काठमाडौं । रामेछापको मन्थलीबाट लुक्लाको उडानहरु पुनः सुचारु भएका छन् । मौसम खराबीका कारण ५ दिनसम्म उडान हुन सकेको थिएन । ५ दिनदेखि रामेछापमा अलपत्र परेका पर्यटकहरु उडान सुचारु भएसँगै लुक्ला हुँदै आफ्नो गन्तव्य तर्फ जान पाएका छ्न ।
लगातार ५ दिनसम्म मौसम नखुल्दा लुक्ला हुने उडान ठप्प थियो । पर्यटक मौसम शुरु भएसंगै बिगतमा काठमाडौंबाट लुक्लाका लागि हुँने गरेको उडानहरु केहि वर्षदेखि रामेछापबाट हुँदै आएको छ । नेपाल नागरिक उड्डयन प्राधिकरणले रामेछाप लुक्ला उडानका लागि आवश्यक पुर्वाधारहरु बनाएसंगै उडानहरु सहज भएको छ । थप सुधारका काम हरु हुँदै आएको प्राधिकरणले जनाएको छ।
लुक्लाबाट उडान गर्ने वायुसेवा कम्पनीहरुले रामेछाप र लुक्लामा तत्कालका लागि ब्यागेज एक्सरे मेसिनको माग गरेका छन । हाल यी बिमानस्थलहरुमा एक्सरे मेसिन नहुंदा ब्यागेज तथा सरसामानहरु हातैले खानतलासी गर्नु परेको छ । यसले गर्दा समय बढी लाग्ने र पर्यटकले मिलाएर ल्याएका सामान पुन प्याक गर्नु पर्दा झन्झटिलो हुने गरेको छ । यस बिमानस्थलबाट तारा, समिट र सिता एअरले उडान गर्दै आएका छन् ।
सफा मौसममा दैनिक ४० भन्दा बढी उडान हुने गरेको छ । लुक्ला बिमानस्थलमा आज तारा एअरले १५ वटा उडान गर्ने तालिका रहेको तारा एअरका प्रवक्ता सुदर्शन बर्तौलाले जानकारी दिए । ५ दिनदेखि मौसममा सुधार नहुँदा उडान हुन पाएका थिएनन् र केही पर्यटकहरु फाप्लुको उडान मार्फत हिंडेरै लुक्ला हुँदै सगरमाथा क्षेत्रमा लागेका थिए । केही हेलिकप्टर मार्फत उडान गरि गन्तव्यतर्फ लागेका थिए ।
‘आज मौसम खुलेसंगै उडान सहज भएको छ । हाम्रो जहाज तथा जनशक्ति सबै मन्थली बिमानस्थलमै थिए आज बिहानैदेखि उडानहरु सुचारु भइरहेका छन्,’ बर्तौलाले भने ।
Comments are closed.