‘विपन्न परिवारको जीवनस्तरलाई माथि उठाउन सफल छौं’

संजय कुमार मण्डल, प्रमुख कार्यकारी अधिृकत, जीवन विकास लघुवित्त वित्तीय संस्था लि.

मोरङको कटहरिमा प्रधान कार्यालय रहेको जीवन विकास लघुवित्त वित्तीय संस्था लि.ले यही असार ११ गतेबाट सर्वसाधरणका लागि आइपिओ निश्कासन गर्दैछ । नेपाल राष्ट्र बैंकबाट ‘घ’ वर्गको इजाजत प्राप्त राष्ट्रियस्तरको संस्थाले प्रदेश १, २ र बागमती प्रदेशका १९ जिल्लामा १ सय ३८ वटा शाखाबाट वित्तीय सेवा प्रदान गरिरहेको छ । यसैक्रममा संस्थाको वित्तीय अवस्था लगायत विविध विषयमा केन्द्रित रहेर संस्थाका प्रमुख कार्यकारी अधिकृत संजय कुमार मण्डलसँग आर्थिक आवाजले गरेको कुराकानी :

जीवन विकास लघुवित्त वित्तीय संस्था लि.ले कहिलेदेखि वित्तीय सेवा प्रदान गरिरहेको छ ?
गैर सरकारी संस्था जीवन विकास समाजद्वारा प्रबर्धित जीवन विकास लघुवित्त वित्तीय संस्था लिमिटेडले नेपाल राष्ट्र बैंकबाट ‘घ’ वर्गको इजाजत प्राप्त गरेको छ । संस्थाले राष्ट्रियस्तरको वित्तीय संस्थाको रुपमा इजाजत प्राप्त गरी २०७५ फागुन १६ गते देखि वित्तीय सेवा प्रदान गरिरहेको छ । यस वित्तीय संस्था र सल्भ लघुवित्त वित्तीय संस्था लि. धनकुटा तथा गरिबी न्युनीकरण लघुवित्त वित्तीय संस्था लि. राजविराज बीचमा मर्जर भई २०७७ भदौ २२ गतेदेखि एकीकृत कारोवार प्रारम्भ भएको हो ।

संस्थाको वित्तीय अवस्था कस्तो छ ?
अब संस्थाको जारी पुँजी ६० करोड ८४ लाख रुपैयाँ पुग्दैछ । जारी पुँजीको ३२.५० प्रतिशतले हुन आउने १९ करोड ७७ लाख ३० हजार रकम बराबरको प्रतिशेयर १०० अंकित दरको १९ लाख ७७ हजार ३ सय कित्ता साधारण सेयर यही असार ११ गतेबाट निस्कासन हुँदैछ । संस्थामा आबद्ध कुल सदस्य संख्या २ लाख ९३ हजार ४ सय ६९ छ भने ऋणि सदस्य संख्या १ लाख ९९ हजार १ सय ७६ छ । २० अर्ब १७ करोड भन्दा बढी लगानीमा रहेको ऋण छ । बचत ७ अर्ब ७२ करोड भन्दा बढी छ । प्रदेश १, २ र बागमती प्रदेशका १९ जिल्लामा १ सय ३८ वटा शाखाबाट हामीले वित्तीय सेवा प्रदान गरिरहेका छौं ।

संस्थाले के–कस्ता सेवाहरु प्रदान गरिरहेको छ ?
गरीबी रहित नेपाल निर्माणको मूल ध्येयका साथ हामी अगाडि बढेका छौं । यस वित्तीय संस्थाले ग्रामीण क्षेत्रका विपन्न परिवारको जीवनस्तरलाई माथि उठाउन विभिन्न किसिमका सेवाहरु प्रदान गर्दै आइरहेको छ । आर्थिक असमानतालाई न्युनीकरण गर्दै शहरमा उपलब्ध हुने सुविधाहरु ग्रामीण क्षेत्रसम्म विस्तार गर्ने अभिप्रायले यस वित्तीय संस्थाले विभिन्न प्रकारका वित्तीय सेवाहरु जस्तै वचत, ऋण, वीमा तथा रेमिटान्स लगायतका प्रदान गरिरहेका छौं । वित्तीय संस्थाले आफ्नो वार्षिक योजना बमोजिम सम्बन्धित निकायहरुको सहयोग तथा सहकार्यमा शिक्षा, स्वास्थ्य, कृषि, उर्जा, रोजगारी विकास लगायतका क्षेत्रमा समेत कार्य गरिरहेको छ ।

