पोखरा । पर्यटकले खचाखच भरिने पोखरा यो सिजनमा दुई दशक अगाडिसम्म अफ सिजनको रुपमा सुनसान हुन्थ्यो । रेष्टुरेण्ट एण्ड बार एसोसिएसन अफ नेपाल (रेवान) पोखराका अध्यक्ष नरेशबहादुर भट्टराई सम्झन्छन्, ‘अङ्ग्रेजी नयाँ वर्षमा पोखरामा आएका पर्यटक पनि अन्यत्र नयाँ वर्ष मनाउन बाहिरिने र पोखराका व्यवसायी समेत व्यवसाय बन्द गरेर घुम्न निस्कने परम्परा थियो ।’
त्यही अभ्यास रोक्न र पोखरामा कसरी पर्यटकलाई रोक्ने भन्ने विषयमा व्यवसायी छलफलमा जुटे र निष्कर्श निकाले, ‘स्ट्रिट फेस्टिवल’ गरौं । २३ वर्ष अगाडि फरक अवधारणाका साथ शुरु गरिएको ‘स्ट्रिट फेस्टिवल’ को २४ औं संस्करण ‘पोखरा सडक महोत्सव’ यस पाली पौष १३ देखि १७ सम्म पोखरामा हुँदैछ । ‘सडक मै खाउँ सडक मै रमाउँ’ भन्ने उद्देश्यका साथ आयोजना गरिएको यो महोत्सवमा फरकपन ल्याउने महोत्सव आयोजक रेष्टुरेण्ट एण्ड बार एसोसिएसन अफ नेपाल (रेवान) पोखराको दावी छ ।
पोखरा महानगरपालिकाका मेयर धनराज आचार्य अङ्ग्रेजी नयाँ वर्षमा हुने यो महोत्सव पोखराको हकमा परम्परा नै बनिसकेको बताउँछन् । उनी भन्छन्, ‘पोखरा सडक महोत्सवमा पोखरा भित्रका मात्र नभएर पोखरा बाहिरका आन्तरिक पर्यटक र विदेशी पर्यटकको समेत आकर्षण पोखरा बनेको छ । महोत्सवलाई लक्षित गरेर पोखराका होटलका ४० हजार रुम बुक हुनुले पनि यसको महत्व कति छ भन्ने कुरा पुष्टि गर्छ । अर्को कुरा यो मेला महोत्सव मात्र होइन, यसले हाम्रो कला तथा सँस्कृतिलाई जगेर्ना गर्ने काम गर्छ । महोत्सवमा अरु धेरै प्रवद्र्धनात्मक क्रियाकलाप पनि हुन्छन् ।’
आयोजक संस्थाका अध्यक्ष तथा महोत्सवका संयोजकसमेत रहेका नरेश भट्टराई गर्विलो इतिहास बोकेको महोत्सवलाई कसरी पृथक र आकर्षक बनाउने भन्ने कुरामा गृहकार्य भएको बताउँछन् ।
उनी भन्छन्, ‘विगतका वर्षमा जस्तै साँस्कृतिक कार्यक्रम, मौलिक सँस्कृतिको प्रर्दशनी, राष्ट्रिय तथा अन्तर्राष्ट्रिय खाना, कन्सर्ट तथा डकुमेन्ट्री प्रर्दशनी, विभिन्न खेलकुदको आयोजना त हुन्छ नै थप अन्य कुराको लागि सरोकारवालाको सुझावलाई ग्रहण गरेका छौं ।’ ५ लाख दर्शकले अवलोकन गर्ने महोत्सव अङ्ग्रेजी नयाँ वर्षको छेको पारेर सधै यही मिति मै हुँदै आएको छ । आयोजक संस्थाका पूर्व अध्यक्ष गोपी भट्टराई टुरिजम वोर्डको क्यालेन्डरमा समेत सोही अनुसार रहँदै आएको र विदेशी पर्यटकले समेत सोही अनुसार हुने बुझाइ रहेकाले महोत्सवको सोही मितिको निरन्तरता भएको बताउँछन् । महोत्सवमार्फत देशमा लुकेको कला तथा संस्कृतिलाई बाटोमा देखाउँदा आकर्षित मात्र भएन नेपालको कला सँस्कृतिलाई विश्वव्यापी रुपमा प्रचार प्रसार गर्नको लागि सहयोग पुगेको उनको भनाई छ ।
होटल रेष्टुरेन्ट भित्र पाक्ने खानेकुरा सडकमा खान पाउँदा यसको महत्व झनै बढेको पाइएको उनको बुझाई छ । महोत्सवको व्यवस्थापनको लागि आवश्यक सुरक्षा व्यवस्थापन र पार्किङमा ध्यान दिइएको उनको भनाई छ । उनी भन्छन्, ‘सुरक्षाको प्रवन्ध राम्रो छ । प्राइभेट सेक्युरिटीको व्यवस्थापन गरिएको छ । जिल्ला प्रशासन कार्यालयले पनि सुरक्षाको प्रवन्ध राम्रो गरेको छ । बसपार्क तथा चौरहरुमा पार्किङको व्यवस्थापन गरिएको छ ।’ पर्यटकलाई सुपथ मूल्यमा बसोबासको लागि होटल एसोसियसनसँग समन्वय गरेर २० प्रतिशत छुटको व्यवस्था गरिएको आयोजकको भनाई छ । नयाँ वर्षमा घुम्नको लागि पोखराका स्थानीय समेत बाहिर जाने अभ्यास देखिन थालेपछि नयाँ वर्ष पोखरामै किन नमनाउने ? भन्ने मान्यताका साथ सडकमा रमाइलो गर्ने अभ्यासको शुरुवात भएको पूर्व अध्यक्ष भट्टराई बताउँछन् ।
उनी भन्छन्, ‘अहिले नयाँ वर्ष मनाउन पोखरा सडक महोत्सव आन्तरिक पर्यटकको आकर्षणको क्षेत्र बनेको त छ नै अर्कोतिर विदेशी पर्यटक जो घुम्नको लागि गोवा, थाइल्याण्ड जाने गरेकोमा अहिले पोखरामा केन्द्रीत हुन थालेका छन् ।’ पोखरा सडक महोत्सवमा आएका पर्यटक पोखरा आसपासका क्षेत्रमा समेत गएर बस्ने हुनाले होटलको समस्या नहुने उनको दावी छ । उनी भन्छन्, ‘पोखरामा पर्यटकको आकर्षण बढाउन व्यवसायी एकै पटक धेरै कमाउन भन्दा पनि कसरी पर्यटक आगमन बढाउने र बसाइ दीगो बनाउने भन्ने कुरामा एकमत छन् ।’ कोरोना महामारीका कारण धरासायी बनेका पोखराका व्यवसायलाई माथि उठाउन पनि यस्ता मेला महोत्सव सहयोगी बन्ने उनको दावी छ । ‘कोरोना महामारीका कारण सटर बन्द थिए तर हामीले सडक महोत्सव गर्यौं, यसले हामीलाई थप ऊर्जा मिलेको छ’ उनी भन्छन् ।
Comments are closed.