काठमाडौँ । राष्ट्रिय स्वतन्त्र पार्टी (रास्वपा) को समानुपातिक निर्वाचनको बन्दसूचीमा समावेश भएका युवा उद्यमी एवं एफसी चितवनका अध्यक्ष सचिन ढकालले आफ्नो नाम फिर्ता लिएका छन् । पार्टी नेतृत्वप्रति आभार व्यक्त गर्दै उनले व्यक्तिगत कारणवश यस पटक उक्त सूचीबाट आफ्नो नाम फिर्ता लिने निर्णय गरेको जानकारी गराएका छन् ।
नेपाल उद्योग वाणिज्य महासंघका अध्यक्ष चन्द्रप्रसाद ढकालका छोरा सचिनले आफ्नो शिक्षा र ज्ञानलाई स्वदेशमै उद्यमशीलतामा रुपान्तरण गर्ने अठोटका साथ यो निर्णय लिएको बताएका छन् ।
स्वदेशमै सम्भावना खोज्दै सचिन
ढकाल विदेशमा अध्ययन पूरा गरेपछि त्यहाँका आकर्षक अवसरहरू त्यागेर स्वदेश फर्किएका युवा हुन् । ‘आफ्नै देशको माटो सिँचेर यहीँ सुन फलाउनुपर्छ र स्वदेशमै रोजगारीका अवसरहरू सिर्जना गर्नुपर्छ भन्ने मेरा पिताजीको प्रेरणाबाट म उद्यमशीलतामा लागेको हुँ,’ उनले भनेका छन् ।
नेपाली अर्थतन्त्र, खेलकुद र पर्यटन क्षेत्रमा सक्रिय ढकालले वार्षिक ५ लाखभन्दा बढी युवा वैदेशिक रोजगारीमा जानुपर्ने बाध्यतालाई चिर्न स्वदेशमै अवसरहरू सिर्जना गर्नु आवश्यक रहेको उनले औंल्याए । युवा उद्यमशीलता प्रवद्र्धनका लागि नवीन सोच र प्रतिबद्धताका साथ अघि बढ्ने उनले बताए ।
पारिवारिक विरासतभन्दा नवीनतामा जोड
आफ्नो पारिवारिक पृष्ठभूमि व्यावसायिक भए पनि आफू परम्परागत व्यवसायको निरन्तरतामा मात्र सीमित नहुने उनले बताएका छन् । ‘कुनै व्यावसायिक घरानाको सन्तान हुनु र देश विकासमा योगदान गर्छु भन्नु नराम्रो होइन,’ उनले भनेका छन्, ‘‘मैले पारिवारिक अवसर लिएर मात्र होइन, आफैले हासिल गरेको शिक्षालाई व्यवहारमा उतार्दै चुनौतीपूर्ण र नवीन काममा आफूलाई खार्ने प्रयत्न गरिरहेको छु ।’
सुशासन र समुन्नत नेपाल निर्माणको अभियानमा साथ
तत्कालका लागि समानुपातिक सूचीबाट नाम फिर्ता लिएपनि सुशासन र समुन्नत नेपाल निर्माणको अभियानमा आफ्नो साथ र सहयोग सदैव रहने ढकालले स्पष्ट पारेका छन् । आगामी दिनहरूमा राष्ट्र र समाजको हितका लागि राजनीतिक जिम्मेवारी वहन गर्न आवश्यक परेमा सधैँ तत्पर रहने प्रतिबद्धता समेत उनले व्यक्त गरे । ढकाल हाल एफसी चितवनको अध्यक्ष हुन् । नेपाली खेलकुद र हस्पिटालिटी क्षेत्रको विकासमा उनी सक्रिय छन् ।
यस्तो छ उनको विज्ञप्तिः
Comments are closed.