होटल एसोसिएसन नेपालले आयोजना गर्न लागेको होटल एक्सपो एक वर्षसम्म चल्ने व्यापक अभियानको रूपमा अघि बढाइएको छ । यस अभियानमार्फत सातै प्रदेशमा फैलिएको होटल, पर्यटन तथा समग्र हस्पिटालिटी क्षेत्रको व्यवस्थापन, स्तरोन्नति र प्रवद्र्धनमा संघ सक्रिय रूपमा जुटेको छ । होटल एक्सपोको मूल उद्देश्य होटल उद्योगको सम्भावना, क्षमता र विविधतालाई एउटै प्लेटफर्ममा प्रस्तुत गर्नुका साथै सरकार, निजी क्षेत्र र आम सरोकारवालाबीच सहकार्यलाई सुदृढ बनाउनु हो ।
होटल एसोसिएसन नेपालले सरकारसँग निरन्तर संवाद गर्दै पर्यटनमैत्री नीति, प्रभावकारी पोलिसी र पूर्वाधार विकासका विषयमा स्पष्ट धारणा राख्दै आएको छ । विशेष गरी हवाई पूर्वाधार र विमानस्थलको भूमिकालाई चलायमान बनाउनुपर्ने आवश्यकता देखिएको छ । यदि नेपालका विमानस्थलहरू प्रभावकारी रूपमा सञ्चालनमा आए भने देशको कुल गार्हस्थ्य उत्पादन (जिडिपी) हालको तुलनामा दोब्बरसम्म पुग्न सक्ने सम्भावना देखिन्छ । पर्यटनले अर्थतन्त्रमा पार्ने प्रत्यक्ष र अप्रत्यक्ष प्रभावलाई ध्यानमा राख्दा, एयरपोर्ट र कनेक्टिभिटी विकासलाई प्राथमिकतामा राख्नु अपरिहार्य छ ।
हाल निर्माणाधीन पर्यटनसम्बन्धी परियोजनाहरू समयमै सम्पन्न गर्न सकियो भने नेपालले वार्षिक करिब ३० लाख पर्यटक भित्र्याउन सक्ने क्षमता राख्दछ । तर यसका लागि दीर्घकालीन योजना, स्थिर नीति र कार्यान्वयनमा दृढ इच्छाशक्ति आवश्यक छ । होटल एसोसिएसन नेपालले अन्तर्राष्ट्रिय पर्यटकसँगै राष्ट्रिय तथा आन्तरिक पर्यटकलाई पनि समान रूपमा ध्यानमा राखेर कार्यक्रम तथा रणनीति अघि बढाइरहेको छ । आन्तरिक पर्यटनले संकटका समयमा होटल उद्योगलाई टिकाइराख्न महत्वपूर्ण भूमिका खेलेको तथ्य हामीले विगतमा अनुभूत गरिसकेका छौं ।
त्रिभुवन अन्तर्राष्ट्रिय विमानस्थलसँगै गौतम बुद्ध अन्तर्राष्ट्रिय विमानस्थल र पोखरा अन्तर्राष्ट्रिय विमानस्थल पूर्ण क्षमतामा सञ्चालनमा आए भने हालको भन्दा कम्तीमा २० प्रतिशत बढी पर्यटक नेपाल भित्र्याउन सकिने सम्भावना छ । यी विमानस्थलहरू सञ्चालनमा आएपछि क्षेत्रीय पर्यटनको विस्तार हुनेछ, नयाँ गन्तव्यहरू प्रवद्र्धनमा आउनेछन् र होटल उद्योगले देशव्यापी रूपमा लाभ लिन सक्नेछ । अहिलेको अवस्थामा करिब ५० प्रतिशत होटलहरूले अन्तर्राष्ट्रिय मापदण्डअनुसार सेवा सुविधा प्रदान गरिरहेका छन् भने बाँकी ५० प्रतिशत होटलहरू आन्तरिक पर्यटकलाई लक्षित गर्दै सेवा दिइरहेका छन् ।
दुवै प्रकारका होटलहरूको आफ्नै महत्व छ । अन्तर्राष्ट्रिय स्तरको सेवा विस्तार गर्दै लैजानुका साथै आन्तरिक पर्यटकको पहुँच, रुचि र क्षमताअनुसारको सेवा प्रवाहलाई पनि सन्तुलित रूपमा अघि बढाउनु हाम्रो लक्ष्य हो । होटल एक्सपोमार्फत हानले होटल तथा हस्पिटालिटी क्षेत्रलाई एकीकृत, व्यवस्थित र दिगो रूपमा अघि बढाउने स्पष्ट दृष्टिकोण प्रस्तुत गरेको छ । सरकार, निजी क्षेत्र र पर्यटनसम्बन्धी सबै सरोकारवालाहरूबीच सहकार्य मजबुत बनाउन सकियो भने नेपालले पर्यटन क्षेत्रमार्फत आर्थिक समृद्धिको नयाँ ढोका खोल्न सक्नेमा हामी विश्वस्त छौं ।
Comments are closed.