काठमाडौं । नेपाल पुँजी बजार लगानीकर्ता संघका पदाधिकारीले प्रधानमन्त्री शेरबहादुर देउवासँग भेटवार्ता गरेका छन्। आइतबार बिहान भएको भेटमा लगानीकर्ताहरूले प्रधानमन्त्रीलाई चार बुँदे ज्ञापनपत्र बुझाएका छन्।
ज्ञापनपत्रमा सेयर धितोमा लगाइएको चार र १२ करोडको क्याप हटाउनुपर्ने माग राखिएको छ। चालु आर्थिक वर्षको मौद्रिक नीतिले एक व्यक्ति वा संस्थाले एउटा बैंक तथा वित्तीय संस्थाबाट सेयर धितोमा बढीमा चार करोड र धेरै बैंकबाट गरेर बढीमा १२ करोडसम्म मात्र कर्जा लिन पाउने व्यवस्था गरेको छ।
त्यस्तै, सीडी रेसियो पनि खारेजीको माग गरिएको छ। मौद्रिक नीतिमार्फत सीसीडी रेसियोलाई सीडी बनाइएपछि बैंकहरूको कर्जा क्षमता घटेको लगानीकर्ताहरूले बताएका छन्।
लगानीकर्ताले पुरानै भारित औसत दर कायम गर्न पनि माग गरेका छन्। यसअघि भएको १०० को औसत दरलाई परिवर्तन गरी चालू आवमा १५० कायम गरिएको थियो। लगानीकर्ता संघले पुँजी बजारको विस्तार देशव्यापी बनाउनको लागि बैंकहरूलाई ब्रोकर लाइसेन्स जारी गर्न पनि ज्ञापनपत्रमार्फत प्रधानमन्त्री देउवाको ध्यानाकर्षण गराएका छन्।
प्रधानमन्त्री देउवाले भेटघाटकै क्रममा गभर्नर महाप्रसाद अधिकारीसँग लगानीकर्ताका माग सम्बोधन गर्न आग्रह गरेको संघकी अध्यक्ष राधा पोखरेलले जनाकारी दिइन् ।
Comments are closed.