काठमाडौं । नेपाल धितोपत्र बोर्डले तीनवटा खुलामुखी म्युचुअल फन्ड योजनालाई इकाइ निष्कासनको अनुमति दिएको छ। अनुमति प्राप्त योजनाहरूमा एनएमबि सरल बचत फन्ड–ई, सिटिजन्स सदाबहार योजना, र एनआईसी एसिया इक्विटी लिंक्ड इन्भेस्टमेन्ट स्किम रहेका छन्।
एनएमबि सरल बचत फन्ड–ई
धितोपत्र बोर्डले एनएमबि क्यापिटलद्वारा सञ्चालित एनएमबि सरल बचत फन्ड–ईलाई थप २ करोड इकाइ निष्कासनको अनुमति दिएको हो। प्रत्येक इकाइको अंकित दर १० रुपैयाँ कायम गरिएको छ। यसअनुसार, कुल २० करोड रुपैयाँ बराबरको इकाइ सार्वजनिक रुपमा निष्कासन गरिनेछ। यो योजना एनएमबि म्युचुअल फन्ड अन्तर्गत सञ्चालित छ भने यसको कोष प्रवर्द्धक एनएमबि बैंक रहेको छ। हालसम्म यो योजनाको ३४ करोड इकाइ धितोपत्र बोर्डमा दर्ता भइसकेका छन्।
सिटिजन्स सदाबहार योजना
सिटिजन्स म्युचुअल फन्ड अन्तर्गत सञ्चालित सिटिजन्स सदाबहार योजनाले पनि इकाइ निष्कासनको अनुमति पाएको छ। धितोपत्र बोर्डले यस योजनालाई ५० करोड रुपैयाँ बराबरको इकाइ निष्कासन गर्न स्वीकृति दिएको छ। योजना व्यवस्थापकले अब १० रुपैयाँ अंकित दरमा ५ करोड इकाइ सार्वजनिक निष्कासन गर्नेछ। यस योजनाको कोष प्रवर्द्धक सिटिजन्स बैंक इन्टरनेसनल रहेको छ।
एनआईसी एसिया इक्विटी लिंक्ड इन्भेस्टमेन्ट स्किम
तेस्रो योजना एनआईसी एसिया म्युचुअल फन्ड अन्तर्गतको एनआईसी एसिया इक्विटी लिंक्ड इन्भेस्टमेन्ट स्किम हो, जसलाई धितोपत्र बोर्डले १ अर्ब रुपैयाँ बराबरको इकाइ निष्कासनको अनुमति दिएको छ। योजना व्यवस्थापक एनआईसी एसिया क्यापिटलले १० रुपैयाँ अंकित दरमा १० करोड इकाइ सार्वजनिक रूपमा निष्कासन गर्नेछ। यसको कोष प्रवर्द्धक एनआईसी एसिया बैंक रहेको छ।
तीनवटै योजना खुलामुखी म्युचुअल फन्ड हुन्, जसमा सर्वसाधारण लगानीकर्ताहरूले सजिलै प्रवेश गर्न र आवश्यक पर्दा फन्डबाट बाहिरिन सक्ने सुविधा हुन्छ। नेपालको पूँजीबजार विस्तार तथा वैकल्पिक लगानीका विकल्पहरूलाई प्रवर्द्धन गर्न यस्ता योजनाहरूको महत्त्वपूर्ण भूमिका रहने विश्वास गरिएको छ।
Comments are closed.