काठमाडौं । नयाँ वर्षलाई सबैले नयाँ उमङ्ग, उत्साह र योजनाका साथ लिन्छन् । वर्षभरिको एउटा सिङ्गो पाटोलाई कसरी सक्रिय, सुखी र सत्कर्ममय बनाउने भन्ने अवसर हो नयाँ वर्ष आरम्भको क्षण । त्यसैले यो अवसरलाई उत्सवका रुपमा मनाउने गरिन्छ । संसारभर महत्वका साथ हेरिने अङ्ग्रेजी नयाँ वर्ष जनवरी १ र अघिल्लो रात अर्थात न्यू इयर इभ’ लाई विभिन्न तरिकाले मनाउने गरिन्छ । नयाँ वर्षलाई स्वागत गर्ने विश्वभरका आ–आफ्ना तरिका छन् ।
विश्वका विभिन्न मुलुकमा भएका अभ्यासलाई हेर्ने हो भने आफन्तजन, साथीभाई र सर्वसाधारण भेला भएर खानपीन, पड्का, रङगीचङगी बत्ती र ध्वजपताकासहित मनाउने आम चलन छ । यस्तो अवसरमा मेला महोत्सव गरेर वा एकै ठाउँमा भेला भएर खानपीन, नाचगन र रमाइलो वा शुभकार्य गर्ने अवसरसमेत जुराईन्छ । त्यसका अतिरिक्त विश्वका विभिन्न देशमा यसरी मनाइन्छ नयाँ वर्ष ः
ब्राजिल
ब्राजिलमा नयाँ वर्षलाई स्वागत गर्ने अनौठो चलन छ । ब्राजिलमा नयाँ वर्षमा फरक तरिकाले दाल पकाएर खाने गरिन्छ । दाललाई धन दौलतको प्रतीकको रुपमा चिनिन्छ । दाल खाँदा नयाँ सालमा समृद्धि मिल्ने ब्राजिलियनको विश्वास छ ।
स्पेन
स्पेनमा नयाँ वर्षलाई स्वागत गर्ने अर्को अनौठो चलन छ । स्पेनिसहरु मध्यरातको १२ बजे १२ वटा अङ्गुर हातमा लिएर दौडिन्छन् । यसरी १२ बजे १२ अङ्गुर लिएर खुसी साट्दा अबका १२ महिनामा भाग्य र खुसी थपिने आम विश्वास छ ।
जापान र दक्षिण कोरिया
नयाँ वर्षलाई स्वागत गर्ने जापान र दक्षिण कोरियाको साझा परम्परा छ । नयाँ वर्षलाई स्वागत गर्न अघिल्लो रात सामूहिक घण्टी बजाउने चलन छ । जापानमा १०८ पटक घण्टी बजाउनुपर्ने मान्यता छ ।
रोमानिया
रोमानियामा नयाँ वर्षलाई स्वागत गर्न भालु बन्ने परम्परा छ । उनीहरु नयाँ वर्षमा भालु जस्तै रङ्गको कपडा लगाएर सडकमा नाच्ने गर्छन । यसबाट खराब आत्माबाट मुक्ति मिल्ने उनीहरुको विश्वास छ । रोमानियामा भालुलाई रक्षा कवचको रुपमा पनि लिइन्छ ।
अमेरिका
अमेरिकामा नयाँ वर्ष मनाउनको लागि टाइम्स स्क्वायरमा जम्मा भएर आतिशवाजी गर्ने चलन छ । नयाँ वर्षको काउण्टडाउन सहित केही कुरा आकाश तिर फाल्ने र नयाँ वर्ष शुरु हुँदा उक्त वस्तु भुँईमा झर्दा भाग्यमानी हुने उनीहरुको विश्वास छ ।
अफ्रिका
दक्षिण अफ्रिकामा नयाँ वर्षमा कम आवश्यकताका पुराना सामान घरबाट बाहिर निकाल्ने चलन छ । यसरी सामान बाहिर निकालेर त्यसलाई बिक्री गर्ने र नयाँ सामान भित्र्याउने भने होइन । उनीहरुले त्यसरी सामान बाहिर ढोका तथा खिड्कीमा राख्ने र नयाँ वर्षसँगै ती बस्तुमा नयाँ शौभाग्य भरेर भित्र राख्दा नयाँपन महसुस हुने उनीहरुको विश्वास छ ।
दक्षिण अमेरिका
दक्षिण अमेरिका लगायतका केही देशमा नयाँ वर्षको इभमा खुला ठाउँमा सुटकेश लिएर घुम्ने गर्छन । घुमफिरमा सौखिन दक्षिण अमेरिकीहरु नयाँ वर्षमा वर्षभरि घुमफिरमा समय विताउन पाउने उनीहरुको आम विश्वास छ ।
अर्जेन्टिना
नयाँ वर्षको अघिल्लो रात अजर्नेन्टिनीहरु झ्यालमा बसेर कागजका टुक्रा च्यात्दै बाहिर फाल्ने गर्छन । यसरी बाहिर फाल्दा आफूलाई जीवनमा पछाडि छाड्ने र विगतलाई फालिने उनीहरुको विश्वास छ ।
चीन
चिनियाँहरु नयाँ वर्षलाई खुसी र भाग्यको रुपमा लिने गर्छन । उनीहरु नयाँ वर्ष ढोका अगाडि रङ्ग छर्छन् । साथै रातो रङ्गका उपहार साट्छन् ।
डेनमार्क
डेनमार्कमा घरको दैलो अगाडि पुराना भाँडाकुडा फोड्ने काम गर्छन् । यसरी फोडेका भाँडाकुडा साथी तथा आफन्त आएर उठाउने गरिन्छ । यसरी सामान उठाउँदा आफन्तसँग दुःख साटिने उनीहरुको विश्वास छ ।
इरान
इरानीहरु नयाँ वर्षमा आगोमा हाम फालेर मनाउने गर्छन् । यसरी आगोमा हाम फाल्दा अघिल्ला वर्षका चुनौतीहरुलाई पार गरिने उनीहरुको विश्वास छ ।
इटली
इटलीमा पुराना बस्तु झ्यालबाट बाहिर फाल्छन् । उनीहरुको मान्यता अनुरुप पुराना बस्तुको प्रतीकको रुपमा केही सामाग्री बाहिर फाल्दा नयाँ कुरा भित्रयाउन सकिने उनीहरुको विश्वास छ ।
Comments are closed.