काठमाडौं । सरकारले आगामी आर्थिक वर्षको बजेट सार्वजनिक गरेदेखि नै घट्न थालेको सेयर बजारमा बुधबार नौ दिनमा पहिलोपटक सकारात्मक सूचक देखा परेकोमा आज फेरि बजरा ओरालो लागेको छ ।
सरकारले आर्थिक वर्षको बजेट यही जेठ १५ गते सार्वजनिक गरेको थियो । बजेट सार्वजनिक भएदेखि नै सेयर बजार घट्दै गएको थियो । हिजो भने ६० अंक बढीले बढेको नेप्से आज फेरि दोहोरो अंकले घटेको छ ।
बजेट पछि पहिलोपटक बढेको सेयर मार्केटले लगानीकर्तामा आशाको किरण देखिए पनि त्यो धेरै दिन टिक्न पाएन । आज फेरि लगानीकर्ता निराश भए ।
आज सेयर बजार परिसूचक नेप्से १७ दशमलव ५८ अंकले घटेर दुई हजार ६२ दशमलव ८६ विन्दुमा झरेको छ । आज सबै समूहको सेयर घटेकोमा विकास बैंक, जलविद्युत्, बीमा र उत्पादन समूहको सेयर उच्च अंकले ओरालो लागेको छ ।
आज दुई सय २९ वटा कम्पनीको ४१ लाख ५६ हजार कित्ता सेयर किनबेच हुँदा कुल एक अर्ब ४२ करोड २६ लाख रुपैयाँको कारोबार भएको छ । आज सबैभन्दा धेरै कुमारी बैंकको ६ करोड ७४ लाख रुपैयाँको सेयर किनबेच भएको छ भने, सिंगटी हाइड्रो र समिट लघुवित्तको सेयर पाँच प्रतिशतभन्दा धेरैले घटेको छ ।
Comments are closed.