संख्यात्मक हिसाबमा हेर्ने हो भने सडकमा फोर ह्व्लिरर्सभन्दा टु ह्व्लिर्स सवारी साधन नै धेरै चल्छन् । दुर्घटनाको हिसावले १७ देखि ३५ वर्ष उमेर समूहका व्यक्ति धेरै दुर्घटनामा पर्छन् । हामीले दुर्घटना कम गर्नका लागि रिफोर्समेन्ट र चेक जाँचको काम गरिरहेका छौंैं । सवारी साधनको अवस्था के कस्तो छ भनेर यान्त्रिक परीक्षण गर्छौं । काठमाडौंबाट हेटौंडा विरगञ्ज चल्ने गाडीहरु र भक्तपुरको जगतेमा पूर्वतिर जाने तथा र्यान्डम्ली चेक गरेका छौं । चेकजाँच गरेपछि सवारी साधनको अवस्था हेर्दा धेरैमा सुधारको आवश्यकता देखिन्छ ।
ड्रिङ्क एण्ड ड्राइभलाई रोक्ने भनेर २०६८ बाट परीक्षण सुरु भएको हो । त्यसलाई निरन्तरता दिनुका साथै लागु पदार्थ सेवनगरी सवारी सञ्चालन गरेका छन् वा छैनन् भनेर नियमित रुपमा चेक गरिरहेका छौं । स्कुल, कलेजका विद्यार्थी तथा समुदायस्तरमा सहकार्य गरेर कार्यक्रम गर्दैछौं । सूचना र सचेतनाको हिसाबले हेर्ने हो भने इन्फोर्समेन्ट पनि आफैमा सचेतना हो ।
मादक पदार्थ सेवन गरी सवारी चलाएको, लेन ब्रेक गरेको र ट्राफिक बत्ती पालना नगरेकालाई सचेतना कक्षा दिन्छौं । सचेतना कक्षा र दैनिक हाम्रो इन्फोर्समेन्टको कुरा गर्ने हो भने दैनिक २ हजार ५ सयदेखि ४ हजारसम्मलाई कारवाही गरिरहेका हुन्छौं । कारवाही आफैंमा पनि सचेतना हो । मैले यो गर्नु हुँदैन भनेर चालक आफैले पनि सोच्नुपर्छ । यो जिम्मेवारी ट्राफिक प्रहरीको मात्र नभई प्रत्येक व्यक्तिको जिम्मेवारी हो ।
पैदलयात्रीले पनि जता मन लाग्छ उतैबाट बाटो काटिरहेको पाइन्छ । पैदलयात्रीले आकाशे पुलबाट बाटो काट्नुपर्नेमा सडकबाट सिधैंबाटो काट्ने गरेका छन् । हामीले पैदल यात्रीलाई पनि ट्राफिक नियम पालना गर्न भनिरहेका छौं र सचेत गराउछौं ।
पानी बोक्ने ट्याङकरले पानी चुहाएर बाटो बिग्रियो भनेर सडक विभागबाट हामीलाई पत्र आएको थियो । हामीले अनुसन्धान गरेर कारवाहीको दायरामा ल्याएका छौं । सुरक्षित सवारी आवागमन होस् भन्ने नै हाम्रो उद्देश्य हो । सचेतनाका हिसाबमा पनि हामीले विभिन्न काम गरिरहेका छौं । कुनै एक संस्थामात्र लागेर काम गरेर हुँदैन । यसमा सबैको सहभागिता आवश्यक हुन्छ । सवारी चालक, पैदल यात्री सबै सचेत हुनुपर्छ ।
सार्वजनिक सवारीका हकमा हामीले ढोका खुला राखेर चलाएमा पनि कारवाही गर्छौं । यस विषयमा हामीले सम्वन्धित निकायसँग पनि छलफल गरेका छौं । जुन हिसाबले कारवाही गरिएको संख्या देखिन्छ त्यो हेर्दा कोहीपनि जिम्मेवार नभएको देखिन्छ । हामीले सबैबाट सहयोगको अपेक्षा गरेका छौं ।
जथाभावी पेटी तथा बाटोमा गाडी पार्किङ गरिरहेको पाउँछौं । पार्किङलाई व्यवस्थित गर्न सक्यौं भने बाटो पनि खुला हुन्छ । सवारी साधन संचालन तथा पैदल यात्रीलाई पनि सहज हुन्छ । हामीले सोही अनुसार काम पनि गरिरहेका छौं । बेसमेन्टहरु पार्किङका लागि प्रयोगमा आइनसकेको अवस्था छ । बेसमेन्टलाई पार्किङको रुपमा प्रयोग गर्नुपर्ने अभियानमा छौं । बानेश्वरबाट हामी यसको शुरुवात गर्छौं । पार्किङलाई व्यवस्थित गरियो भने खुला ठाँउको प्रयोग पनि गर्न सकिन्छ ।
भर्खरै मात्र यातायात व्यवस्था विभागमा मिटिङ गरेका थियौं । टिकटको अग्रिम बुकिङ गर्ने, १४ स्थानमा हेल्प डेस्क राख्ने, अनुगमन गर्ने, चालकको अवस्था जाँच गर्ने लगायतका निर्णय भएका थिए ।
मापसे चेकजाँच र रोकथामको सन्दर्भमा हामीले पछिल्लो चरणमा विभिन्न प्राक्टिस पनि गरिरहेका छौं । यात्रु बोक्ने सार्वजनिक सवारी साधन चालकले मादक पदार्थ सेवन गरेर सवारी चलाउँदा पहिला कक्षा मात्र लिएर छाड्ने गरेका थियौं अहिले मुद्धा चलाउँछौं । जसले सार्वजनिक सवारी राख्नुहुन्छ तथा चलाउनुहुन्छ उहाँहरुलाई यो सूचना पुगेको छ । सवारी चालकलाई मादक पदार्थ सेवन नगरी चलाउन भन्छौं कतिपय चालक झगडा पनि गर्नुहुन्छ । एउटा चालकको हातमा धेरै जनाको ज्यानको सुरक्षाको कुरा हुन्छ । सार्वजनिक मात्र नभई निजी तथा विद्यालयका सवारी साधन पनि हामीले जाँच गर्छौं । चालकलाई सचेत गराउने जिम्मेवारी छाता संगठनहरुको पनि हुन्छ । चालकले मादक पदार्थ सेवन गरेको थाहा पाएमा अन्य व्यक्तिले पनि हामीलाई सूचना दिनसक्नुहुन्छ ।
उपत्यका ट्राफिक कार्यालय काठमाडौंका प्रमुख चौधरीसँग गरिएको कुराकानीमा आधारित
Comments are closed.