काठमाडौं । नेपालको डिजिटल भुक्तानी क्षेत्रमा ऐतिहासिक कदम उठाउँदै प्रमुख दुई सेवा प्रदायक कम्पनी खल्ती र आईएमई पे ले भोलि साउन १ गते बाट औपचारिक रूपमा मर्ज भएर एकीकृत सेवा सञ्चालन गर्ने घोषणा गरेका छन् ।
नेपाली डिजिटल भुक्तानी क्षेत्रमा लामो समयदेखि अग्रणी भूमिका खेल्दै आएका यी दुवै कम्पनीले आफ्नो प्राविधिक दक्षता, पहुँच र ग्राहक सुविधालाई अझ प्रभावकारी बनाउन मर्जको निर्णय लिएका हुन् । मर्जपछि, ग्राहकहरूले एउटै एपमार्फत दुवै कम्पनीका सेवा तथा सुविधा सहज रूपमा प्रयोग गर्न सक्नेछन् ।
मर्जपछि नयाँ संयुक्त एपमार्फत मोबाइल रिचार्ज, बिल भुक्तानी, अनलाइन खरिद, सरकारी सेवा शुल्क तिर्ने, अन्तर्राष्ट्रिय रेमिट्यान्स सेवा लगायतका सुविधा एउटै प्लेटफर्मबाट प्राप्त गर्न सकिनेछ । यसबाहेक, ग्राहकहरूले विभिन्न आकर्षक अफर र बोनस स्किमहरूको पनि लाभ उठाउन सक्नेछन् ।
हाल खल्ती र आईएमई पे मिलाएर ७० लाखभन्दा बढी सक्रिय प्रयोगकर्ता छन् । मर्जपछि यो संख्या तीव्र गतिमा वृद्धि हुने विश्वास गरिएको छ । नयाँ संयुक्त सेवा सुरु भएपछि प्रयोगकर्ताहरूलाई अपडेटबारे एसएमएस र एप नोटिफिकेशनमार्फत जानकारी गराइनेछ ।
नेपाल राष्ट्र बैंकले पनि डिजिटल भुक्तानीको प्रवर्द्धन गर्ने नीतिलाई प्राथमिकता दिइरहेका बेला यस्तो मर्जरले वित्तीय पहुँच अभिवृद्धि गर्न, नगदरहित कारोबारलाई प्रवर्द्धन गर्न र समग्र आर्थिक प्रणालीलाई आधुनिक बनाउन ठूलो टेवा पुर्याउने अपेक्षा गरिएको छ ।
मर्जसँगै कम्पनीले नयाँ लोगो, ब्रान्डिङ र थप नयाँ सेवाहरू पनि क्रमशः सार्वजनिक गर्ने बताइएको छ । कम्पनीहरूले सबै ग्राहकलाई साउन १ गतेबाट सुरु हुने नयाँ अनुभवको फाइदा लिन आह्वान गरेका छन् । अधिक जानकारीका लागि खल्ती र आईएमई पेको आधिकारिक वेबसाइट तथा सामाजिक सञ्जालमार्फत अपडेट हेर्न अनुरोध गरिएको छ ।
Comments are closed.