झापा । झापाको शिवसताक्षी नगरपालिका–८ झिलझिलेमा सञ्चालनमा आएको वाटर किङ्डम पार्क एन्ड रिसोर्टको औपचारिक उद्घाटन पुस २५ गते आइतबार हुने भएको छ । रिसोर्टको उद्घाटन पूर्व प्रधानमन्त्री केपी शर्मा ओलीको प्रमुख आतिथ्यतामा हुने भएको छ ।
रिसोर्टको औपचारिक उद्घाटनसँगै एक सातासम्म महोत्सव सञ्चालन हुने रिसोर्टका सञ्चालक राजकुमार संग्रौलाले आर्थिक आवाजलाई जानकारी दिए । पुस २५ देखि माघ १ गतेसम्म चल्ने महोत्सवमा प्रत्येक दिन राष्ट्रियस्तरका चर्चित कलाकारहरुको प्रस्तुति रहनेछ । ‘महोत्सवमा पर्यटकको अत्याधिक भिड लाग्नेमा हामी विश्वस्त छौं,’ उनले भने ।
शिवसताक्षी धाम, चिल्लागढ, दोमुखाजस्ता प्रख्यात पर्यटकीयस्थल नजिक अन्तर्राष्ट्रियस्तरको सेवा सुविधा प्रदान गर्ने गरी पार्क तथा रिसोर्ट सञ्चालनमा आएको हो । नयाँ र सहासिक मानिएको जीप फ्लाइङ र साइक्लिङ लगायतको सुविधा रिसोर्टमा छ । पानीमा खेलेर रमाउन सकिने आठ किसिमका खेल, ४५ मिटर लामो कृत्रिम सुरुङ, समुन्द्री छालको जस्तो वेभ पुल, स्विमिङ पुल, चिल्ड्रेन पुल, सावर डान्स, नाइट क्लब, सोनाबाथ, फिटनेस सेन्टरलगायतका सुविधा छन् ।
वाटरपार्कमा रमाउन भारतको सिलिगुढी जान नपर्ने अवस्था सिर्जना गर्न र नाफासँगै सेवाको भावनाले रिसोर्ट सञ्चालन गरिएको उनको भनाइ छ । रिसोर्टमा मनोरञ्जनका लागि खेलका गतिविधिसँग बस्नका लागि सुविधा सम्पन्न रुमहरुको व्यवस्था छ । खाना तथा खाजाका परिकारका लागि ननभेज र भेजका अलग अलग रेस्टुरेन्ट सञ्चालन गरिएको छ । दुई बिघा पाँच कठ्ठा निजी जग्गामा सञ्चालनमा आएको रिसोर्टमा ५२ करोड रुपैयाँ लगानी भएको बताइएको छ ।
रिसोर्ट गत वर्षबाटै अनौपचारिक रुपमा सञ्चालनमा आएको थियो । रिसोर्टमा सहासिक खेल गतिविधि लगायत पानीका खेलमा रमाउन पर्यटकहरु आकर्षित हुने गरेको अध्यक्ष मेनुकादेवी सिटौलाले जानकारी दिइन् । ‘पर्यटकका लागि स्तरीय प्रदान गर्ने गरी हामीले सेवा सुरु गरेका छौं,’ उनले भनिन्, ‘आगामी दिनमा रिसोर्टमा आन्तरिक तथा बाह्य पर्यटकको आकर्षण अझै बढ्नेमा हामी विश्वस्त छौं ।’
Comments are closed.