनेछ ।
कम्पनीलाई केयर रेटिङ नेपालले ‘केयर एनपी डबल बी’ इश्युअर रेटिङ प्रदान गरेको छ, जसले कम्पनीको दायित्व बहन गर्ने क्षमतामा औसत जोखिम रहेको संकेत गर्छ ।
बन्दीपुर केवलकार एण्ड टुरिजमले सञ्चालन गर्न लागेको आयोजनाको अनुमानित लागत ३ अर्ब ८५ करोड रुपैयाँ रहेको छ । उक्त आयोजनाको साधारण लगानी फिर्ता हुने अवधि ८.२२ वर्ष र डिस्काउन्टमा लगानी फिर्ता हुने अवधि १०.०५ वर्ष तोकिएको छ ।
यस आईपीओको निष्काशन तथा बिक्री प्रबन्धक नेपाल एसबिआई मर्चेन्ट बैंकिङ लिमिटेड रहेको छ । लगानीकर्ताले नेपाल धितोपत्र बोर्डबाट अनुमति प्राप्त आस्बा सेवामा सहभागी बैंक तथा वित्तीय संस्थामार्फत वा सिडिएस एण्ड क्लियरिङ लिमिटेडको मेरो शेयर अनलाइन प्रणालीमार्फत आवेदन दिन सक्नेछन् ।
Comments are closed.