महोत्सवको उद्घाटन भव्य भएको छ, आगामी दिनमा पनि आकर्षण कायम रहनेछ

राजेन्द्र ओझा
वरिष्ठ उपाध्यक्ष, लेखनाथ उद्योग वाणिज्य संघ

लेखनाथ महोत्सवले कृषि तथा स्थानीय उत्पादनको प्रवद्र्धन तथा बजारीकरणमा जोड दिदै आएको छ । लेखनाथ तथा यस आसपासका क्षेत्रको पर्यटन प्रवद्र्धनका लागि पनि महोत्सव फलदायी बन्दै आइरहेको छ । महोत्सव आफैमा पनि आन्तरिक तथा बाह्य पर्यटकको आकर्षण बन्ने गरेको छ । जसले गर्दा यहाँको पर्यटन प्रवद्र्धनमा पनि महोत्सवको योगदानलाई सकारात्मक मान्न सकिन्छ ।

लोपोन्मुख जातजातिका भेषभुषा तथा रहनसहनको प्रत्यक्ष अवलोकन लेखनाथ महोत्सवमा गर्न पाइन्छ भने परम्परागम सामग्रीहरु पनि महोत्सवमा प्रदर्शनीमा राखिएको हुन्छ । महोत्सवमा अटो, शैक्षिक प्रदर्शनी, कृषि, किचन, मेसिनरी, ह्याण्डिक्राफ्ट, गार्मेन्ट, जनरल, फुड एण्ड वेभरेज, डेरी, सूचना तथा प्रविधि, रेष्टुरेण्ट, बैंक तथा वित्तीय संस्थाका स्टलहरु रहनेछन् ।

महोत्सवमा औद्योगिक ब्यापार मेला, हस्तकलाका सामानहरुको प्रदर्शनी तथा बिक्री, दैनिक उपभोग्य वस्तु तथा खाद्यान्नको प्रदर्शनी तथा बिक्री, विद्युतीय उपकरणहरुको प्रदर्शनी तथा बिक्री हुनेछ । महोत्सवमा सूचना प्रविधि तथा सञ्चारका उपकरणहरु, पर्यटन तथा लेखनाथ क्षेत्रका गतिविधिहरु पनि प्रदर्शनी हुन्छन् । फुड फेष्टिवल, अटोमोबाइल प्रदर्शनी, वित्तीय तथा अन्य सेवामूलक संघसंस्थाको सेवा तथा जानकारी पनि महोत्सवमा रहनेछन् । विभिन्न सांस्कृतिक कार्यक्रम महोत्सवमा संचालन हुन्छन् । रत्यौली गीत प्रतियोगिता, लोक गीत, कन्सर्टबाट दर्शकले मनोरञ्जन लिनसक्नुहुनेछ ।

समग्रमा भन्नुपर्दा लेखनाथ क्षेत्र, पोखरा र गण्डकी प्रदेशसहित देशको आर्थिक गतिविधि चलायमान बनाउन महोत्सवको योगदान रहनेमा हामी विश्वस्त छौं । महोत्सवको पनि महोत्सव भनेर लेखनाथ महोत्सवले पहिचान बनाएको छ । यो पहिचान आगामी दिनमा अझ बढ्दैजाने छ । यस पटकको महोत्सव बिगतमा भन्दा पनि अझै बढी उत्कृष्ट हुनेमा हामी आशावादी छौं । महोत्सवको उद्घाटन भव्य र शभ्य रुपमा सम्पन्न भएको छ । आगामी दिनमा पनि त्यस्तै आकर्षण कायम रहनेमा हामी विश्वस्त छौं ।