संस्थाको मुख्य लक्ष्य के छ ?
गरिब तथा विपन्न बर्गको जीवनस्तर उकास्नका लागि विशेष योगदान पुर्याउने हाम्रो लक्ष्य तथा उद्देश्य हो । हामी त्यसैमा केन्द्रित भएर लगानी गरिरहेका छौं । संस्थामा ऋण लिएर सफल व्यवसायी तथा उद्यमीहरु बनेको धेरै उदाहरण तथा सफलताका कथाहरु प्रशस्त छन् । आगामी दिनमा पनि हामी यही अभियानमा सक्रियताका साथ लाग्नेछौं । पैसा तथा ऋण लगानी गरेर मात्रै ऋणिको जीवनस्तर उकासिदैन । त्यसका लागि हामी अवारनेस कार्यक्रमलाई पनि जोड दिन्छौं । व्यवसाय आफ्नो ठाउँमा छ, त्यो भन्दा बढी हामी सामाजिक भएर काम गर्छौं ।

कोरोना महामारीको समयमा कसरी सेवा प्रदान गरिरहनुभएको छ ?
प्रविधिलाई प्रयोग गरेर कोरोना महामारीको समयमा पनि हामीले निरन्तर सेवा प्रदान गरेका छौं । नगद रहित बैंकिङ सेवाको विकास र प्रवद्र्धनका लागि वित्तीय संस्थाले सदस्यहरुलाई डिजिटल कारोबार तर्फ उत्प्रेरित गर्दै ग्रामीण क्षेत्रमा सरल र सहज ढंगले वित्तीय सेवा विस्तार गरिरहेको छ । सदस्य तथा समुदायको हितलाई प्राथमिकतामा राखी समाज विकासमा सकारात्मक प्रभाव पार्ने किसिमका नविनतम सेवाहरु अध्ययन गरी समयसापेक्ष सेवा सुविधाहरु प्रदान गरिरहेको छ । यतिबेला प्रविधिको अधिकतम प्रयोग गरी हामीले सेवालाई सूचारु राखेका छौं ।

लगानीकर्तालाई कति प्रतिफल दिने उद्देश्य छ ?
अहिलेसम्म पनि हामीले बोनससमेत बाँडेका छौं । संस्थाका सबै सूचकहरु राम्रा छन् । विश्वस्त संस्थाको रुपमा काम गर्न सफल छौं । संस्था बलियो छ भन्ने प्रमाण हाम्रो ब्यालेन्ससिट नै हो । नियमानुअनुसार हामीले हाम्रा लगानीकर्तालाई आकर्षक प्रतिफलसमेत दिन सक्नेछौं ।

अन्त्यमा, के भन्न चाहुनुहुन्छ ?
यस वित्तिय संस्थामा आवद्ध भई अनुशासन, लगनशिलता र इमान्दारीपूर्वक निरन्तर रुपमा कारोवार गर्दै साथ र सहयोग प्रदान गर्ने सदस्य तथा परिवारजनप्रति हार्दिक कृतज्ञता व्यक्त गर्न चाहान्छु । नियमनकारी निकाय, सरकारी÷गैरसरकारी संस्था, सरोकारवाला निकाय, बैंक तथा वित्तीय संस्थाका पदाधिकारी, शेयरधनी, संचालक समितिका पदाधिकारी, कर्मचारी तथा शुभचिन्तक एवं आजसम्मको यात्रामा प्रत्यक्ष तथा अप्रत्यक्ष रुपमा साथ र सहयोग गर्नुहुने सम्पूर्णप्रति हार्दिक आभार व्यक्त गर्दै विगतमा झै यस संस्थालाई सफलताका साथ अगाडि बढाउन आगामी दिनमा पनि यहाँहरुको सल्लाह, सुझाव सहित साथ र सहयोगको अपेक्षा गर्दछु ।

सम्बन्धित खवर
टिप्पणिहरु
Loading...