नेपाल वितरक संघको २४औं वार्षिक साधारणसभा यही भदौ १४ गते शनिबार हुँदैछ । साधारसभाले नयाँ नेतृत्व चयन गर्नेछ । बिगतका कामहरुको समीक्षासहित भविष्यका योजनाहरु तर्जुमा गर्नमा पनि साधारणसभा विशेष महत्वपूर्ण रहने संघले जनाएको छ । यसैक्रममा संघका अध्यक्ष रामहरि घिमिरेसँग गरिएको संक्षिप्त कुराकानीः
सामानहरुको वितरण प्रणालीमा वितरकहरुको भूमिका कस्तो देख्नुहुन्छ ?
वितरकले आयातकर्ता र स्वदेशी उद्योगहरूले उत्पादन गरेका सामान उपभोक्तासम्म पु¥याउने महत्वपूर्ण पुलको काम गर्छन् । उत्पादक वा आयातकर्ताले सीधै सबै उपभोक्तासम्म पुग्न सम्भव हुँदैन । त्यसैले, उनीहरूले आफ्नो सहजताअनुसार वितरक छनोट गर्छन् । त्यसपछि, हामी वितरकहरूले ती सामानलाई बजारका खुद्रा व्यापारी (रिटेलर) र अन्तिम उपभोक्तासम्म पु¥याउने काम गर्छौं । सरल भाषामा भन्नुपर्दा, वितरण प्रणालीको सुरुवाती बिन्दु नै वितरक हो ।
वितरकका समस्याहरू के–के छन् ? तपाईंहरूले कस्ता चुनौतीको सामना गरिरहनुभएको छ ?
हाम्रा सदस्य साथीहरूले अहिले धेरै समस्या भोगिरहनुभएको छ । जस्तै, भिसिटिएसको समस्या, ट्राफिक व्यवस्थापनको समस्या लगायत छन् । ट्राफिकले बिहान ११ बजेदेखि दिउँसो ३ बजेसम्म मात्रै काम गर्न दिने गरेको छ । सामान्यतया, एउटा कामदारको कार्य समय ८ घण्टा हुन्छ, तर हामीले ४ घण्टा मात्र काम गर्न पाउँछौँ । बेलुका ४ देखि ७ बजेसम्मको मुख्य व्यापारिक समयमा पनि हाम्रा गाडीहरू बन्द हुने गरेका छन्, जसले गर्दा व्यापारमा ठूलो असर परिरहेको छ ।
यसबाहेक, बजारमा उधारो (क्रेडिट) को समस्या पनि उत्तिकै जटिल छ । व्यापार बढाउन सामान उधारोमा बेच्नैपर्ने हुन्छ, तर त्यो उधारो उठाउन निकै समस्या पर्छ । क्रेडिट एक्ट बनाउने कुरा चले पनि अहिलेसम्म लागू भएको छैन, जसले गर्दा वितरकको लगानी सुरक्षित छैन । साथै, कतिपय कम्पनीहरू र राज्यका नीति नियमहरू पनि व्यवसायमैत्री नहुँदा समस्याहरू सिर्जना भएका छन् ।
नेपाल वितरक संघमा कति सदस्य आब छन् ?
नेपाल वितरक संघको कार्यक्षेत्र देशभर नै हो । तर, हाल हामीले काठमाडौं, ललितपुर र भक्तपुर गरी उपत्यकाका तीन जिल्लालाई केन्द्रित गरेर काम गरिरहेका छौँ । यो क्षेत्रमा ७०० भन्दा बढी वितरक साथीहरू सक्रिय हुनुहुन्छ भन्ने हाम्रो अनुमान छ । अहिले हामीसँग ४०० भन्दा बढी सदस्य आबद्ध भइसक्नुभएको छ र सदस्यता विस्तारको काम निरन्तर जारी छ । हामीलाई आशा छ, आगामी दिनमा सबै वितरक साथीहरू संघमा जोडिनुहुनेछ ।
संघको आगामी साधारणसभाको तयारी कस्तो छ ?
नेपाल वितरक संघको २४औँ साधारण सभा यही मिति यही भदौ १४ गते शनिबार आयोजना हुँदैछ । संघको गौरवशाली यात्रालाई निरन्तरता दिन र वितरक एकतालाई अझ बलियो बनाउन यो साधारणसभा निकै महत्वपूर्ण छ । यस अवसरमा हामीले सबै सदस्यहरूलाई अनिवार्य उपस्थितिका लागि हार्दिक अनुरोध गरेका छौँ । यो साधारणसभामा सदस्यहरूको सक्रिय सहभागिताले संघको भविष्य र वितरक एकतालाई थप सबल बनाउनेछ भन्ने हाम्रो विश्वास छ ।
अन्त्यमा, के भन्न चाहनुहुन्छ ?
हामीले वितरकहरूको हकहितका लागि निरन्तर काम गर्दै आइरहेका छौँ । अबको साधारणसभाबाट नयाँ कार्यसमिति निर्वाचित हुँदैछ । नयाँ कार्यसमितिले पनि अझ सशक्त रूपमा काम गर्नेछ भन्नेमा म विश्वस्त छु । मेरो कार्यकाल सफल बनाउन सहयोग गर्नुहुने सम्पूर्ण साथीहरू, सञ्चार माध्यम, सम्पूर्ण सरोकारवाला र शुभचिन्तकहरूलाई म हृदयदेखि आभार व्यक्त गर्दछु । साथै, सम्पूर्ण वितरकहरूलाई एकजुट भएर आफ्ना हक र हितका लागि अगाडि बढ्न पनि आग्रह गर्दछु ।
Comments are closed.