‘नाडा अटो शोले अर्थतन्त्रमा नयाँ भाइब्रेसन ल्याउँछ’

नाडा अटोमोबाइल एसोसिएसन अफ नेपालद्वारा आयोजित १५औं संस्करणको ‘नाडा अटो शो’ काठमाडौंको भृकुटी मण्डपमा जारी छ । भदौ २६ गते सुरु भएको अटो शो ३१ गतेसम्म चल्नेछ । कोभिडका कारण ४ वर्षदेखि नाडा अटो शो हुन सकेको थिएन । यद्यपि, गत वर्ष इभी शो भएको थियो । यसैक्रममा नाडा अध्यक्ष डा. ध्रुव थापासँग अटो शोमा केन्द्रित रहेर आर्थिक आवाजले गरेको कुराकानीः

नाडा अटो शो जारी छ । दर्शकको आकर्षण कस्तो छ ?

विभिन्न समस्या तथा चुनौतिका बाबजुत पनि हामीले नाडा अटो शो गरेका छौं । नाडा अटो शोमा सुरुको दिनदेखि नै दर्शकको आकर्षण देखिएको छ । हरेक स्टलमा अवलोकनकर्ताको भिड देख्न सकिन्छ । भदौ ३१ गतेसम्म नै दर्शकको आकर्षण कायम रहनेमा हामी विश्वस्त छौं ।

अटो शोले व्यवसायलाई चलायमान बनाउन सघाउला ?

देशको आर्थिक मन्दीलाई उकास्न पनि यसले सहयोग पुर्याउँछ । अटो क्षेत्र यस्तो क्षेत्र हो जुन क्षेत्रले सरकारलाई राजस्व पनि धेरै बुझाउँछ । नाडा अटो शोमा अर्बौंको कारोबार हुने भएकाले व्यवसायी पनि उत्साही भएको पाएका छौं । अर्थतन्त्र पनि चलायमान बनाउँछ । यसले बजारमा नयाँ भाइब्रेसन पनि क्रिएट गर्छ ।

अटो शोमा गाडी खरिद गर्दा ग्राहकलाई के फाइदा हुन्छ ?

अटो शोसँगै नयाँ मोडलमा गाडी आयात भएका छन् । अटो शो लगत्तै फेस्टिभ सिजन पनि सुरु भएको छ । अटो शोमा नयाँनयाँ ब्राण्ड तथा मोडलका गाडी आयात भएर नेपालमा लन्च भएका छन् । अटो शोमा नै गाडी किनौं भन्ने सोच धेरै जनामा पाइन्छ । किन भने यो समयमा पाइने अफर अन्य समयमा पाइदैन । अरु बेलाको अफर व्यवसायीले मात्र दिने गरेका छन् । अटो शोमा उत्पादक कम्पनीहरुले पनि अफर दिनुपर्छ भनेर हामीले अफर ल्याउन भन्छौं । ग्राहकले दुवै अफरको सदुपयोग गर्न पाउनुहुन्छ ।

नाडा अटो शो बिगेष्ट शो नै हो ?

देशव्यापी रुपमा मानिस अटो शो भिजिट गर्न आउनुहुन्छ । किन भने यो अवसर अन्य कुनै समयमा पनि आउँदैन । एकै ठाउँमा धेरै भेराइटीका ब्राण्ड तथा मोडलका सवारी साधनबारे जानकारी लिन तथा अवलोकन गर्न सकिन्छ । बिगत ३/४ वर्षसम्म नभएर अहिले नाडा अटो शो भएको छ । यसमा आउने सम्पूर्ण मोडल नयाँ हुन्छन् । गत वर्ष इभी शो मात्र गर्दा पनि करिव ४० हजार अवलोकनकर्ता आउनु भएको थियो । यो पटक हामीले वृहत शो गरेका छौं र अवलोकनकर्ताको सहभागिता पनि अझै उत्साहजनक छ । संसारका विभिन्न देशका गाडी उत्पादक कम्पनीबाट पनि भिजिटर आउनुभएको छ । आर्थिक हिसाबले तथा भिजिटर आउने तथा कारोबारका हिसाबले यो नेपालकै बिगेस्ट शो हो ।

अन्त्यमा के भन्नुहुन्छ ?

हामीले व्यवस्थापनमा पनि चुस्तता ल्याएका छौं । भिडभाड धेरै हुने भएकाले अनलाइन टिकेटिङ सिस्टम बनाएका छौं । यसमा क्यास ब्याक अफर पनि राखेका छौं । पार्किङलाई पनि व्यवस्थित बनाएका छौं । पिक अप र ड्रपमात्र भृकुटी मण्डपमा गर्न सकिन्छ । पार्किङका लागि विभिन्न स्थान छुट्याएका छौं । पार्किङ पछि अटो शो स्थलमा आउँदा निःशुल्क सटल बसको व्यवस्था गरेका छौं । बिहान १० बजेदेखि साझँ ७ बजेसम्म सटल बस चल्छ । जसजसले अटो शो अवलोकन गर्नुभयो उहाँहरुप्रति हामी आभारी छौं । आउन बाँकी हुनुहुन्छ भने भदौ ३१ गतेसम्म अटो शो आउनुहुन निमन्त्रणा गर्दछु ।