केदार पौडेल
अध्यक्ष, स्थानीय यातायात प्रा.लि
अध्यक्ष, यातायात व्यवसायी राष्ट्रिय महासंघ, जिल्ला समन्वय समिति कास्की
यातायात व्यवसायीले सरकारलाई विभिन्न तरिकाले सहयोग गर्दै आएका छन् । सरकारले हामीले अपेक्षा गरे अनुसारको सम्बोधन बजेटमा गरेको छैन । व्यवसायीको पीडामा मलम लगाउनुपर्ने समयमा सरकारले नुन छर्केको हामीलाई महसुस भएको छ । सरकार तथा सम्वन्धित निकायले ध्यान दिनु आवश्यक छ ।
यातायात व्यवसाय सरकारको महत्वपूर्ण अंग हो भन्दा पनि फरक पर्दैन । व्यवसायलाई जीवन्तता प्रदान गर्न सरकारले पहल गर्नु आवश्यक छ । कोरोना महामारीले यातायात व्यवसायलाई निकै ठुलो असर पारेको छ । व्यवसायी हतोत्साहित भएको अवस्था छ । व्यवसायीहरु मात्रै होइन यातायात मजदुरहरु पनि समस्यामा छन् ।
गण्डकी प्रदेशमा सबै स्थानमा कसरी यातायातको सहज पहुँच पु¥याउन सकिन्छ भन्ने सवालमा हामी क्रियाशील हुन चाहन्छौं र सहयोग गर्नेछौं । यसका लागि प्रदेश सरकार, स्थानीय निकाय, नागरिक समाज, संचार क्षेत्र सबैले पहलकदमी लिएमा होस्टेमा हैसे गर्न हामी तयार छौं ।
विश्वव्यापी रुपमा फैलिएको कोरोना महामारीको प्रभाव नेपालमा समेत दिनप्रतिदिन बढिरहेको छ । सरकारको पहिलो प्राथमिकता आम नागरिकको स्वास्थ्य नै हो । यद्यपि, लकडाउनले मात्रै समस्याको समाधान गर्दैन भन्ने स्पष्ट भइसकेको छ । यस अवस्थामा सरकार जिम्मेवार बनेर निजी क्षेत्रलाई अब चलायमान गराउनतर्फ लाग्नुपर्छ । स्वास्थ्य सचेतना अपनाएर सुरक्षित यात्रा गर्न पाउनुपर्ने नागरिकको अधिकारलाई समेत राज्यले लामो समय हनन् गर्न मिल्दैन ।
(कुराकानीमा आधारित)
Comments are closed.