काठमाडौं । स्वतन्त्र ऊर्जा उत्पादकहरूको संस्था, नेपाल (इप्पान)ले आगामी अक्टोबर १५ र १६ गते ‘पावर समिट २०२५’ आयोजना गर्ने भएको छ । यस अगाडि सेप्टेम्बर १७ र १८मा हुने भनिएको समिट विशेष कारणले सरेको थियो । नयाँ मिति घोषणासँगै पावर समिटको तयारी तिब्र बनाइएको इप्पानले जनाएको छ ।
यस पटक ‘मिसन २८,५०० मेगावाट’समिट हुन लागेको हो । ‘नेपाललाई ऊर्जावान बनाऔँ, क्षेत्रलाई सबलीकरण गरौँ’ नाराका साथ सोल्टी होटल काठमाडौंमा हुने यो कार्यक्रममा देश तथा विदेशबाट ऊर्जासँग सम्बन्धित प्रतिनिधिहरुको सहभागिता रहनेछ । सम्मेलनमा नीति निर्माता, लगानीकर्ता, विकासकर्ता, वित्तीय संस्था, कूटनीतिज्ञ र ऊर्जा क्षेत्रका विज्ञहरू एकै ठाउँमा भेला हुनेछन् ।
नेपालको ऊर्जा क्षेत्रको भविष्य निर्धारण गर्न र यसलाई क्षेत्रीय स्वच्छ ऊर्जा केन्द्रका रूपमा स्थापित गर्न यो समिट महत्वपूर्ण मञ्च बन्ने इम्पानले विश्वास लिएको छ ।
सरकारको ऊर्जा विकास मार्गचित्र २०८१ ले सन् २०३५ सम्ममा २८,५०० मेगावाट विद्युत उत्पादन गर्ने लिएको छ । त्यसमध्ये १५,००० मेगावाट छिमेकी मुलुकहरू भारत र बंगलादेशमा निर्यात गर्ने महत्वाकांक्षी लक्ष्य निर्धारण गरेको छ ।
नेपाल ऊर्जा अभाव भएको मुलुकबाट स्वच्छ ऊर्जाको सम्भावित निर्यातकर्तामा रूपान्तरण भइरहेको सन्दर्भमा पावर समिट २०२५ ले ऊर्जा क्षेत्रलाई थप सशक्त बनाउन सकारात्मक योगदान गर्ने विश्वास गरिएको छ ।
Comments are closed.