काठमाडौं । स्कोडा इन्डियाको इन्ट्री–लेभल एसयूभी स्कोडा कायलाकको वास्तविक माइलेज परीक्षण गरिएको छ । यस परीक्षणले ARAI–प्रमाणित माइलेज र वास्तविक सडक अवस्थामा प्राप्त हुने इन्धन दक्षताबीचको अन्तर स्पष्ट पारेको छ ।
१.०–लिटर टर्बो पेट्रोल इञ्जिन र म्यानुअल गियरबक्ससहित आएको कायलाकको ARAI–प्रमाणित माइलेज १९.६८ किलोमिटर प्रतिलिटर रहेको छ । तर वास्तविक ट्राफिक र सडक अवस्थाका कारण यसको माइलेज फरक देखिएको छ ।
शहरभित्र ८० किलोमिटरको दूरीमा गरिएको परीक्षणमा, ट्राफिक जाम, सिग्नल र स्टप–एन्ड–गो अवस्थाका कारण गाडीले ७.४९ लिटर इन्धन खपत गर्यो। यसअनुसार सिटी माइलेज १०.६८ किलोमिटर प्रतिलिटर रह्यो । यद्यपि माइलेज कम देखिए पनि सहरको कम गतिमा पनि इञ्जिन रेस्पोन्सिभ र चलाउन सहज रहेको चालकहरूको भनाइ छ ।
हाइवेमा भने कायलाकले अपेक्षाकृत राम्रो प्रदर्शन देखाएको छ । ९१ किलोमिटरको दूरीमा ८५ देखि ९५ किलोमिटर प्रतिघण्टाको स्थिर गतिमा चलाउँदा गाडीले ६.४९ लिटर इन्धन प्रयोग गर्दै १४.०२ किलोमिटर प्रतिलिटर माइलेज दिएको छ । स्थिर गति र अवरोधरहित सडकले इञ्जिनलाई अझ दक्ष बनाएको देखिएको छ ।
परीक्षणका क्रममा हाइवेमा कायलाक स्थिर, सन्तुलित र आरामदायी भएको प्रतिक्रिया आएको छ । लामो दूरीको यात्राका लागि यो एसयूभी उपयुक्त देखिएको छ । समग्रमा, स्कोडा कायलाकले शक्ति, आराम र इन्धन दक्षताबीच सन्तुलन प्रस्तुत गरेको छ । शहरमा दैनिक आवतजावतदेखि हाइवेमा लामो यात्रा गर्ने प्रयोगकर्ताका लागि यो व्यावहारिक विकल्पका रूपमा देखिन्छ ।
नेपालमा स्कोडा कायलाकको सम्भावित लन्च नजिकिँदै जाँदा, शहर र राजमार्ग दुवैमा सहज रूपमा चल्ने कम्प्याक्ट एसयूभी खोजिरहेका ग्राहकहरूबीच यसको प्रतीक्षा बढ्दो छ ।
Comments are closed.