पोखरा । सूचना तथा सञ्चार प्रविधि क्षेत्रका नवीनतम आविष्कारहरूलाई एकै थलोमा प्रदर्शन गर्ने उद्देश्यका साथ कम्प्युटर एसोसिएसन नेपाल (क्यान) महासंघ कास्कीको आयोजनामा हुने १३औँ क्यान इन्फोटेक २०८२ को तयारी अन्तिम चरणमा पुगेको छ ।
यस वर्षको प्रदर्शनी यही मंसिर १७ देखि २१ गतेसम्म पोखरा-९, नयाँबजारस्थित पोखरा प्रदर्शनी केन्द्रमा आयोजना हुँदैछ। यस बृहत् मेलाको शीर्षक प्रायोजक (Title Sponsor) को जिम्मेवारी विश्वविख्यात डिजिटल सेक्युरिटी उत्पादक कम्पनी UNV ले लिएको छ, जसले आयोजक क्यान कास्कीसँग सहकार्य गरेको छ।
पोखरा उद्योग वाणिज्य संघले वर्षेनी आयोजना गर्दै आइरहेको ३४औँ राष्ट्रिय औद्योगिक व्यापार मेलाको परिसरमै क्यान महासंघ कास्कीको सहकार्यमा यो प्रविधि प्रदर्शनी सञ्चालन गर्न लागिएको हो।
क्यान कास्कीका सचिव दामोदर डुम्रेका अनुसार, यस बृहत् मेलाको एक महत्त्वपूर्ण अंशका रूपमा क्यान इन्फोटेकलाई उभ्याउनुले प्रविधि र उद्योग व्यापारबीचको अन्तरसम्बन्धलाई थप मजबुत बनाएको छ। संघका वाणिज्य उपाध्यक्ष बलराम आचार्यले मेलाका लागि स्टल बुकिङ खुल्ला गरिएको जानकारी गराउँदै यसपटक सीमित संख्यामा मात्र स्टल राख्ने योजना रहेको सुनाए।
UNV का नेशनल सेल्स म्यानेजर सर्दक अधिकारीका अनुसार UNV एक विश्वस्तरीय डिजिटल सेक्युरिटी कम्पनी हो, जसको नेपालका लागि आधिकारिक वितरक इगल टेक नेपाल रहेको छ। कम्पनीले नेपालभर २५० भन्दा बढी डिलर नेटवर्कमार्फत अत्याधुनिक सुरक्षा तथा अफिस अटोमेसन सामग्रीहरूको बिक्री-वितरण गर्दै आएको छ।
प्रदर्शनीमा UNV ले आफ्ना उत्पादनहरू, जस्तैस् सीसीटीभी क्यामेरा, मोनिटर, स्टोरेज डिभाइस, रातमा पनि स्पष्ट दृश्य प्रदान गर्ने OWL View IP क्यामेरा, क्यामेरा, UPS, स्मार्ट बोर्ड र नेटवर्क उपकरणहरू लगायतका डिजिटल सुरक्षाका अत्याधुनिक समाधानहरू प्रस्तुत गर्नेछ।
क्यान महासंघ कास्कीका अध्यक्ष पुरूषोत्तम कुँवरले यस प्रदर्शनीलाई सूचना तथा सञ्चार प्रविधि (ICT) क्षेत्रका लागि ‘ट्रान्सफर्मेसनल’ अवसरका रूपमा व्याख्या गरेका छन् । “यो इन्फोटेक केवल प्रदर्शनी मात्र नभएर प्रविधि प्रेमीहरू, उपभोक्ताहरू र व्यावसायिक निकायहरूका लागि एउटा जीवन्त मञ्च हो। यसले उपभोक्ताहरूलाई बजारमा आएका नवीनतम हार्डवेयर र सफ्टवेयरको प्रत्यक्ष अनुभव लिने मौका दिन्छ। साथै, सहभागी कम्पनीहरूका लागि यो एउटा शक्तिशाली प्लेटफर्म हो, जहाँ उनीहरूले आफ्ना उत्पादनहरूको बजार सर्वेक्षण गर्न, ग्राहकको अपेक्षा बुझ्न र दीर्घकालीन व्यावसायिक सम्बन्ध विस्तार गर्न सक्नेछन्।”, उनले भने ।
क्यान महासंघका सदस्य संस्थाहरू लगायत विभिन्न राष्ट्रिय र अन्तर्राष्ट्रिय सूचना तथा सञ्चार प्रविधिसम्बन्धी कम्पनीहरूको उत्पादन तथा प्रत्यक्ष प्रदर्शनीमा सहभागिता रहने जनाइएको छ। अवलोकनकर्ताहरूले व्यापार मेलाको परिसरमा स्थापित १३औँ क्यान इन्फोटेकमा सूचना तथा सञ्चार प्रविधिसम्बन्धी विविध स्टलहरूको अवलोकन गर्न पाउनेछन्।
Comments are closed.